shadow
Diocese de Dili > NOTÍCIAS > LETURA DIÁRIA > Sexta – Feira, XII Semana iha Tempo Comum (ANO C)

Sexta – Feira, XII Semana iha Tempo Comum (ANO C)

Primeira Leitura      Gen. 17. 1, 9-10, 15-22

Lia housi livro Génesis:

Wainhira Abraão iha tinan sia nulu resin sia, Na’i mosu ba nia hodi dehan: “Ha’u mak Maromak kbiit na’in! Buak la’o iha Ha’u oin hodi halo tuir nafatin lialós”.

Maromak hateten tan ba Abraão: “Ó sei halo tuir nafatin Ha’u nia moruk, ó no ó nia oan no bei-oan sira hotu ba nafatin. Nune’e mak imi sei halo tuir Ha’u nia moruk, moruk housi Ha’u ho imi, no otas sira housi ó nebé sei mai tuir: mane hot-hotu nebé moris housi imi, sei simu circuncisão”.

Maromak hateten mó ba Abraão: “Kona ba Sarai, ó nia káben, ó sei la bolu tan nia Sarai, maibé, ó sei bolu nia Sara. Ha’u sei haraik bensa ba nia, no housi nia Ha’u sei fó oan mane ida ba ó. Ha’u sei fó bensa ba nia, nia sei sai inan nação sira nian; housi nia sei moris liurai barak ba povo wa’in”. Abraão monu taka oin ba rai, hamnasa hodi hateten ba iha nia laran: “Oinsá bele moris oan ida ba mane ida nebé ho tinan atus ida? Oinsá Sara ho tinan sia nulu bele sai inan? Abraão hatan ba Na’i Maromak: “Bele karik, Na’i, hamatan netik ba Ismael, hodi moris iha Ita futar oin!” Maibé, Maromak simu hodi dehan: “La’os  nune’e. Ó nia kabé Sara mak sei kô’us oan mane ida ba ó; ó sei hanaran nia Isaac. Ha’u sei halo Ha’u nia moruk ho nia, moruk ida nebé sei metin ba nafatin ho nia derasan hot-hotu. Kona ba Ismael, Ha’u rona mós ó lian: Ha’u sei fó bensa ba nia hodi tau matan atu nia sai wa’in. Nia sei sai aman ba liurai sanulu resin rua. Housi nia Ha’u sei halo povo boot ida. Maibé, ha’u nia moruk sei hela ho Isaac nebé Sara sei kô’us ba ó iha tempo hanesan ne’e iha tinan oin mai”. Wainhira hateten hotu tiha lia hirak ne’e ba Abraão, Maromak husik nia sa’e ba.

Maromak Futar Lia.

 

Salmo Responsorial                                                                                                                               Sal. 127(128). 1-2, 3, 4-5 (R. 4)

Refrão : Ema nebé hamta’uk Na’i, simu bensa!!! Repete-se

Ksolok ba sira be hamta’uk Na’i,

Hodi la’o tuir Nia dalan!

Housi ó nia liman nia kole mak ó han,

Ó sei haksolok hodi moris di’ak. Refrão

 

Ó nia káben hanesan uvas buras nafatin

Iha ó nia uma laran.

Ó nia oan sira hanesan oliveira nia tubun

Hadulas ó nia mesa. Refrão

 

Nune’e, ema be hamta’uk Na’i simu bensa,

Na’i haraik bensa ba ó housi foho Sião.

Ó bele haré Jerusalém be buras

Iha ó nia moris tomak. Refrão

 

Aclamação                                                                                                                                                                                            Mt. 8. 17

Refrão : Aleluia, Aleluia!! Repete-se

Cristo simu ita nia terus hotu ba nia leten,

Lori ita nia moras tomak. Refrão

 

Evangelho                                                                                                                                                                                           Mt. 8. 1-4

Na’i Jesus Cristo Nia Evangelho nu’udar São Mateus haktuir:

Iha tempo nebá, Jesus tun housi foho mai, ema lubun wa’in mai hamutuk ho Nia. Teki-Tekil ema moras lepra ida mai tuku tur iha Nia oin, nebé dehan ba Nia: “Na’i, Ita hakarak karik, bele fó isin di’ak mai ha’u”. Jesus lolo liman hodi kona nia dehan, “Ha’u hakarak, ó hetan isin di’ak ba”. Iha oras ne’e kedas, nia moras lepra sai di’ak. Jesus dehan ba nia: “Neon moris ba; Keta hateten ba ema  ida, maibé ba hatudu-an ba Na’ilulik hodi fó esmola tuir Moisés nia lei, nu’udar sasin ba sira”.

Lia Maksoyn. 

Leave a Reply

Your email address will not be published. Required fields are marked *