shadow
Diocese de Dili > NOTÍCIAS > LETURA DIÁRIA > Segunda – Feira, XIII Semana Tempo Comum (ANO C)

Segunda – Feira, XIII Semana Tempo Comum (ANO C)

Primeira Leitura                  Gen. 18. 16-33

Lia housi livro Génesis:

Iha loron hirak nebá, ema na’in tolu nebé liu housi Abraão nia uma, hamriik hodi husik hela Mambré, foti matan haré lós ba Sodoma. Abraão ba ho sira atu hatudu dalan ba sira. Na’i dehan: Ha’u sei subar ba Abraão buat nebé Ha’u atu halo? Tebes, nia sei sai nação boot no kbiit wa’in ida nia hun; housi nia, nação tomak sei hetan bensa. Basá, Ha’u fihir nia atu nia haruka nia oan sira no família nebé sei mai tuir nia atu moris tuir Na’i nia dalan, hodi halo tuir justiça no lialós. Nune’e, Na’i sei cumpri lolós promessa nebé Nia hakotu hela ba Abraão”. Na’i dehan tan: “Lia hasouru Sodoma no Gomorra todan tebes, tan sira salan boot tebes: Ha’u sei tun ba hodi haré to’ok lia nebé to’o mai Ha’u eh la tuir sira nia hahalok. La tuir karik, Ha’u sei hatene”.

Iha oras nebá, ema na’in tolu nebé tama iha Abraão nia uma, husik tiha Abraão, hodi la’o ba Sodoma. Abraão sei hamriik hela iha Na’i nia oin. Nia hakbesik ba Na’i hodi hasa’e lia ba nune’e: “Itaboot sei oho ema di’ak hamutuk ho ema sala na’in? Keta iha karik ema di’ak lima nulu iha cidade laran. Ita sei hanoin atu oho tebes sira hotu? Ita sei la haraik perdua ba cidade ne’e tan ema di’ak lima nulu nebé tur iha cidade? Tebes, Ita sei la halo ida ne’e: Oho ema di’ak hamutuk ho ema sala na’in, halo sira rua hetan rahun áat hanesan! Ida ne’e Ita sei la halo duni. Raiklaran nia juiz sei la halo justiça?” Na’i hatan ba nia: “Ha’u hetan karik ema di’ak lima nulu iha cidade Sodoma, Ha’u sei perdua cidade ne’e, tan ema di’ak, ne’e”.

Abraão hasa’e lia nafatin nune’e: Ha’u barani hasa’e nafatin ha’u lian ba Ita, maski ha’u la folin liu rai rahun no ahi kdesan. Keta kuran karik ema na’in lima housi lima nulu, Ita sei halakon cidade tomak tan de’it ema na’in lima?:” Na’i lia tun dehan: “Ha’u hetan karik ema di’ak háat nulu resin lima iha nebá, Ha’u sei la halakon cidade”. Abraão dala ida tan hasa’e lia, dehan: “Keta ida de’it háat nulu karik” Na’i hatan: “Tan sira háat nulu, Ha’u sei la sobu rahun cidade”.

Abraão hasa’e tan lia: “Ha’u Na’in, keta hirus. Tan atan ha’u hasa’e lia dala ida tan; keta iha de’it ema di’ak tolu nulu iha nebá?” Na’i simu hodi dehan: “Ha’u hetan karik iha nebá ema di’ak tolu nulu, Ha’u sei la sobu rahun cidade”. Abraão husu teni: “Atan oan sei aten barani atu hasa’e lia ba Ita; keta iha de’it ema di’ak rua nulu karik?”. Na’i simu dehan: “Tan ema di’ak rua nulu ne’e, Ha’u sei la harahun cidade”. Abraão hasa’e teni lia: “Na’i, keta hirus atan oan ko’alia dala ida ne’e tan; keta ida de’it ema di’ak sanulu iha nebá?”. Na’i lia tun, dehan: “Maski nune’e, Ha’u sei la sobu rahun cidade”.

Ko’alia hotu tiha ba Abraão, Na’i hadook AN tiha housi nia, Abraão fila ba nia uma.

Maromak Futar Lia.

 

Salmo Responsorial                                                                                                             Sal. 102(103). 1-2, 34, 8-9, 10-11 (R. 8ª)

Refrão : Na’i laran-luak no laran maus!!! Repete-se

Ha’u klamar hahi Na’i,

Ha’u an tomak hawélok nia naran santo.

Ha’u klamar hahi Na’i,

La haluha Nia kmanek tomak. Refrão

 

Na’i kasu ó salan tomak,

Nia perdua ó nia hahalok áat hotu;

Soi ó nia moris housi susar,

Haraik graça no rahun di’ak. Refrão

 

Na’i laran-luak no laran maus,

La hirus, perdua nafatin;

La haksi’ak no la kesar

La rai hirus ba nafatin. Refrão

 

Nia la haré ita tuir ita nia hahalok áat,

La selu ita tuir ita salan.

Nu’udar rai dook tebes housi lalehan,

Nune’e mós Nia laran maus tebes

Ba sira be hamta’uk Nia. Refrão

 

Aclamação                                                                                                                                                                              Sal. 94(95). 8ab

Refrão : Aleluia, Aleluia!! Repete-se

Ohin imi rona karik Na’i nia lian,

Keta taka imi nia fuan. Refrão

 

Evangelho                                                                                                                                                                                      Mt. 8. 18-22

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus haré tiha ema lubun boot hale’u Nia, Jesus haruka atu hakat liu ba tasi sorin balun ba.

Escriba ida mai hasouru Nia dehan: “Mestre, ha’u sei tuir Ita ba fatin hotu nebé Ita ba”. Jesus dehan ba nia; “Laku sira iha kuak, manu sira lalehan nian iha knuuk; maibé Oan Mane la iha fatin atu sadere nia ulun”.

Escolante ida fali hateten ba Nia: “Na’i, husik ha’u ba uluk lai hakoi ha’u nia aman”. Maibé Jesus hatan ba nia “Ó mai tuir Ha’u ba; husik mate sira hakoi sira nia mate”.

Lia Maksoyn.

Leave a Reply

Your email address will not be published. Required fields are marked *