shadow
Diocese de Dili > NOTÍCIAS > LETURA DIÁRIA > Terça – Feira, XIII Semana Tempo Comum (ANO C)

Terça – Feira, XIII Semana Tempo Comum (ANO C)

Primeira Leitura                  Gen. 19. 15-29

Lia housi livro Génesis:

Iha loron hirak nebá, Anjo sira be liu housi Lot nia uma husu barak ba nia hodi dehan nune’e: “Lori ó nia féen ho ó nia oan feto na’in rua nebé hela ho ó, sai lalais housi ne’e, atu la bele mate tan Sodoma nia salan. Haré ba katak nia sei laran rua-rua hela, Anjo sira káer iha sira liman, dada sai sira, basá, Na’i hakarak soi sira nia moris. Lori sira ba husik hela iha cidade nia liur.

Wainhira sira iha ona liur, Anjo ida dehan ba sira: “Halai, ó hakarak karik ó nia moris. Keta haré ba kotuk, keta demora iha fatin sira iha tetuk. Halai ba foho atu keta mate”. Lot hatan: “Ha’u Na’i ne’e lae! Tebes duni, Ita atan ha’u simu tulun boot tebes housi Ita, Ita halo tiha favor boot ida mai ha’u hodi soi ha’u nia moris. Maibé, ha’u la bele halai to’o foho molok susar ne’e monu mai ha’u leten no ha’u mate. Haré ba cidade nebá! Besik teb-tebes nebé bele halai ba no cidade nebá kiik. Husik ha’u halai ba nebá – kiik tebes karik – hodi soi ha’u moris”. Anjo hatan ba nia dehan: “Di’ak! Ha’u sei fó tan graça ne’e ba ó: ha’u sei la sobu no la harahun cidade nebé ó dehan.

Halai lalais ba nebá, basá, ha’u sei la halo buat ida wainhira ó la dauk to’o iha nebá”. Tan ne’e, mak sira fó naran Soar ba cidade ne’e.

Loron matan hahu mosu iha rai, wainhira Lot tama iha Soar. Tuir mai, Na’i haruka tun ba Sodoma no Gomorra nu’udar udan enxofre no ahi housi lalehan sunu hodi halo mohu cidade sira nebá; rai tetuk sira hotu. Maibé, Lot nia féen nebé hateke ba kotuk, nakfila tiha ba estatua masin nian.

Abraão, dadersan nakukun, hader, ba iha fatin nebé uluk nia hamriik ba iha Na’i nia oin. Nia hateke ba Sodoma no Gomorra no rai tetuk sira hotu rai nebá nian. Nia haré ahi suar sa’e housi rai hanesan ahi suar housi ahi matan boot.

Nune’e mak wainhira Na’i atu harahun cidade sira, Na’i hanoin Abraão hodi hasai Lot housi susar boot, wainhira harahun cidade sira nia hela ba.

Maromak Futar Lia.

 

Salmo Responsorial                                                                                                                                   Sal. 25(26). 2-3, 9-12 (R. 3ª)

Refrão : Na’i, Ita laran di’ak iha nafatin ha’u oin!!! Repete-se

Fihir ha’u ba, Na’i, hodi koko ha’u,

Hamós ba ha’u fuan no ha’u laran.

Ita laran di’ak iha nafatin ha’u oin,

Halo ha’u la’o tuir Ita lialós. Refrão

 

Keta halo ha’u klamar hamutuk ho maksalak sira,

No ha’u moris hamutuk ho ema liman mean sira.

Sira liman nakonu ho hahalok áat tebes,

Sira liman lós nakonu ho na’uk no bosok. Refrão

 

Ha’u la’o tuir lialós;

Soi ha’u no sadi’a ha’u!

Ha’u ain sama metin dalan lialós nian,

Ha’u sei hahi Na’i iha ema di’ak sira leet. Refrão

 

Aclamação                                                                                                                                                                               Sal. 129(130). 5

Refrão : Aleluia, Aleluia!! Repete-se

Ha’u laran metin iha Na’i,

Ha’u klamar fiar iha Nia liafuan. Refrão

 

Evangelho                                                                                                                                                                                      Mt. 8. 23-27

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus sa’e ba ró, hamutuk ho Nia escolante sira. Teki-tekir, tasi hahu si’ak maka’as, laloran tama makaas iha ró laran, maibé Nia toba dukur hela. Escolante sira hakbesik hodi fanun Nia dehan: “Na’i, soi ami, ami atu mate”. Jesus dehn ba sira: “Tansá imi ta’uk, imi sira fiar kiik?” Hafoin Nia hamriik hodi si’ak anin ho tasi, no buat hotu sai hakmatek. Sira hakfodak hodi dehan: “Ema ne’e sé lós, nebé anin ho tasi mó halo tuir de’it.

Lia Maksoyn.

Leave a Reply

Your email address will not be published. Required fields are marked *