shadow
Diocese de Dili > NOTÍCIAS > LETURA DIÁRIA > Quarta – Feira, XIII Semana Tempo Comum (ANO C)

Quarta – Feira, XIII Semana Tempo Comum (ANO C)

Primeira Leitura               Gen. 21. 5, 8-20

Lia housi livro Génesis:

Abraão iha tinan atus ida wainhira nia oan Isac moris. Kiik-oan ne’e boot ba daudaun hodi husik susu. Sara haré katak oan be Agar housi Egipto fó ba Abraão hasara Isac. Tan ba ne’e Sara dehan ba Abraão: “Duni sai tiha feto atan ne’e ho nia oan housi ne’e; atan nia oan la bele simu liman-rohan hamutuk ho ha’u nia oan Isac”. Liafuan hirak ne’e halo terus teb-tebes Abraão, tan nia oan Ismael. Maibé, Maromak dehan ba nia nune’e: “Ó keta neon sala tan kiik oan ne’e no tan ó nia atan feto. Halo tuir buat nebé Sara husu ba ó, basá, housi Isac mak ó sei hetan bei-oan ba ó nia naran. Atan nia oan mós Ha’u sei halo sai povo boot ida, basá, nia ó nia oan”. Dadersan de’it Abraão hamriik kedas, foti pão no wé kusi ida, fó ba Agar. Hafoin, tau kiik oan iha Agar nia kbás, hodi haruka sai housi nia uma.

Agar ho kiik oan Ismael, lao lemo iha rai fuik maran Bersabé nian. wainhira wé iha kusi horu ona, Agar hatoba hela kiik oan ne’e iha ai-hun badak ida nia okos, nia ba tur tiha iha fatuk tuda ida nia dook housi kiik oan ne’e nia oin. Nia hateten ba nia-an rasik: “Ha’u lakohi haré kiik oan ne’e mate iha ha’u nia oin”. Tan ne’e, nia ba tur dook tiha uitoan. Kiik oan ne’e hahu tanis maka’as.

Na’i rona kiik oan ne’e nia tanis, Maromak nia anjo ida bolu kedas Agar housi áas Lalehan nian, hodi dehan ba nia: “Ó hetan sá Agar? Ó keta ta’uk. Maromak rona kiik oan nia lian tanis housi fatin nebé nia hela ba. Hamriik ba, foti kiik oan, káer didiak iha nia liman, basá, ha’u sei halo moris housi nia povo boot ida. Maromak loke Agar nia matan, nia hare hetan wé inan ida. Nia ba kuru wé ne’e iha kusi hodi fó kiik oan hemu.

Maromak hamutuk ho kiik oan ne’e, no kiik oan ne’e boot daudaun. Nia hôrik iha rai-fuik maran hodi halo-an soro-na’in.

Maromak Futar Lia.

 

Salmo Responsorial                                                                                                                     Sal. 33(34). 7-8, 10-11, 12-13 (R. 7ª)

Refrão : Na’i rona ema kiak nia harohan!!! Repete-se

Ema kiak harohan, Na’i rona nia,

Soi nia housi laran susar hotu.

Na’i nia Anjo hatau sira be hamta’uk Nia,

No soi sira housi buat áat. Refrão

 

Hamta’uk Na’i ba, imi be fiar iha Nia,

Basá la kuran buat ida ba sira be hamta’uk Nia.

Kbiit na’in sira sai kiak no sei hamlaha;

Ba sira be buka Na’i, sei la kuran riku soi ruma. Refrão

 

Oan sira, hakbesik mai hodi rona ha’u,

Ha’u sei hanourin imi hamta’uk Na’i.

Ema sé mak la hadomi moris

Sé mak la hakarak loron barak ksolok nian? Refrão

 

Aclamação                                                                                                                                                                                             Tg. 1. 18

Refrão : Aleluia, Aleluia!! Repete-se

Aman Maromak hakiak ita housi liafuan lialós nian atu

Ita bele sai criatura hot-hotu nia ulun. Refrão

 

Evangelho                                                                                                                                                                                      Mt. 8. 28-34

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hakur liu ba tasi sorin balu ba. Wainhira nia to’o iha rai Gadarenos, ema na’in rua ho diabo iha laran mai housi rate hasouru Nia. Sira si’ak la di’ak, halo ema ida la bele liu housi dalan nebá. Teki-tekir sira hakilar. “Iha sáida ho Ó no ami, Jesus, Maromak Oan? Ó mai iha ne’e atu halo ami terus molok nia tempo?”

Besik iha nebá fahi lubuk ida han daudaun du’ut. Diabu sira husu ba Nia: “Ó duni sai ami karik, haruka ami tama ba fahi sira nebá”. Nia dehan ba sira: “Tama ba!” Sira sai no tama ba fahi sira laran; sira ne’e haksoit housi rai tatinis ba tasi hodi mate hotu iha wé laran. Fahi atan sira halai ba cidade hodi buat hotu ne’e, no mós kona ba buat nebé mosu ba ema nebé iha diabo iha laran. Cidade tomak sai mai hasouru Jesus. Wainhira sira haré Nia, sira husu Nia atu husik sira nia rai.

Lia Maksoyn.

Leave a Reply

Your email address will not be published. Required fields are marked *