shadow
Diocese de Dili > NOTÍCIAS > LETURA DIÁRIA > Quinta – Feira, XIII Semana Tempo Comum (ANO C)

Quinta – Feira, XIII Semana Tempo Comum (ANO C)

Primeira Leitura                Gen. 21. 5, 8-20

Lia housi livro Génesis:

Iha loron hirak nebá, Maromak koko Abraão hodi dehan ba nia: “Abraão!” Nia hatan: “Ha’u mak ne’e”. Maromak dehan: “Lori ó oan Isaac, ó oan mane mesak, nebé ó hadomi tebes, ba iha rai Moriá. Iha nebá ó sei oho hodi hasa’e nia iha foho nebé Ha’u sei hatudu ba ó”.

Abraão hader iha dadersan nakukun, sela tiha kuda burru, lori ho nia atan na’in rua ho nia oan mane Isaac no ai-sunu ba Sacrifício, hodi la’o ba fatin nebé Maromak hatudu ba nia. La’o tiha loron tolu, Abraão foti matan haré housi dook, fatin nebé Maromak hatudu. Nune’e, nia dehan ba atan sira: Imi hela iha ne’e ho kuda-burru. Ha’u ho labarik oan sei ba harohan iha nebá; hafoin ami sei fila hikas mai hamutuk ho imi”.

Abraão foti tiha ai-sunu Sacrifício nian hodi tau iha nia oan Isaac nia kbás. Tuir mai, Abraão lori iha liman ahi no tudik; sira rua hahu la’o. Isaac dehan ba nia aman Abraão: “Ha’u aman”. Abraão: “Ha’u mak ne’e, ha’u oan”. Isaac dehan teni: “Ita iha ahi no ai-sunu, maibé bibi Sacrifício iha nebé lós?” Abraão hatan: “Ha’u oan, Maromak sei halo mosu bibi ba Sacrifício”. Sira rua la’o hamutuk nafatin tuir dalan.

Wainhira to’o fatin nebé Maromak hatudu, Abraão hari Altar ida iha nebá, tau ai-sunu iha leten. Kesi tiha nia oan mane Isaac, tau nia iha Altar leten, housi ai-sunu leten. Hafoin, nia losu tudik atu oho nia oan.

Maibé, Na’i nia Anjo bolu housi Lalehan: “Abraão, Abraão!” Nia hatanL “Ha’u mak ne’e Na’i”. anjo dehan: “Keta tau liman ba labarik, keta halo buat áat ida ba nia. Oras ne’e ha’u hatene ona katak ó hamta’uk Maromak, basá, ó la karak ó nia oan mane”. Abraão foti matan, haré iha nia kotuk bibi-malae ida, dikur kesi hela iha ai-horis. Nia ba kore bibi ne’e hodi oho hasa’e iha nia oan mane nia fatin. Abraão hanaran fatin ne’e nune’e: ‘Na’i haraik ba’. Ohin loron mós ema sei dehan: ‘Iha foho nebé Na’i haraik ba’.

Na’i nia Anjo bolu teni Abraão housi Lalehan, hodi dehan: “Ha’u jura hodi Ha’u naran rasik – Na’i futar lia – tan ó di’ak hanesan ne’e, la karak ó nia oan mane mesak, Ha’u sei haraik bensa wa’in ba ó. Ha’u sei halo ó nia oan nia bei-oan sira sai wa’in hanesan fitun sira iha lalehan, hanesan rai-henek iha tasi ibun, ó nia bei-oan sira sei hadai funu baluk sira nia cidade sira hotu. Tan ó halo tuir Ha’u lian, nação sira hotu rai klaran nian sei simu bensa”.

Abraão fila hikas fali mai to’o nia atan sira. Sira la’o hamutuk ba Bersabé, iha fatin nebé nia hôrik ba.

Maromak Futar Lia.

 

Salmo Responsorial                                                                                                                   Sal. 114(115). 1-2, 3-4, 5-6, 8-9 (R. 9)

Refrão : Ha’u sei la’o nafatin iha Na’i futar oin iha ema moris sira rain!!! Repete-se

Ou           Aleluia!

Ha’u hadomi Na’i,

Tan Nia rona ha’u lian harohan;

Nia sée tilun mai ha’u

Iha loron be ha’u bolu Nia. Refrão

 

Sira kesi metin ha’u tali mate nian;

Sira hamonu ha’u leten laran terus rate nian.

Hare ba, ha’u laran susar no terus maka’as,

Nune’e, ha’u bolu Na’i:

“Na’i, soi ba ha’u klamar”. Refrão

 

Na’i mak lós no laran maus,

Ita Maromak laran-luak tebes;

Nia hatau ema haraik-an,

Wainhira ha’u kbiit laek, Na’i soi ha’u. Refrão

 

Hasai ha’u klamar housi mate,

Ha’u matan housi mata wén no ha’u ain housi sidi,

Ha’u sei la’o iha Na’i futar oin,

Iha ema moris sira rain. Refrão

 

Aclamação                                                                                                                                                                                        2Cor. 5. 19

Refrão : Aleluia, Aleluia!! Repete-se

Housi Cristo, Maromak  badame malu ho ita; Nia haruka

Ita hala’o knaar badame malu nian. Refrão

 

Evangelho                                                                                                                                                                                           Mt. 9. 1-8

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus sa’e tiha ró ida, hakur tasi hodi to’o ba Ninia cidade. Sira hatudu ba Nia ema isin maten ida, toba hela iha tobafatin. Haré tiha sira nia fiar, Jesus dehan ba ema moras ne’e: “Oan, barani ba, ó nia sala sira hetan ona perdua”. Escriba balun dehan iha sira nia laran: “Ema ne’e hateten áat Maromak”. Hatene tiha sira nia hanoin, Jesus dehan ba sira: “Tansá imi hanoin áat iha imi nia laran? Ida nebé mak lalais liu atu dehan: ‘Ó nia sala sira hetan tiha perdua’, ka dehan ‘Ó hamriik, la’o ba?’ Di’ak, atu imi hatene katak iha rai ne’e Oan Mane iha kbiit atu kasu sala”, Nia dehan ba ema isin maten: “Hamriik ba, foti ó nia hadak, la’o ba ó nia uma”. Nia hamriik hodi la’o ba nia uma. Haré tiha ne’e, ema lubun ta’uk teb-tebes hodi hasa’e glória ba Maromak nebé fó kbiit ida hanesan ne’e ba ema sira.

Sai tiha housi nebá, Jesus haré ema ida naran Mateus, tur hela iha fatin kobra imposto nian hodi dehan ba nia: “Tuir Ha’u mai!” Nia hamriik hodi tuir Jesus.

Lia Maksoyn.

Leave a Reply

Your email address will not be published. Required fields are marked *