shadow
Diocese de Dili > NOTÍCIAS > LETURA DIÁRIA > Sábado, XIII Semana Tempo Comum (ANO C)

Sábado, XIII Semana Tempo Comum (ANO C)

Primeira Leitura         Gen. 27. 1-5, 15-29

Lia housi livro Génesis:

Wainhira Isaac katuas tiha ona, nia matan sai malahuk hotu, la haré hetan buat ida. Nia bolu nia oan kaua’ik Esaú hodi dehan ba nia: “Ha’u oan”. Nia hatan ba nia aman: “Ha’u mak ne’e”. Isaak dehan: “Nu’udar ó haré, ha’u katuas ona; ha’u la hatene loron ha’u nia mate nian. Káer ó nia besi kroat, ó nia rama no rama isin hodi ba soro balada fuik ida lori mai, halo hahan di’ak ida mai ha’u tuir ha’u nia hakarak; lori hahan mai iha ne’e ha’u atu han hodi fó bensa ba ó wainhira ha’u sei moris”.

Rebeca rona hela Isaac koa’lia ba nia oan Esaú. Wainhira Esaú sai ba atu soro balada fuik ba nia aman, Rebeca ba hola Esaú nia roupa nebé di’ak liu iha uma, hodi fó hatais Jacob, nia oan be kiik. Hodi bibi kulit taka nia liman no kakorok. Hafoin, tau hahan nebé nia tein iha Jacob nia liman hodi lori ba nia aman Isaac.

Jacob hakbesik ba nia aman hodi dehan: “Ha’u aman”. Nia aman hatan: “Ha’u mak ne’e. ó sé, ha’u oan”. Nia dehan ba nia aman: “Ha’u, Esaú, ita oan kauaik. Ha’u halo buat nebé ita haruka ha’u halo. Ha’u husu ba ita atu hamriik, ba tur atu han ha’u nia hahan be mai housi soro, hodi haraik mai ha’u ita nia bensa”. Isaac dehan ba nia oan: “Ha’u oan oinsá ó ba soro hetan lalais de’it?” Nia hatan: “Na’i, ita nia Maromak mak tau iha ha’u oin”. Isaac dehan ba Jacob: “Ne’e sá, ó hakbesik mai ha’u atu ha’u káer iha ó nia isin hodi hatene katak ó ha’u oan Esaú ka lae”. Jacob hakbesik ba nia aman Isaac nebé káer nia dehan: “Lian Jacob nian, maibé liman Esaú nia. Tan nia liman fulun hanesan nia maun Esaú nian, nia aman Isaac la hatene didiak, fó tiha bensa ba nia. Maibé, nia husu tan fila fali ba nia: “Tebes duni ka, ó mak ha’u oan Esaú?” Nia hatan ba nia aman: “Ha’u duni”. Isaac hateten teni: “Lori ó nia hahan mai atu ha’u han hodi fó ha’u nia bensa ba ó”. Jacob hasa’e nia hahan ba nia aman; nia aman hahu han; lori tua mai nia aman, nia aman hemu tiha. Hafoin, nia aman Isaac dehan ba nia: “Ha’u oan hakbesik mai ha’u hodi fó rei ida mai ha’u”. Nia hakbesik ba hodi reni nia aman wainhira nia aman horon hatais nia moris, fó bensa ba nia hodi dehan:

“Ha’u haré katak ha’u oan nia morin hanesan morin housi rai nebé Na’i fó bensa ona. Na’i sei haraik maha-wen housi lalehan no riku-soi rai ne’e nian, trigo no tua wa’in ba ó. Nação hot-hotu sei serbi ó no povo tomak sei hakru’uk iha ó nia oin; ó sei sai boot iha ó nia maun-alin sira leet; ó inan nia oan sira sei hakru’uk iha ó oin. Ema nebé fó malisan ba ó, sei hetan malisan, ema nebé fó bensa ba ó, nia sei hetan rahun di’ak”.

Maromak Futar Lia.

 

Salmo Responsorial                                                                                                                         Sal. 134(135). 1-2, 3-4, 5-6 (R. 3ª)

Refrão : Hahi ba Na’i tan Nia di’ak!!! Repete-se

Ou           Aleluia!!

Hahí Na’i nia naran ba,

Hahí Ni aba, Na’i nia atan sira,

Imi be hôrik iha nia templo,

Iha ita Maromak nia uma oin. Refrão

 

Hahí Na’i tan Nia di’ak,

Hananu ba Nia naran tan laran maus.

Na’i hili Jacob,

Israel nu’udar nia liman-rohan. Refrão

 

Ha’u hatene katak Na’i boot tebes,

Ita nia Maromak boot liu maromak hot-hotu,

Buat hotu be Na’i hakarak, Nia halo,

Iha lalehan no iha rai, iha tasi no iha okos liu. Refrão

 

Aclamação                                                                                                                                                                                           Jo. 10. 27

Refrão : Aleluia, Aleluia!! Repete-se

Ha’u Nia bibi sira rona Ha’u lian, Na’i lia tun dehan;

Ha’u hatene sira, sira mai tuir Ha’u. Refrão

 

Evangelho                                                                                                                                                                                       Mt. 9. 14-17

Na’i Jesus Cristo nia Evangelho nu’udar São Mateus haktuir:

Iha tempo nebá, João Baptista nia escolante sira hakbesik ba Jesus dehan: “Tansá mak ami ho fariseu sira hadera an, maibé Ó nia escolante sira lae?” Jesus hatan ba sira: “Noivo nia belun sira bele luto wainhira noivo sei hela ho sira? Loron sei to’o mai wainhira ema sei hasai noivo housi sira le’et; iha loron nebá mak sira sei haderan an”.

Ema ida la bele taka hena tuan nia kuak ho hena foun, basá hena foun les hena tuan, halo kuak sai boot liu. Ema la tau tua foun iha kusi kulit tuan; la’e karik, kusi kulit nakfera, tua nakfakar no kusi kulit áat hotu. Tau tua foun iha kusi kulit foun; nune’e buat rua ne’e la lakon”.

Lia Maksoyn.

Leave a Reply

Your email address will not be published. Required fields are marked *