shadow
Diocese de Dili > NOTÍCIAS > LETURA DIÁRIA > Quarta – Feira, XIV Semana Tempo Comum (ANO C)

Quarta – Feira, XIV Semana Tempo Comum (ANO C)

Primeira Leitura      Gen. 41. 55-57; 42. 5-7ª, 17-24ª

Lia housi livro Génesis:

Iha loron hirak nebá, iha rai Egipto tomak hahu hamlaha, povo tomak hodi hakilar ba husu aihan ba Faraó. Nune’e, Faraó fó hatene ba ema hot-hotu housi Egipto hodi dehan: “Imi ba hasouru José hodi halo tuir buat nebé nia haruka”. Tan nação tomak hamlaha, José haruka loke uma hotu be haloot trigo, hahu faan trigo ba ema Egipto sira. Maski hamlaha ne’e sai maka’as iha rai Egipto. Ema housi rai selu-seluk mai iha Egipto atu sosa trigo iha José, basá, rai hot-hotu hamlaha boot.

Jacob mós haruka nia oan sira ba sosa trigo iha Egipto hamutuk ho ema housi rai selu-seluk, basá, iha rai Canaã mós hamlaha. Rai Egipto nia ukun iha José nia liman; nia mak fan trigo ba ema hot-hotu. Wainhira José nia maun sira to’o, sira tuku-tur hodi hakru’uk iha nia oin. José hatene kedas sira wainhira nia haré hetan sira, maibé, hakfudik hatudu-an hanesan ema leet, ko’alia maka’as ba sira hodi dadur tiha sira iha loron tolu nia laran.

Liu tiha loron tolu José dehan ba sira: “Imi sei halo tuir buat nebé ha’u haruka, atu imi bele moris, basá, ha’u ema ida nebé hamta’uk Maromak. Imi ema laran lós karik, imi ne’e ida sei hela nu’udar dadur iha fatin nebé imi hela daudaun ba. Imi sira seluk bele lori trigo ba atu imi nia familia sira keta hamlaha. Hafoin imi lori imi nia alin ikun ne’e mai, nu’udar sasin ba imi nia liafuan. Halo nune’e karik imi sei la mate”. Sira halo tuir buat nebé José haruka, no sira hahu ko’alia ba malu: “Tebes duni, oras ne’e mak ita selu todan ba buat nebé uluk ita halo ba ita nia alin José. Ita haré nia laran susar, wainhira nia husu perdua ba ita, ita la kohi rona nia. Tan ne’e, malisan ne’e monu mai ita leten. Ruben hatan ba sira: Ha’u la dehan ba imi atu imi keta halo buat áat ba kiik-oan? Maibé, imi la kohi rona ha’u; oras ne’e husu ona konta mai ita kona ba nia mate”. Sira la hatene katak José hatene hela sira ko’alia, tan José ko’alia ho sira housi durubasá. José hadook-an tiha housi sira hahú tanis. Hafoin, fila fali mai hamutuk ho sira hodi ko’alia ho sira.

Maromak Futar Lia.

 

Salmo Responsorial                                                                                                                    Sal. 32(33). 2-3, 10-11, 18-19 (R. 22)

Refrão : Na’i, ami hein iha Ita laran-luak!!! Repete-se

Ou           Na’i haraik Ita laran-luak mai ami, tan ami hein Ita!!

Hahí Na’i ho cítara,

Hananu ba Nia salmo ho harpa nia lian,

Hananu knananuk foun ida,

Hananu ho di’ak no ho klamar. Refrão

 

Na’i sobu fiar laek sira nia hanoin,

Halakon povo sira nia hakaran,

Na’i nia plano hela ba nafatin no

Nia fuan nia hanoin housi otas ba otas. Refrão

 

Na’i Nia matan fila ba sira be hamta’uk Nia,

Ba sira nebé hein iha Nia laran di’ak,

Atu hasai sira klamar housi mate,

No fó han ba sira iha tempo hamlaha. Refrão

 

Aclamação                                                                                                                                                                                            Mc. 1. 15

Refrão : Aleluia, Aleluia!! Repete-se

Maromak nia reino besik ona;

Imi hakribi salan no fiar iha Evangelho. Refrão

 

Evangelho                                                                                                                                                                                          Mt. 10. 1-7

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus bolu nia escolante sira na’in sanulu resin rua hodi fó kbiit ba sira atu duni sai espírito fo’er sira, no mós atu fó isin di’ak ba sira hotu nebé terus moras oi-oin. Apóstolo sira nia naran mak ne’e: ida uluk, Simão nebé ema hanaran Pedro, ho nia alin André; Tiago, Zebedeu nia oan, ho nia alin João; Filipe ho Bartolomeu, Tome ho Mateus publicano, Tiago, Alfeu nia oan. Ho Tadeu, Simão Cananeu ho Judas Iscariotes, nebé sei saran Nia.

Jesus haruka sira na’in sanulu resin rua ne’e la’o ba no hanourin hodi dehan: “Keta tuir gentio sira nia dalan, keta tama iha Samaritano sira nia cidade, maibé buka uluk bibi sira nebé lakon housi uma Israel nian. tuir dalan haklaken ba katak reino Lalehan besik ona”.

Lia Maksoyn.

Leave a Reply

Your email address will not be published. Required fields are marked *