shadow
Diocese de Dili > NOTÍCIAS > LETURA DIÁRIA > Segunda – Feira, XIV Semana Tempo Comum (ANO C)

Segunda – Feira, XIV Semana Tempo Comum (ANO C)

Primeira Leitura              Gen. 28. 10-22ª

Lia housi livro Génesis:

Iha loron hirak nebá, Jacob sai housi Bersabé hodi ba Harã. To’o tiha iha fatin ida, tan rai kalan ona, nia toba iha nebá. Nia hasai fatuk ida iha fatin ne’e tau iha nia ulun atu toba ba. Iha kalan nia mehi, Escada boot ida hahu iha rai to’o iha Lalehan. Housi escada ne’e Maromak nia Anjo sira tun mai rai no sa’e ba Lalehan. Teki-tekir, Na’i mosu ba nia hamriik iha nia oin, dehan: “Ha’u mak Na’i, Abraão, ó nia aman nia Maromak no Isaac nia Maromak. Rai nebé ó toba ba, Ha’u sei haraik ba ó no ba ó nia oan no bei-oan sira, sira sai wa’in liu hanesan rai-hun. Sira habelar ba loro-sa’e no loro-monu, ba tasi-feto to’o tasi-mane. Housi ó no ó nia bei-oan sira, povo hot-hotu iha mundo iha mundo rai-klaran sei simu bensa. Ha’u hamutuk ho ó nafatin; Ha’u sei bali ó iha fatin hotu nebé ó hakarak ba. Ha’u sei lori ó fila hi’as mai iha rai ne’e, basá, Ha’u sei la husik ó mesak wainhira Ha’u la da’uk halo buat nebé Ha’u hakotu ona ba ó”. Jacob hader housi mehi dehan ba nia-an rasik: “Tebes, Na’i iha duni fatin ne’e, maibé, ha’u seidauk hatene”. Ho ta’uk teb-tebes, nia dehan: “Fatin ne’e, fatin hamta’uk nian; iha ne’e mak Maromak nia uma no odamatan Lalehan nian!” Jacob hader dadersan de’it, káer fatuk nebé nia halo hanesan sumasu, hari tiha hanesan monumentu ida hodi fui tiha mina iha nia leten. Nia hanaran fatin ne’e Betel, maibé, naran houri uluk mak Luza.

Nune’e, Jacob halo promesa ida ne’e: “Maromak hela ho ha’u karik, bali ha’u no soi ha’u tuir dalan, Nia fó aihan no fó hatais mai ha’u karik, no halo ha’u fila hi’as ba ha’u aman nia uma iha hakmatek, Na’i sei sai ha’u nia Maromak. Fatuk nebé ha’u hari hela, sei sai Maromak nia uma ida”.

Maromak Futar Lia.

 

Salmo Responsorial                                                                                                                              Sal. 90(91). 1-4, 14-15ab (R. 2b)

Refrão : Na’i, ha’u Maromak, ha’u laran metin iha Itaboot!!! Repete-se

Ó be hôrik iha Aas liu tomak nia mahan,

Ó be hela iha Bele buat tomak nia lalatak,

Dehan ba Na’i: “Ita ha’u nia mahein no ha’u nia kota,

Ha’u nia Maromak, ha’u fiar iha Itaboot”. Refrão

 

Nia sei soi ó housi soro-na’in nia hani,

Housi terus áat liu,

Taka metin ho Nia fulun,

Iha Nia liras okos ó sei hetan mahan. Refrão

 

“Tan ó laran metin iha Ha’u, Ha’u sei soi ó,

Ha’u sei hatau ó tan ó hatene Ha’u naran.

Wainhira ó bolu Ha’u, Ha’u sei hatan,

Ha’u sei hamutuk ho ó iha laran susar”. Refrão

 

Aclamação                                                                                                                                                                                         2Tm. 1. 10

Refrão : Aleluia, Aleluia!! Repete-se

Jesus Cristo, ita nia Maksoyn, halakon mate;

Nia halo moris nabilan housi Evangelho. Refrão

 

Evangelho                                                                                                                                                                                      Mt. 9. 18-26

Na’i Jesus Cristo nia Evangelho nu’udar São Mateus haktuir:

Iha tempo nebá, wainhira Jesus ko’alia daudaun hela ba nia escolante sira, na’i ulun ida hakbesik ba Nia hodi monu ain iha Nia oin dehan: “Ha’u nia oan feto foin mate; maibé Ita boot hi’it An mai tau liman ba nia, nia sei moris”. Jesus hamriik hodi la’o tuir nia hamutuk ho escolante sira.

Iha oras nebá, feto ida nebé ran suli sai tinan sanulu resin rua ona, hakbesik ba Nia housi kotuk hodi kona Nia hatais ninin, basá Nia dehan iha nia laran: “Ha’u kona karik nia hatais, ha’u sei hetan isin di’ak”. Fila tiha ba kotuk, Jesus haré nia hodi dehan: “Ha’u nia oan, barani ba, ó nia fiar soi ona ó”. Iha oras nebá kedas, feto ne’e hetan fali isin di’ak.

Wainhira Nia to’o ba na’i ulun nia uma hodi haré ema huu flauta no ema barak seluk book an ba book an mai, Nia dehan; “Imi sai tiha, labarik la mate; nia toba de’it”. Sira hamnasa Nia. Wainhira ema lubun sai ona, Nia tama ba lara, káer labarik feto liman, no labarik feto ne’e hamriik. Liafuan kona ba buat ne’e naklekar iha rai tomak nebá.

Lia Maksoyn.

Leave a Reply

Your email address will not be published. Required fields are marked *