shadow
Diocese de Dili > NOTÍCIAS > LETURA DIÁRIA > Terça – Feira, XIV Semana Tempo Comum (ANO C)

Terça – Feira, XIV Semana Tempo Comum (ANO C)

Primeira Leitura                    Gen. 32. 22-32

Lia housi livro Génesis:

Iha loron hirak nebá, iha kalan Jacob hader, hola nia féen na’in rua, nia atan feto na’in rua hamutuk ho nia oan na’in sanulu resin ida; sira sai hodi la’o, hakur liu tiha mota Jacob nian. Nia tulun sira hotu hakur liu ba mota sorin ho nia sasan tomak. Jacob la’o mesa-mesak iha ikus tuir sira.

Ema ida mosu iha nia oin, sira na’in rua hahú hafunu malu to besik dader. Nia manan ema ne’e, maibé, ema ne’e baku Jacob nia kidan no tendão ida iha nia kidan naksalak tiha, wainhira nia hafunu ema ne’e. Ema ne’e dehan ba nia: “Ó husik ona ha’u atu ba ona, basá, rai naroman ona”. Maibé, Jacob hatan ba nia: “Ha’u sei la husik ó ba, wainhira ó la haraik bensa mai ha’u”. Ida seluk husu ba nia: “Ó naran sá?” Nia hatan ba ema ne’e: “Jacob”. Ema ne’e dehan ba nia: “Lae, houri ohin ba oin, ó naran la’os ona Jacob, maibé, Israel, tanba ó funu hasouru Maromak nia ema, ó iha kbiit atu tahan”. Jacob husu ba nia: “Ha’u husu ba ó atu hateten ó nia naran mai ha’u”. Maibé, ema ne’e hatan ba nia: “Tan sá ó husu ha’u naran?” Iha nebá kedas, nia haraik bensa ba Jacob.

Jacob hanaran fatin nebá Penuel “tanba – Nia dehan – Ha’u haré Maromak Nia futar oin no ha’u soi ha’u nia moris”. Loron matan sa’e ona wainhira Jacob husik Penuel. Nia la’o kude’ik hela tan tendão ida iha nia kidan naksalak. To’o ohin loron Israel oan sira la han tendão ida ne’e housi baluk kidan nian, tanba tendão ida ne’e iha Jacob nia kidan naksalak.

Maromak Futar Lia.

 

Salmo Responsorial                                                                                                                             Sal. 16(17). 1-3, 6-8b-15 (R. 15ª)

Refrão : Tan Ita laran di’ak, Na’i, ha’u hein atu haré Ita futar oin!!! Repete-se

Na’i, rona ha’u lian be justo,

Sée tilun mai ha’u nia harohan;

Rona ba ha’u nia hamulak,

Be ha’u halo ho laran tomak. Refrão

 

Ita sei tesi lia mai ha’u,

Basá, Ita matan haré borus liu.

Ita bele koko ha’u laran ho ahí,

Ita sei la hetan buat fó’er iha ha’u. Refrão

 

Maromak ha’u bolu Ita, Ita sei rona ha’u,

Sée tilun mai ha’u no rona ha’u liafuan;

Hatudu Ita laran-luak kmanek mai ha’u,

Ita soi sira be hamaha-an iha Ita sourin lós. Refrão

 

Hatau ha’u iha lalatak Ita liras nian,

Dook housi fiar laek sira be halo áat mai ha’u.

Ha’u buka Ita futar oin,

Keta hewai ha’u, habosu ha’u ho Ita ilas. Refrão

 

Aclamação                                                                                                                                                                                           Jo. 10. 14

Refrão : Aleluia, Aleluia!! Repete-se

Ha’u mak bibi-atan lós, Na’i lia tun, Ha’u hatene bibi sira nebé Ha’u nian!

Bibi sira nebé Ha’u nian hatene Ha’u! Refrão

 

Evangelho                                                                                                                                                                                      Mt. 9. 32-38

Na’i Jesus Cristo nia Evangelho nu’udar São Mateus haktuir:

Iha tempo nebá, ema lori ba Jesus ema monok ida ho diabo iha laran. Nia duni sai diabo, no ema monok ne’e ko’alia ona. Ema lubun hakfodak hodi dehan: “Ema ida ne’e seidauk haré buat ruma hanesan ne’e iha Israel”. Maibé fariseu sira dehan: “Hodi diabo sira nia ulun mak Nia duni sai diabo sira”.

Jesus la’o lemo cidade ho knua sira hodi hanourin iha sinagoga sira no haklaken liafoun di’ak reino nian; fó mós isin di’ak ba ema moras sira no ba sira hotu nebé terus. Haré tiha ema lubun boot, Nia hanoin teb-tebes sira basá sira kole no neon nakraik, hanesan bibi sira nebé bibi atan la iha. Tan ne’e Nia dehan ba escolante sira: “To’os boot duni, maibé serbisu na’in uitoan. Ne’e duni imi harohan ba to’os na’in atu haruka serbisu na’in sira ba nia to’os”.

Lia Maksoyn.

Leave a Reply

Your email address will not be published. Required fields are marked *