shadow
Diocese de Dili > NOTÍCIAS > LETURA DIÁRIA > Sábado, XIV Semana Tempo Comum (ANO C)

Sábado, XIV Semana Tempo Comum (ANO C)

Primeira Leitura              Gen. 49. 29-33; 50. 15-26ª

Lia housi livro Génesis:

Iha loron hirak nebá, Jacob hateten hela ba nia oan sira nune’e: “Ha’u atu ba ona hamutuk ho ha’u nia emar sira. Imi sei hakoi Ha’u hamutuk ho ha’u nia bei-ala sira iha rate nebé iha rai Efron, ema hitita nian. Rate ne’e hela besik rai Macpela, iha Mambre nia oin iha rai Canaã. Rai ne’e Abraão sosa housi Efron, ema hitita, ba cemitério. Iha nebá mak hakoi Abraão ho nia féen Sara; iha nebá hakoi Isaac ho nia féen Rebeca no mós iha nebá mak hakoi Lia. Rai no rate sira ne’e sosa housi Het nia oan sira”.

Hateten hela tiha liafuan hira ne’e ba nia oan sira, Jacob hasa’e nia ain ba toba fatin; hafoin, nia i’is kotu hodi ba halibur-an hamutuk ho nia emar sira. Haré ba katak sira nia aman mate ona, José nia maun sira hateten ba malu: “Oras ne’e José fila mai karik nia sei hasouru ita tan buat nebé ita halo ba nia?” Tan ne’e, sira haruka fó hatene ba nia nune’e: “Wainhira atu mate, ó nia aman fó hela lia menon ida ne’e mai ami: ‘Hodi ha’u naran, imi fó hatene ba José nune’e: Ha’u husu ba ó atu perdua ó nia maun sira nia salan hotu nebé sira halo hasouru ó’. Nune’e ho laran di’ak, oras ne’e ó perdua sala boot ne’e housi ó aman nia Maromak nia atan sira!” Wainhira rona liafuan hirk ne’e, José tanis teb-tebes.

Nia maun sira ba kedas hasouru nia, tuku-tur hodi dehan ba nia: “Ami hotu iha ne’e atu sai nu’udar ó atan”. Maibé, José hatan ba sira: “Imi keta ta’uk! Imi hanoin katak ha’u iha Maromak nia fatin? Uluk imi hanoin atu halo áat mai ha’u, maibé Maromak iha nia hakaran, hasai buat di’ak ne’e housi ne’e hodi halo buat di’ak nebé oras ne’e mosu, soi ema povo wa’in nia moris. Tan ne’e, imi keta ta’uk. Oras ne’e, ha’u mak sei tau matan ba imi no ba imi nia oan sira. Nune’e, nia haksolok sira nia fuan”.

José ho família sira nia aman nian, hela iha rai Egipto. José nia moris to’o tinan atus ida sanulu. Nia haré Efraim nia oan sira to’o derasan ba dala tolu no mós Maquir nia oan sira, Manassés nia oan sira bé nia simu iha nia ain tur leten wainhira sira moris. Ikus mai, José dehan ba nia maun sira: “Ha’u atu mate ona, maibé, Maromak sei mai tulun imi. Nia sei halo imi sai housi rai ne’e fila hikas ba rai nebé Nia hakotu hela ho juramento ba Abraão, ba Isaac no ba Jacob”. Tan juramento ne’e, nia dehan ba Israel oan sira: “Maromak sei mai tulun imi; nune’e, imi sei lori ha’u nia ruin sira housi ne’e. José mate ho tinan atus ida sanulu.

Maromak Futar Lia.

 

Salmo Responsorial                                                                                                        Sal. 104(105). 1-4, 6-7 (R. Sal. 68(69). 33)

Refrão : Imi be haraik-an, buka Na’i ba!!! Repete-se

Ou           Imi be kiak, buka Na’i ba, imi hetan moris!!

Agradece ba Na’i, hahi Nia naran,

Haklaken Nia hahalok iha povo sira leet.

Hananu ba Nia salmo no hino. Refrão

 

Hahí-an iha Nia naran Santo,

Fuan be buka Na’i, haksolok ba.

Hakbadak Na’I no Nia kbiit,

Buka nafatin Nia futar oin. Refrão

 

Bei-oan sira housi Abraão, Na’i nia atan,

Oan sira housi Jacob be Na’i hili nanis,

Nia mak Na’i, ita nia Maromak,

Ninia tesi lia mak lei iha rai tomak. Refrão

 

Aclamação                                                                                                                                                                                        1Ped. 4. 14

Refrão : Aleluia, Aleluia!! Repete-se

Ksolok ba imi wainhira ema hasara imi tan Cristo nia naran,

Basá Maromak nia Espírito hôrik ona iha imi. Refrão

 

Evangelho                                                                                                                                                                                    Mt. 10. 24-33

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hateten ba nia Apóstolo sira: “Escolante la bele boot liu fali mestre, atan la bele boot liu fali nia na’i. Escolante ida sai hanesan nia mestre to’o ona, no mós ba atan sai hanesan nia na’in. Ema hanaran uma na’in Belzebu karik, oin sá liu tan mak sira sei hanaran sira nebé hela iha nia uma laran! Ne’e duni, keta ta’uk sira ba, basá la iha buat nebé subar hela nebé ema sei la fó sai, eh buat nebé naksubar nebé ema sei la hatene. Buat nebé Ha’u dehan ba imi iha nakukun laran, imi sei fó sai iha naroman; buat nebé imi rona sub-subar de’it, imi sei haklaken housi uma nia kakuluk leten”.

“Keta ta’uk ema sira nebé oho isin lolon, maibé la bele oho klamar. Maibé ta’uk ba ida nebé bele halo lakon isin no klamar hotu iha inferno. Manu oan rua la fa’an ba doit ida? Maibé sira ida la monu ba rai wainhira imi Aman la husik. Imi nia fuuk iha ulun mós sura hotu. Ne’e duni, imi keta ta’uk, basá mi folin liu manu oan barak”.

“Ne’e duni, ema nebé fó sasin karik kona ba Ha’u iha ema seluk nia oin, Ha’u mós sei sasin kona ba nia iha Ha’u Aman nebé iha Lalehan nia oin. Maibé ema nebé heli lian Ha’u iha ema nia oin, Ha’u mós sei heli lian nia iha Ha’u Aman nebé iha Lalehan nia futar oin”.

Lia Maksoyn.

Leave a Reply

Your email address will not be published. Required fields are marked *