shadow
Diocese de Dili > NOTÍCIAS > REFLEXÃO > DEFENDE PARTIDO OU POVO?

DEFENDE PARTIDO OU POVO?

Leitura no Reflexão ba Domingo Comum XV, Ano C 2019

 

Primeira Leitura                 Deut. 30, 10-14

Lia housi Livro Deuterónomio:

Iha loron hirak nebá, Moisés dehan ba povo nune’e: ”Ó sei rona ó Na’in nia lian, ó nia Maromak; ó sei tuir nia hakaran no Nia ukun-fuan nebé hakerek tiha ona iha livro lei nian. Ho neon no laran tomak, ó sei fila ba Na’i, ó nia Maromak. Basá, ukun-fuan nebé nebé ohin ha’u fó ba ó, la todan resin ba ó, la susar ba ó. Ukun-fuan ne’e la rai iha lalehan, atu ó bele hateten: ‘Sé mak sei sa’e to’o lalehan, hodi ita nia fatin, atu ba hola livro lei nian, atu ita bele rona no moris tuir?’ Ukun-fuan ne’e mós la rai hela iha tasi-balu, atu ó bele dehan ‘Sé mak sei hakur tasi, atu ba hola livro ne’e, hodi ita nia fatin, atu ita bele rona no moris  tuir ukun-fuan ne’e?’ Basá, lia ne’e besik hela ó: nia iha ó nia ibun, iha ó bele moris”.

Maromak Futar Lia.

 

Salmo Responsorial                                                                                                                        Sal. 68(69), 14. 17. 30-31. 36ab-37

Refrão : Imi sira be ki’ak, buka Maromak, imi sei hetan moris!!! Repete-se

Na’i, ba Ita ha’u hasa’e ha’u nia hamulak,

Tan Ita domin, mai tulun ha’u.

Na’i, rona ha’u, tan Ita nia laran di’ak;

Tan Ita laran luak, see tilun mai ha’u. Refrão

 

Na’i, ha’u ema ki’ak, folin laek,

Ha’u hein Ita tahan ha’u.

Ha’u sei hananu hahí Maromak naran,

Ho laran ha’u sei haklaken Maromak beran. Refrão

 

Ema laran susar, rona mai hodi haksolok;

Buka Maromak, imi laran hetan iis foun.

Maromak rona ema ki’ak,

La hakribit ema moris susar. Refrão

 

Maromak soy Sião,

Sei harí fali cidade Judá.

Maromak nia emar sei simu nu’udar liman rohan iha nebá,

Sei moris ema nebé hadomi Maromak. Refrão

 

Segunda Leitura                                                                                                                                                                          Col. 1, 15-20

Lia housi São Paulo nia surat ba sarani sira iha Colosso:

Maun-alin sira: Jesus Cristo mak Na’i Maromak nebé ita la haré Nia futar ílas. Nia mak uluk liu criatura hotu-hotu. Tan Nia, Nia, Na’i Maromak haki’ak sasán tomak iha lalehan no rai, sasán nebé ita la hare, katak Anjo sira nebé tur iha trono, sira nebé ukun, Anjo sira nebé liurai, sira nebé liurai oan. Hodi Jesus Cristo, tan Jesus Cristo, Na’i Maromak haki’ak sasán tomak. Jesus Cristo uluk liu sasán tomak. Hodi Jesus Cristo, sasán tomak moris nafatin. Jesus Cristo, Kreda nia ulun, Kreda, Cristo nia isin lolon. Nia mak ulun, Nia mak uluk liu sasán hotu nebé moris hias. Ne’e duni, Nia uluk liu sasán hotu. Tan Na’i Maromak hakarak, rahun-di’ak tomak hela iha Nia. Wainhira Na’i Maromak dame fali ho ema, hodi Jesus Cristo nia ran fakar iha Cruz, Na’i Maromak hodi Cristo hakarak mós dame malu ho sasán hotu-hotu iha rai no iha lalehan.

Maromak Futar Lia.

 

Aclamaҫão                                                                                                                                                                                           Jo. 14, 23

Refrão : Aleluia!! Repete-se

Ema nebé hadomi Ha’u, sei rai Ha’u nia lia-fuan;

Ha’u Aman sei hadomi nia, ami sei hamutuk ho nia. Refrão

 

Evangelho                                                                                                                                                                                     Lc. 10, 25-37

Na’i Jesus Cristo nia Evangelho nu’udar São Lucas haktuir:

Iha tempo nebá, doutor lei nian ida hamriik hodi husu ba Jesus, atu koko Nia: “Mestre, ha’u sei halo sá, atu bele hetan moris rohan-laek?” Jesus hatán ba nia: “Iha lei hakerek sá ida? Sá mak ó haré iha nebá?” Doutor ne’e simu dehan: “Ó sei hadomi Na’i, ó nia Maromak, ho neon ho laran tomak, ho ó nia kbiit, ho ó nia hanoin tomak; ó sei hadomi ó nia maluk nu’udar ó-an rasik”. Jesus lia tan ba nia: “Ó hatan lós duni. Halo ida ne’e duni, ó sei hetan moris”. Maibé, tan nia hakarak souri an, nia hateten ba Jesus: “Maibé, sê mak ha’u nia maluk?” Jesus simu hodi dehan nune’e ba nia: “Ema ida tun housi Jerusalém ba Jericó. Ema ne’e mosu iha naok-ten sira liman. Naok-ten sira ne’e, hadau tiha nia sasán, baku tasak nia didi’ak; hafoin, sira tuir sira dalan, husik hela ema ne’e, besik atu mate. Sacerdote ida liu housi nebá: Haré tiha nia, sacerdote ne’e liu daudaun. Liu housi nebá, Levi nia oan ida: Levita ne’e mós, haré tiha ema ne’e, liu daudaun. Maibé, ema la’o rai ida housi Samaria, to’o besik ema ne’e, haré tiha, hanoin nia teb-tebes. Nia hakbesik ba ema ne’e, tau mina ho tua ba kanek sira, lori ba knuan ida, hodi haré didi’ak nia. To’o aban, Samaritano ne’e hasai osan rua fó ba uma na’in, hodi hateten ba nia: “Haré nia didi’ak! Buat ruma nebé ó lakon ho nia, ha’u fila mai sei selu hotu. Tuir ó hanoin, sira na’in tolu ne’e, ida nebé mak maluk ho ema nebé monu iha na’ok ten sira liman?” Doutor ne’e hatán: “Maluk mak ida nebé hanoin nia”. Jesus hatán ba nia: “Ba! Ó mós halo nune’e”.

Lia Maksoyn.

              

Reflexão:

DEFENDE PARTIDO OU POVO?

 

               Wainhira ano lectivo foun atu hahu dadaun ona? Haktuir katak; candidato universitária ida husi Papua atu ba Java hodi continua nia estudo. Wainhira tama tiha ona Roo laran, nia foin hakfodak katak; ninia pasta ho carteira nebé tau osan ema naok tiha ona. Naok ten ruma kal foti ona osan ho roupa nee wainhira nia tur dukur iha ro laran. Estudante Papua nee tur tanis deit ona tan nia la hatene atu halo saida.

               Iha estudante nee nia sorin, tur mos lider partido político ida nebé halao mos viagem ba Jakarta hodi halo consolidação. Rona tiha acontecimento nee, político nee fo coragem ba estudante nee hodi dehan katak; nia sei sugere ba managemento hodi aumenta tan agente segurança atu nuné labele mosu tan ema naok ten iha Roo laran no passageiro sira bele sente seguro liu tan.

               Iha fatin seluk, amu lulik ida mos sae Roo nee. Wainhira nia rona acontecimento osan lakon nee, amu lulik nee doko ulun hodi fo maldição ba naok ten nee. Amu nee mos encoraja estudante Papua nee katak nia sei reza ba estudante nee. Além de amu nee, senhora muçulmana ida mos hatais completo atributo Islam nian, iha hotu Roo nia laran. Haré estudante nee tanis tan nia osan lakon, senhora nee mos hanoin hetan kedas nia oan feto iha Jawa nebé quase idade hanesan ho estudante sorte aat nee. Tuir mai, senhora muçulmana nee hakbesik ba menina Papua nee hodi hamaus nia, hafoin fo Pop Mie. Wainhira too iha ponticais Jawa, senhora nee fo envelope ida ho osan oitoan iha laran ba menina nee ho lia menon katak:”oan, nee hau fo osan oitoan atu tulun o nia estudo”, hafoin senhora nee lori menina nee ba too iha kost molok nia fila. Senhora muçulaman nee ema diak ida.*

               Amarás ao Senhor teu Deus de todo o teu coração, e de toda a tua alma, e de todas as tuas forças, e de todo o teu entendimento, e ao teu próximo como a ti mesmo. Lucas 10,27

               Domingo semana nee, ita rona evangelista São Lucas haktuir ai-knanoik furak ida kona ba ema Samaria nebé laran luak. Molok nee, Evangelho relata katak, matenek nain lei nian ida (escriba) mai hasoru Jesus hodi husu condição oinsa bele hetan moris rohan laek. Jesus la fo resposta ba pergunta nee maibé, tan haré katak ema nee matenek nain ida, então Jesus husu fila fali nia kona ba saida mak nia lee no hatene ona husi lei judeu nian.

               Tuir mai, escriba nee hatan ba Jesus hodi recita fali livro Deuteronómio Capítulo 6, versículo 4-5 nebé dehan:” Escuta, Israel! O Senhor é nosso Deus; o Senhor é único! Amarás o Senhor, teu Deus, com todo o teu coração, com toda a tua alma e com todas as tuas forças”. Escriba nee mos recita fali tan livro Levítico 19,18:” Não te vingarás nem guardarás rancor aos filhos do teu povo, mas amarás o teu próximo como a ti mesmo. Eu sou o Senhor”. Citação rua nee bele resumo ba mandamento boot liu nebé hateten; Hadomi Maromak liu sasan hothotu no hadomi ema seluk hanesan ita-an rasik. Cita tiha capítulo husi livro rua nee, escriba nee hanoin Jesus atu louva nia maibé, afinal Jesus hatete ba nia:”ba no moris tuir buat nebé o temi ona, o sei hetan moris”.

               Nu’udar ema matenek, escriba ida nee mos buka maneira oinsa atu coloca no justifica nia-an nudar ema inteligente. Nuné, nia husu tenik ba Jesus; se mak hau nia maluk sira? dala ida tan Jesus la fo kedas resposta imediata maibé, Jesus haktuir ai-knanoik kona ba ema Samaria nebé laran luak ba ema judeu kanek todan no agonia hela tanba ema ataca nia iha dalan klaran. Ai-knanoik haktuir katak; iha ema nain tolu mak hare/hetan ema sorte aat nee. Ida uluk, nebé liu husi fatin neba mak nailulik ida nebé kalan-loron servi Maromak iha templo. Tanba nia knaar lulik nee, nuné nia so bele haré ema nee kanek nuné deit maibé, nia la kona ema nee basá, nee la saudável ba nia hodi servi Maromak (cf Nm 19,11-16). Ema segundo nebé haré ema nee mak Levita ida. Levita nee mos haré ema nee maibé, nia hasees-an tiha hodi lao liu deit tanba ema nee isin lolon mesak ran.

               Ema terceiro nebé haré ema kanek nee, ema Samaria ida nebé halao dau-daun ninia viagem. História hatudu katak; iha altura neba, Ema Judeu, sira ho ema Samaria inimigo ba malu. Ema Samaria mos adopta lei Moises nian maibé, sira mos iha opção rasik hodi tulun ema nebé precisa tulun. Tanba nee mak; wainhira ema Samaria hanesan ai-knanoik haktuir, nia fo tulun nafatin ba ema Judeu nebé kanek todan maske ema nee inimigo. Nia hasae ema nee ba nia kuda camelo, hasae didiak nia, hafoin fo ai moruk ba nia. Tuir mai, ema Samaria nee mos lori ema kanek nee ba losmen eh fatin aluga nebé besik hafoin promete atu selu hotu kedas ema kanek nee nia tusan.

               Iha ai-knanoik nia rohan, Jesus husu tenik ba escriba nee hodi dehan; entre ema nain tolu nee, se mak sai belun lolos? Ho firme escriba nee hatan ba Jesus; “ema nebé laran luak nee mak sai belun lolos”. Hafoin Jesus hatan kedas;”ba no halo tuir hanesan nee”.   

               Ai-knanoik nee interessante tebes ba ita nobun. Basá, horas nee ema barak gosta koalia mak barak maibé, la hatudu nia lia fuan iha hahalok moris. Maske Cristão hot-hotu hatene katak hadomi Maromak no maluk sira nudar ukun fuan principal maibé, problema mak sarani barak hatene kona ba ukun fuan nee maibé, barak liu la consegue halao iha moris. Horas nee balu ate sai indiferente (cuek) deit ho sira nia fiar nee. Balu foin hanoin hetan Maromak wainhira monu iha susar nia laran. Seluk tan fiar liu mehi do que fiar iha Maromak nia providência. Foin sae barak defende grupo arte marciais forte liu do que defende família, Político balu uza povo nia naran hodi ganha poder no hetan regalias estado ba necessidade privada ho partido do que bem comum. Matan naklosu ba facilidade estado, haluha tiha promessa tempo campanha. Promete campo de trabalho ba ema hotu maibé, kaer tiha ukun loke deit oportunidade ba partidário ho família uma laran. Moris Cristão nian nebé lolos precisa fo sinal (provas) iha realidade, laos husi capacidade hodi hatene lei caridade deit maibé, precisa mos capacidade hodi prática eh aplica lei caridade (hukum cinta kasih) nebé Jesus haruka.

               Nuné, pergunta escriba nebé dehan; “se mak hau nia maluk sira?” sai hanesan questão principal nebé Cristão ida-idak hasoru iha moris. Ita laos hatene deit se mak hau nia maluk maibé problema mak oinsa ita sai maluk ba ema seluk iha ita nia comunidade. Ema Samaria iha Evangelho nee hetan louva husi Jesus tanba fo-an hodi tulun ema judeu nebé tuir los nia inimigo. Jesus iha perícope Evangelho nee hakarak expressa deit katak nia mak bom Samaritano nee. Jesus mak ema seluk nebé fo nia-an ba humanidade tomak nebé hetan terus tan pecado.

               Sai ema ba ema seluk (to be man & women for others) mak vontade Maromak nian nebé haktadak ba ema ida-idak. Maromak mak domina seres vivos sira hotu iha mundo nee hodi coloca selo (meterai) domin iha ema ida-idak nia fuan. Selo domin nee halo desenvolve iha domin no ita hetan kbiit hodi hadomi Maromak no hadomi ita nia maluk sira. Selo nee mos mak tulun ita hetan progresso hodi sai ema ba ema seluk eh ita nia maluk sira.

               Iha primeira leitura husi livro Deuteronómio ita rona ona oinsa Moises bolu atenção eh consciencializa povo Israel sira katak Maromak nia futar lia fuan sempre horik iha ema nia fuan..  Tanba nee mak Moises fo hanoin katak povo sira precisa rona Maromak nia lia fuan no kaer metin Lia Fuan nee ho fuan no laran tomak. Maromak nia Lia Fuan besik duni ho ema katak horik iha ibun laran no fuan hodi bele aplica iha moris.

               São Paulo iha segunda leitura justifica ba sarani Colossense sira katak; buat hot-hotu cria iha Cristo no ba Cristo. Se mak Jesus Cristo refere? Nia mak plenitude Maromak nian. Jesus Cristo mak Ilas husi Maromak nebé ita la haré. Jesus dehan; “se mak haré Hau, nia haré Hau Aman”. Jesus mak mane ulun. Jesus kmanek liu criatura sira seluk. Hodi Jesus mak buat hotu mosu. Jesus uluk liu buat hot-hotu no buat hot-hotu mosu tanba Nia. Iha Jesus hori paz (dame) entre ema ho Maromak liu husi ran nebé Jesus fakar iha Cruz tutun.

               Evangelho Domingo semana nee, bolu ita nia atenção hodi bele hafoun-an iha Cristo atu ita bele rona no halo tuir buat nebé ita rona. Jesus hakarak ita imita nia lia fuan nebé hatuur iha ai-knanoik nee. Lei caridade laos buat nebé horik iha ibun deit maibé, precisa prática iha moris nudar Cristão Católica. Laos rona deit maibé, rona hodi halo tuir atu nuné, ita bele sai ema ba ema seluk (to be men & women for others). Ita harohan ba Maromak atu tulun ita realiza mehi sai ema ba ema seluk. A pior coisa que pode acontecer a um ser humano é ele se enclausurar dentro do próprio ego. É viver alheio ao sofrimento do próximo. É viver apenas para sua própria satisfação.” Assim seja e Bem Haja. (ignaslopes).

Leave a Reply

Your email address will not be published. Required fields are marked *