shadow
Diocese de Dili > NOTÍCIAS > LETURA DIÁRIA > XV Domingo Tempo Comum (ANO C)

XV Domingo Tempo Comum (ANO C)

Primeira Leitura                 Deut. 30, 10-14

Lia housi Livro Deuterónomio:

Iha loron hirak nebá, Moisés dehan ba povo nune’e: ”Ó sei rona ó Na’in nia lian, ó nia Maromak; ó sei tuir nia hakaran no Nia ukun-fuan nebé hakerek tiha ona iha livro lei nian. Ho neon no laran tomak, ó sei fila ba Na’i, ó nia Maromak. Basá, ukun-fuan nebé nebé ohin ha’u fó ba ó, la todan resin ba ó, la susar ba ó. Ukun-fuan ne’e la rai iha lalehan, atu ó bele hateten: ‘Sé mak sei sa’e to’o lalehan, hodi ita nia fatin, atu ba hola livro lei nian, atu ita bele rona no moris tuir?’ Ukun-fuan ne’e mós la rai hela iha tasi-balu, atu ó bele dehan ‘Sé mak sei hakur tasi, atu ba hola livro ne’e, hodi ita nia fatin, atu ita bele rona no moris  tuir ukun-fuan ne’e?’ Basá, lia ne’e besik hela ó: nia iha ó nia ibun, iha ó bele moris”.

Maromak Futar Lia.

 

Salmo Responsorial                                                                                                                        Sal. 68(69), 14. 17. 30-31. 36ab-37

Refrão : Imi sira be ki’ak, buka Maromak, imi sei hetan moris!!! Repete-se

Na’i, ba Ita ha’u hasa’e ha’u nia hamulak,

Tan Ita domin, mai tulun ha’u.

Na’i, rona ha’u, tan Ita nia laran di’ak;

Tan Ita laran luak, see tilun mai ha’u. Refrão

 

Na’i, ha’u ema ki’ak, folin laek,

Ha’u hein Ita tahan ha’u.

Ha’u sei hananu hahí Maromak naran,

Ho laran ha’u sei haklaken Maromak beran. Refrão

 

Ema laran susar, rona mai hodi haksolok;

Buka Maromak, imi laran hetan iis foun.

Maromak rona ema ki’ak,

La hakribit ema moris susar. Refrão

 

Maromak soy Sião,

Sei harí fali cidade Judá.

Maromak nia emar sei simu nu’udar liman rohan iha nebá,

Sei moris ema nebé hadomi Maromak. Refrão

 

Segunda Leitura                                                                                                                                                                          Col. 1, 15-20

Lia housi São Paulo nia surat ba sarani sira iha Colosso:

Maun-alin sira: Jesus Cristo mak Na’i Maromak nebé ita la haré Nia futar ílas. Nia mak uluk liu criatura hotu-hotu. Tan Nia, Nia, Na’i Maromak haki’ak sasán tomak iha lalehan no rai, sasán nebé ita la hare, katak Anjo sira nebé tur iha trono, sira nebé ukun, Anjo sira nebé liurai, sira nebé liurai oan. Hodi Jesus Cristo, tan Jesus Cristo, Na’i Maromak haki’ak sasán tomak. Jesus Cristo uluk liu sasán tomak. Hodi Jesus Cristo, sasán tomak moris nafatin. Jesus Cristo, Kreda nia ulun, Kreda, Cristo nia isin lolon. Nia mak ulun, Nia mak uluk liu sasán hotu nebé moris hias. Ne’e duni, Nia uluk liu sasán hotu. Tan Na’i Maromak hakarak, rahun-di’ak tomak hela iha Nia. Wainhira Na’i Maromak dame fali ho ema, hodi Jesus Cristo nia ran fakar iha Cruz, Na’i Maromak hodi Cristo hakarak mós dame malu ho sasán hotu-hotu iha rai no iha lalehan.

Maromak Futar Lia.

 

Aclamaҫão                                                                                                                                                                                           Jo. 14, 23

Refrão : Aleluia!! Repete-se

Ema nebé hadomi Ha’u, sei rai Ha’u nia lia-fuan;

Ha’u Aman sei hadomi nia, ami sei hamutuk ho nia. Refrão

 

Evangelho                                                                                                                                                                                     Lc. 10, 25-37

Na’i Jesus Cristo nia Evangelho nu’udar São Lucas haktuir:

Iha tempo nebá, doutor lei nian ida hamriik hodi husu ba Jesus, atu koko Nia: “Mestre, ha’u sei halo sá, atu bele hetan moris rohan-laek?” Jesus hatán ba nia: “Iha lei hakerek sá ida? Sá mak ó haré iha nebá?” Doutor ne’e simu dehan: “Ó sei hadomi Na’i, ó nia Maromak, ho neon ho laran tomak, ho ó nia kbiit, ho ó nia hanoin tomak; ó sei hadomi ó nia maluk nu’udar ó-an rasik”. Jesus lia tan ba nia: “Ó hatan lós duni. Halo ida ne’e duni, ó sei hetan moris”. Maibé, tan nia hakarak souri an, nia hateten ba Jesus: “Maibé, sê mak ha’u nia maluk?” Jesus simu hodi dehan nune’e ba nia: “Ema ida tun housi Jerusalém ba Jericó. Ema ne’e mosu iha naok-ten sira liman. Naok-ten sira ne’e, hadau tiha nia sasán, baku tasak nia didi’ak; hafoin, sira tuir sira dalan, husik hela ema ne’e, besik atu mate. Sacerdote ida liu housi nebá: Haré tiha nia, sacerdote ne’e liu daudaun. Liu housi nebá, Levi nia oan ida: Levita ne’e mós, haré tiha ema ne’e, liu daudaun. Maibé, ema la’o rai ida housi Samaria, to’o besik ema ne’e, haré tiha, hanoin nia teb-tebes. Nia hakbesik ba ema ne’e, tau mina ho tua ba kanek sira, lori ba knuan ida, hodi haré didi’ak nia. To’o aban, Samaritano ne’e hasai osan rua fó ba uma na’in, hodi hateten ba nia: “Haré nia didi’ak! Buat ruma nebé ó lakon ho nia, ha’u fila mai sei selu hotu. Tuir ó hanoin, sira na’in tolu ne’e, ida nebé mak maluk ho ema nebé monu iha na’ok ten sira liman?” Doutor ne’e hatán: “Maluk mak ida nebé hanoin nia”. Jesus hatán ba nia: “Ba! Ó mós halo nune’e”.

Lia Maksoyn.

Leave a Reply

Your email address will not be published. Required fields are marked *