shadow
Diocese de Dili > NOTÍCIAS > LETURA DIÁRIA > Segunda – Feira, XV Semana Tempo Comum (ANO C)

Segunda – Feira, XV Semana Tempo Comum (ANO C)

Primeira Leitura                   Ex. 1. 8-14, 22

Lia housi Livro Êxodo:

Iha loron hirak nebá, foti tiha iha Egipto liurai foun ida, nebé la hatene José. Nia dehan ba nia povo: “Imi haré ba, oinsá povo Israel sai boot no maka’as liu ita! Nune’e, houri ohin ba oin, ita ba buka dalan atu tahan sira nia moris atu la bele sai wa’in liu tan. Iha funu ruma mosu karik, sira bele libur hamutuk ho ita nia funu baluk sira hodi hafunu hasouru ita, no sira bele husik hela rai ne’e. Nune’e hahu tau lia ba ulun sira serbisu nian atu obriga Israel oan sira halo serbisu todan. Nia haruka hari ba farão cidade Pitom no Ramsés nu’udar cidade armazenagem nian, maibé, maski sira halo serbisu todan, sira hetok sai wa’in no maka’as liu tan. Nune’e, ema Egipto sira lori sira halo serbisu mesak todan, halo sira nia moris terus wa’in; obriga sira ke’e tahu, halo tijolo, halo serbisu oi-oin iha natar eh to’os, no serbisu selu-seluk be todan tau ba sira leten.

Farão fó ordem ne’e ba nia povo tomak: “Soe tuir tiha ba mota, Israel oan mane sira nebé moris, maibé, husik moris hela sira nia oan feto sira”.

Maromak Futar Lia.

 

Salmo Responsorial                                                                                                                          Sal. 123(124). 13, 4-6, 7-8 (R. 8b)

Refrão : Ita nia tulun iha Na’i Nia naran!!! Repete-se

Na’i la hela hamutuk karik ho ita,

Israel dehan ba:

Na’i la hela hamutuk karik ho ita,

Ema sira nebé hamriik hasouru ita,

Han moris de’it ita ona,

Iha sira laran nakali hasouru ita. Refrão

 

Nune’e, ita mout iha wé laran

Wé boot lori ita ba tasi;

Laloran boot baku ona ita leten,

Rahun di’ak ba Na’i,

Nebé la husik ita nu’udar ai han

Ba sira nia dehan. Refrão

 

Ita soy ita nia moris

Hanesan manu-fuik soi-an housi hani caçador nian,

Hani tohar tiha no ita soi an.

Ita nia tulun iha Na’i nia naran,

Nebé hakiak lalehan no rai. Refrão

 

Aclamação                                                                                                                                                                                            Mt. 5. 10

Refrão : Aleluia, Aleluia!! Repete-se

Ksolok ba sira nebé ema duni tan hadomi justiça,

Basá reino Lalehan sira nian. Refrão

 

Evangelho                                                                                                                                                                          Mt. 10. 34-42-11. 1

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hateten ba Nia Apóstolo sira: “Imi keta hanoin katak Ha’u lori dame mai iha rai. Ha’u mai la lori dame, maibé, surik. Basá, Ha’u mai atu hakfahek imi: oan mane hasouru aman, oan feto hasouru inan, feto foun hasouru banin feto; ema nia família rasik sai nia funu baluk sira.

Ema nebé hadomi nia aman eh nia inan liu fali Ha’u, nia la’os Ha’u nian. Ema nebé hadomi nia oan mane eh nia oan feto liu fali Ha’u, nia la’os Ha’u nian. Ida nebé la simu nia cruz hodi la’o tuir Ha’u, nia la’os Ha’u nian. Ida nebé buka nia moris, nia sei lakon moris ne’e; ida nebé lakon nia moris tan Ha’u, nia sei hetan moris ne’e.

Ema nebé simu imi, simu ida nebé haruka Ha’u mai. Ida nebé simu profeta ida tan nia profeta, nia sei simu kolen profeta nian; ema nebé simu ema di’ak ida, tan nia ema di’ak, nia sei simu kolen ema di’ak nian.

Ida nebé fó hemu maski wé malirin copo ida ba kiik oan sira ne’e ida, tan nia Ha’u nia escolante, Ha’u dehan tebes ba imi: nia sei la lakon nia kolen’. Hanourin tiha nia escolante na’in sanulu resin rua, Jesus sai housi nebá, hodi ba hanourin no haklaken iha ema sira nebá nia cidade.

Lia Maksoyn.

Leave a Reply

Your email address will not be published. Required fields are marked *