shadow
Diocese de Dili > NOTÍCIAS > LETURA DIÁRIA > Terça – Feira, XV Semana Tempo Comum (ANO C)

Terça – Feira, XV Semana Tempo Comum (ANO C)

Primeira Leitura                        Ex. 2. 1-15ª

Lia housi Livro Êxodo:

Iha loron hirak nebá, mane ida housi uma-kain Levi nian káben ho feto foin sa’e ida, mós housi uma-kain Levi nian. Feto ne’e kô’us no tur ahi oan mane ida, nebé kmook tebes, tan ne’e nia subar tiha nia, iha fulan tolu nia laran. Maibé, tan nia la bele subar ba tempo kleur, nia halo ta’an ho soko, taka nia ko’ak ho bitume no ai ben. Hafoin, nia hatoba ki’ik oan iha laran, hodi tau iha onu naruk laran, iha mota nini. Ki’ik oan ne’e nia feton housi dook hafuhu hela atu haré buat sá mak sei mosu ba ki’ik oan ne’e.

Farão nia oan feto tun ba mota, atu haris; nia atan feto sira nebé ba ho nia, la’o tuir mota ninin. Nune’e, nia haré hetan ona ta’an iha onu laran, Loke ta’an, nia haré hetan ki’ik oan nebé tanis hela. Nia hanoin netik ki’ik oan ne’e hodi hateten: “Hebreu sira nia oan ida”. Ki’ik oan ne’e nia feton dehan ba farão nia oan feto: “Ita hakarak ha’u ba buka feto ida housi feto hebreu nia leet atu mai fó susu ba nia?” Farão nia oan feto hateten ba nia: “Ba!” Ki’ik oan nia feton ba bolu kedas nia inan rasik. Farão nia oan feto dehan ba nia: “Ó lori ki’ik oan ne’e ba hakiak ba ha’u, ha’u rasik mak sei selu ó nia kolen”. Nune’e, feto ne’e lori kedas ki’ik oan ba nia uma hodi fó susu. Wainhira ki’ik oan ne’e boot ona, nia lori hi’as mai hodi entrega ba farão nia oan feto, nebé simu ki’ik oan ne’e hanesan nia oan no hanaran nia, Moisés, basá, nia dehan: “Ha’u hasai nia housi wé”.

Iha loron ida, wainhira nia boot ona, Moisés ba haré ema sira nebé lor-loron halo serbisu todan. Nia haré mós ema Egipto ida baku nia maluk ema hebreu ida. Nia hateke ba mai, haré ba katak egípcio ne’e mesak, oho tiha nia hodi hakoi subar tiha iha rai henek laran. Iha loron tuir mai, Moisés fila hikas mai, nia haré ema hebreu na’in rua baku malu. Nia dehan ba ida nebé sala: “Tan sá ó baku ó nia maluk?” Maibé nia hatan ba Moisés: “Sé mak foti ó ba ami na ulun eh juiz?”. Moisés ta’uk teb-tebes hodi dehan ba nia-an rasik: “Tebes, buat ne’e ema hatene ona!” Farão hatene ona katak Moisés oho egípcio ida, tan ne’e nia buka atu oho tiha Moisés. Nune’e, Moisés halai dook housi nia, hodi subar-an iha Madiá.

Maromak Futar Lia.

 

Salmo Responsorial                                                                                                         Sal. 68(69). 3, 14, 30-31, 33-34 (R. cf. 33)

Refrão : Imi be kiak, buka Maromak, imi sei hetan moris!!! Repete-se

Ha’u mouut iha tahu naruk laran,

Ha’u ain la hamriik metin;

Ha’u tama to’o wé kle’an nia okos,

No laloran halo ha’u mouut. Refrão

 

Na’i, ba Ita ha’u hasa’e ha’u nia hamulak,

Iha tempo Ita sée tilun mai, ha’u Maromak.

Na’i, rona ha’u, tan Ita Nia laran di’ak,

Tan Ita laran-luak, ha’u hein Ita maksoyn. Refrão

 

Na’i, ha’u ema kiak no folin laek,

Souri ha’u, oh! Maromak, ho Ita Nia kbiit.

Ha’u sei hananu hahí Maromak naran,

Ho laran ha’u sei haklaken Maromak beran. Refrão

 

Imi be haraik an, rona mai hodi haksolok,

Buka Maromak, imi laran sei hetan kbiit foun.

Maromak rona ema kiak sira,

La hakribi ema be moris susar laran. Refrão

 

Aclamação                                                                                                                                                                              Sal. 94(95). 8ab

Refrão : Aleluia, Aleluia!! Repete-se

Ohin imi rona karik Na’i Nia lian,

Keta taka imi nia fuan. Refrão

 

Evangelho                                                                                                                                                                                     Mt. 11. 20-24

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus haksiak maka’as cidade sira iha nebé halo nia Milagre barak liu tan sira la laran moras ba sira salan.

“Susar ba ó, Corazim! Susar ba ó, Betsaida! Basá milagre sira nebé halo ona iha imi leet, halo tiha karik iha Tiro no Sidónia, kleur tiha ona, sira hakribi sala hodi hatais karon no ho ahikdesan. Tan ne’e, Ha’u dehan ba imi katak iha loron justiça nian castigo ba Tiro no Sidónia sei kmaan liu fali imi nian. Ó fali, Cafarnaum, ó hakarak foti an to’o lalehan? Ó sei monu to’o inferno! Basá milagre sira nebé halo ona iha ó halo tiha karik iha Sodoma, to’o ohin Sodoma sei hamriik hela. Tan ne’e, Ha’u dehan ba imi katak iha loron justiça nian castigo ba Sodoma sei kmaan liu fali ó”.

Lia Maksoyn.

Leave a Reply

Your email address will not be published. Required fields are marked *