shadow
Diocese de Dili > NOTÍCIAS > Notícias > PARÓQUIA LETEFOHO CELEBRA BODAS DE PRATA

PARÓQUIA LETEFOHO CELEBRA BODAS DE PRATA

DCDD iha loron 16 fulan Julho tinan 2019 liburan hamutuk sarani rihun housi Paróquia Nossa Senhora do Carmo Letefoho hodi comemora existência ba dala 25 Paróquia ne’e moris. Comemoração ne’e hahu ho missa Solene ne’ebe Preside housi Bispo de Dili Dom. Virgílio do carmo da Silva hamutuk ho Padre concelebrante hamutuk 40 resin.

 Iha biban celebração 25 anos Paróquia nian ne’e Bispo de Dili Dom. Virgílio do Carmo da Silva hateten, Durante loron 6 hela iha Letefoho, ha’u compreende no hatene buat barak liu tan kona ba realidade Letefoho nian. Tinan 25 laos saugate tanba sarani no família sira bele oferece oan ba Nailulik hamutuk nain 19 no Madre hamutuk 94. Ida ne’e número ida ne’ebe boot teb-tebes iha Diocese Dili nian. Tan ne’e Diocese Dili nu’udar Bispo laiha buat ida ne’ebe boot liu atu fo, maibe hakarak atu agradece teb-tebes tanba vocação iha rai Letefoho buras tanba família sira mak cria ambiente ne’ebe diak. Padre, Madre sira ne’e barak mos agora sai missionário iha rai seluk. laos café de’it mak nia naran morin, maibe Letefoho nia naran morin iha rai seluk tanba fiar iha vocação.

Dom. Virgílio haforsa tan katak, hare ba Iha buat balun ne’ebe ha’u descobre tan iha ne’e mak fiar sarani Letefoho ninian ne’e

maduro tebes. Ida ne’e hatudu housi Capela Talala nian, muro ne’ebe iha Paróquia ne’e, rehabilitação ba iha Estátua Cristo Liurai ninian, ne’e hotu hatudu teb-tebes katak sarani Letefofo rasik sente duni katak ida ne’e imi nian, imi nia Uma Creda, imi halo atu imi uza. Iha tinan 25 imi hatudu duni katak Igreja Letefoho ne’e laos amululik nian, maibe Igreja ne’e ita boot sira nian. Ne’e duni imi nia Igreja ba, haburas mos ho imi nia hahalok.

Iha sorin seluk Pároco Paróquia Nossa Senhora do Carmo Letefoho Pe. Helio Pereira Fernandes hateten, Ami hahu actividades ida ne’e iha 16 Julho de 2018 hodi lori Nain Feto visita ba iha Aldeias hamutuk 67 iha suco 8 nian laran. Iha visita ida ne’e mos ami la’o ho mata dalan ida  katak “Ó NIA INAN MAK IDA NE’E”. Liafuan ida ne’e mak insipira ami hodi halo ami nia actividades pastoral durante tinan tomak ida nia laran.

Programa ida seluk mak visita pastoral conjunto ho autoridade sira, Militar, saúde no Departamento sira seluk iha Posto Administrativo nian, membro Conselho Paroquial ho Comissão Organizadora la’o ba visita povo sarani kona ba sira nia preucupação iha isin lolon no kona ba sira nia klamar. Além ne’e, ami organiza arte e cultura atu nune’e bele hasae jovem sira nia capacidade iha area música no atividade ida ikus nian mak Infraestrutura. Buat hotu nebe ami halo ne’e, ami sukat ba ami nia capacidade económica ami labele, maibe ami continua tau iha Plano. Ikus mai to’o iha tinan ne’e nia rohan buat hot-hotu bele la’o no plano hirak ne’ebe ami traça consegue realiza duni.  No buat hotu housi ida ne’e, ami nia reflexão mak ida nee; buat sira ne’e bele realiza laos tanba ami nia força, maibe Aman Maromak iha leten hamahan ami no Nain Feto nia harohan daet milagre acontese iha Letefoho iha tinan ida ne’e.

Iha biban hanesan, Pe. Brain housi Paróquia Sydney Australia nebe participa mos iha celebração aniversário Paróquia Letefoho nian ba dala 25 iha nia mensagem hateten, Australia riku tebes economia mas la riku kona ba fiar. Timor-Leste riku tebes kona ba fiar mas kona ba economia suficiente hela. Ha’u reza katak Austrália continua riku iha economia no kona ba fiar precisa hasae. Kona ba Timor-Leste riku ba fiar continua sae ba leten, maibe riku economia mos precisa sae ba leten. Hia Letefoho ita kuda modo ita han, kuda café ita hemu, maibe importante mos ita kuda ita nia fiar. Paróquia Sydney sira pronto atu suporta iha parte educação nian iha Paróquia Letefoho, maibe mos nafatin continua suporta nafatin ita nia oan sira fiar. (Equipa DCDD)

Leave a Reply

Your email address will not be published. Required fields are marked *