shadow
Diocese de Dili > NOTÍCIAS > LETURA DIÁRIA > Sexta – Feira, XV Semana Tempo Comum (ANO C)

Sexta – Feira, XV Semana Tempo Comum (ANO C)

Primeira Leitura               Ex. 11. 10-12. 14

Lia housi Livro Êxodo:

Iha loron hirak nebá, Moisés ho Aarão halo buat foun barak iha farão nia oin. Maibé Maromak hatós nia fuan hodi la husik Israel oan sira sai housi nia liman.

Nune’e, Na’i dehan ba Moisés ho Aarão iha rai Egipto: “Fulan ida ne’e, sai ba imi, fulan ba dala uluk fulan hotu nian; imi halo fulan ida ne’e sai fulan ba dala uluk tinan ida nian. Imi fó hatene ba povo Israel, hodi dehan: Iha loron sanulu fulan ne’e nian, família ida-idak buka bibi-malae ida, uma ida bibi ida. Família kiik karik, la bele han hotu bibi ida, sei libur an hamutuk ho família seluk nebé hela besik nia tuir numero ema nian. Imi sura kedas ema na’in hira mak bele han bibi ida. Sei hili bibi oan aman tinan ida nian, nebé la iha áat buat ida. Imi bele hili bibi malae eh bibi timur. Imi sei hein to’o loron sanulu resin háat fulan ne’e nian; to’o loron ne’e, família ida-idak sei oho bibi oan ne’e iha loro-kraik ne’e kedas. Hasai nia ran uit-oan hodi tada odamatan uma nian nebé hodi han bibi ne’e. Bibi ne’e sei han hotu kedas iha kalan ne’e. Naan tunu de’it, han ho du’ut moruk ho pão la tau fermento. Imi sei la han naan ne’e matak eh te’in ho wé, maibé tunu de’it iha ahi ho ulun, ain no baluk sira hotu. Imi la bele husik baluk ruma ba loron aban; baluk ruma hela karik sunu mutuk hotu kedas. Imi sei han nune’e: Kesi futu kabun iha knotak, tau sandálias iha ain no káer ai-tonka iha liman. Imi sei han lalais, basá, ne’e Na’i Nia Páscoa. Iha kalan ne’e kedas, Ha’u sei liu iha rai tomak Egipto nian; Ha’u sei oho hotu ema Egipto nia oan mane kaua’ik sira, no balada oan aman kaua’ik sira. Ha’u sei fó castigo ba Egipto sira nia maromak, basá, Ha’u rasik, mesak de’it mak Na’i. Ran nebé kose iha odamatan uma nian nebé imi hela ba, nu’udar sinal ida. Wainhira Ha’u hare hetan ran ne’e, Ha’u sei liu de’it, susar sei la kona imi be iha uma laran ne’e, wainhira Ha’u oho ema sira iha rai Egipto. Loron ne’e ba imi loron boot; imi sei hanoin nafatin loron ne’e hodi celebra festa atu hahí Na’i. Imi nia bei oan sira sei halo mós festa ne’e nu’udar lei ba nafatin

Maromak Futar Lia.

 

Salmo Responsorial                                                                                                                           Sal. 115(116). 12-13, 15-18 (R. 13)

Refrão : Ha’u sei foti cálice maksoyn nian, hodi bolu Na’i Nia naran !!! Repete-se

Ou           Aleluia!!

Oinsá ha’u sei agradece Na’i,

Tan buat hotu nebé Nia halo mai ha’u?

Ha’u sei foti cálice maksoyn nian,

Hodi bolu Na’i Nia naran. Refrão

 

Iha Na’i futar oin, folin tebes duni

Nia belun sira nia mate.

Na’i, ha’u Ita atan, Ita atan feto nia oan,

Ita silu tohar ha’u besi-dadur. Refrão

 

Ha’u sei hasa’e ba Ita sacrifício hahí nian,

Hodi bolu Ita naran.

Ha’u sei halo tuir duni ha’u lia hakotu ba Na’i,

Iha povo hotu nia oin. Refrão

 

Aclamação                                                                                                                                                                                           Jo. 10. 27

Refrão : Aleluia, Aleluia!! Repete-se

Ha’u nia bibi sira rona Ha’u lian, Na’i lia tun;

Ha’u hatene sira, sira mai tuir Ha’u. Refrão

 

Evangelho                                                                                                                                                                                          Mt. 12. 1-8

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus liu housi to’os trigo nian iha loron sábado ida. Tan Nia escolante sira hamlaha, sira hahu ku’u trigo fulin hodi han daudaun. Fariseu sira haré buat ne’e, sira hateten ba Jesus: “Haré ba, Ita Nia escolante sira halo buat nebé bandu atu halo iha sábado”. Maibé, Jesus hatan ba sira: “Imi la lê buat nebé David halo, wainhira nia senti hamlaha, ho nia maluk sira seluk? Tama iha Na’i Maromak Nia uma, hasai hodi han pão sira iha santuário, nebé lulik be nia la bele han no nia maluk sira mós la bele han selae, na’ilulik sira de’it mak bele han. Imi la lê iha Na’i Nia lei, nebé dehan iha templo, na’ilulik sira bele serbisu iha sábado maibé, sira la sala? Ha’u dehan ba imi katak, iha ne’e iha Ida nebé boot liu templo. Imi hatene karik buat ne’e katak sá: “Ha’u hakarak laran luak, lakohi sacrifício’, imi sei la fó sala ba ema nebé la sala. Basá, Mane Maksoyn mak sábado nia na’in.

Lia Maksoyn.

Leave a Reply

Your email address will not be published. Required fields are marked *