shadow
Diocese de Dili > NOTÍCIAS > LETURA DIÁRIA > Segunda – Feira, XVI Semana Tempo Comum (ANO C)

Segunda – Feira, XVI Semana Tempo Comum (ANO C)

Primeira Leitura                     Ex. 14. 5-18

Lia housi Livro Êxodo:

Iha loron hirak nebá, sira fó hatene ba liurai Egipto nian katak povo Israel halai sai ona housi nia reino. Nune’e, faraó ho ulun hirus teb-tebes hasouru povo ne’e hodi hateten: “Tan sá ita husik sai Israel oan sira; sira sei la serbi tan ona ita?” Faraó haruka hadi’a kareta kuda nian, bolu nia emar sira bo ho nia. Nia haruka prepara kareta atus neen no mós kareta sira selu-seluk rai Egipto nian, ida-idak ho nia soldado sira. Na’i halo faraó, liurai Egipto nia fuan tós no laran nakali liu tan hodi haruka duni tuir kedas Israel oan sira nebé sai ho ksolok wa’in tebes. Nune’e, ema Egipto sira hahu duni tuir Israel oan sira hodi sira nia kuda no kareta sira faraó nian hamutuk ho soldado wa’in. Sira toman Israel oan sira wainhira Israel sira hamaha-an hela iha tasi ibun, besik Piairot, iha Baalsefon nia oin. Wainhira faraó hakbesik-an daudaun, Israel oan sira foti matan haré ema Egipto sira mai housi sira kotuk. Israel oan sira ta’uk no hakfodak teb-tebes, hakilar, temi Na’i Nia naran hodi hateten ba Moisés: “Tanba iha Egipto la iha rate mak ó lori ami mai atu mate iha rai fuik maran ne’e? Atu lori ami sai housi Egipto, ami dehan tiha ona ba ó iha rai Egipto: ‘Husik ami serbi ema Egipto sira; sai atan ema Egipto sira nian di’ak liu ita mai mate iha rai fuik maran?” Nune’e, Moisés hatan ba povo hodi dehan: “Imi keta hakfodak. Fiar metin ho neon no laran, imi sei haré oinsá Na’i sei soi imi iha loron ne’e, basá, Egipto sira nebé ohin imi haré hetan, imi sei la haré tan iha loron seluk; imi hakmatek ba, Na’i mak sei funu ho sira iha imi nia fatin”.

Na’i lia tun ba Moisés, dehan: Tan sá ó hakilar mai Ha’u? Hateten ba Israel oan sira atu hahu la’o daudaun ba. Foti sa’e ó nia óe, halolo ó liman ba tasi leten hodi fahe nia ba rua, atu Israel oan sira bele liu ba tasi sorin ba ho ain maran. Ha’u sei halo Egipto oan sira nia fuan sai tós liu tan atu duni tuir Israel oan sira. Ha’u sei hatudu Ha’u Nia glória ba hodi manan faraó, nia emar sira hotu, nia kareta no kuda na’in sira hamutuk ho sira nia sasan tomak. Egipto sira sei hatene katak Ha’u mak Na’i, wainhira Ha’u hatudu Ha’u Nia glória hodi manan faraó, nia soldado sira bo kareta sira.

Maromak Futar Lia.

 

Salmo Responsorial                                                                                                                                       Ex. 15. 1-2, 3-4, 5-6 (R. 1b)

Refrão : Ita sei hananu ba Na’i be hafutar-An ho glória!!! Repete-se

Ha’u sei hananu ba Na’i tan Nia halo nabilan nia glória,

Hamou’ut iha tasi laran kuda no kuda na’in.

Na’i mak ha’u kbiit no ha’u tulun,

Nia mak fó liberdade mai ha’u. Refrão

 

Nia mak ha’u nia Maromak, ha’u hahi Nia;

Nia mak ha’u aman nia Maromak, ha’u hahi nia,

Na’i mak funu na’in, Bele halo hotu mak Nia naran!

Nia hamou’ut faraó nia kareta

No soldado sira iha tasi . Refrão

 

Tasi Mean tolan tiha hotu funu na’in sira,

Sira mou’ut lakon gotu iha wé,

Hanesan fatuk monu lakon iha tasi kle’an.

Na’i, Ita liman lós hatudu Ita kbiit,

Ita liman lós halakon funu baluk. Refrão

 

Aclamação                                                                                                                                                                              Sal. 94(95). 8ab

Refrão : Aleluia, Aleluia!! Repete-se

Ohin imi rona karik Na’i Nia lian,

Keta taka imi nia fuan. Refrão

 

Evangelho                                                                                                                                                                                    Mt. 12. 38-42

Na’i Jesus Cristo nia Evangelho nu’udar São Mateus haktuir:

Iha tempo nebá, escriba no fariseu balun dehan ba Nia: “Mestre, ami hakarak haré sinal ida housi Ita”. Nia hatan ba sira: “Ema laran áat no sala fo’er na’in husu sinal ida; maibé sei la fó sinal ida ba nia; sei fó de’it sinal profeta Jonas nian. Hanesan Jonas hela iha ikan boot nia kabun laran ba loron tolu no kalan tolu, nune’e mós Oan Mane sei hela iha rai laran ba loron tolu no kalan tolu. Iha loron justiça nian, ema Ninive sira sei hamriik hasouru derasaan ne’e hodi tesi lia todan ba nia, basá sira halo penitência wainhira sira rona Jonas nia liafuan; maibé iha ne’e iha Ida nebé boot liu fali Jonas. Iha loron justiça nian, liurai feto reino tasi mane nian sei hamriik hasouru derasaan ne’e hodi tesi lia todan ba nia, basá nia mai housi rai ikun atu rona Salomão nia matenek; maibé iha ne’e iha Ida nebé boot liu fali Salomão!”

Lia Maksoyn.

Leave a Reply

Your email address will not be published. Required fields are marked *