shadow
Diocese de Dili > NOTÍCIAS > LETURA DIÁRIA > Terça – Feira, XVI Semana Tempo Comum (ANO C)

Terça – Feira, XVI Semana Tempo Comum (ANO C)

Primeira Leitura                  Ex. 14. 21-15. 1

Lia housi Livro Êxodo:

Iha loron hirak nebá, Moisés halolo liman ba tasi mean nia leten; iha kalan, Na’i castigo tasi housi anin maka’as ida be huu housi loro-sa’e mai. Tasi maran tiha, wé fahe an tiha ba rua. Israel oan sira liu tasi ho ain maran, wainhira wé fahe an tiha ba sorin kuana no ba sorin karuk hanesan baki boot hari sa’e. Ema Egipto sira duni tuir sira: faraó nia kuda sira hotu, nia kareta ho soldado sira tama iha tasi laran. Iha dader, housi ai-riin ahi nian no kalohan nian, Na’i haré ema Egipto sira nia tenda hodi halo sira bilan tiha. Na’i halo sira nia kareta nia roda metin tiha, halai la di’ak. Nune’e, ema Egipto sira dehan: Ita halai ona housi Israel oan sira, basá, Na’i hafunu iha sira fatin hodi hasouru ema Egipto sira. Maibé, Na’i lia tun ba Moisés: “Halolo liman ba tasi leten atu wé bele taka metin tiha ema Egipto sira nia soldado, kuda no kareta sira hotu”. Moisés halolo liman ba tasi, iha dadersan tasi nakonu hikas fali hanesan bai-bain wainhira ema Egipto sira halai hasouru wé. Na’i hamou’ut sira hotu iha tasi klaran. Wainhira wé nakonu hikas fali, faraó nia kareta sira, kuda sira no soldado sira hotu nebé tama iha tasi laran hodi duni tuir Israel oan sira, mou’ut hotu tiha kedas iha nebá. Ema Egipto sira ida mós la halai fila. Maibé Israel oan sira liu iha tasi laran ho ain maran, wainhira wé sai hanesan baki hari netik housi kuanan no housi karuk. Iha loron ne’e, Na’i soi Israel oan sira housi ema Egipto sira nia liman kro’at; Israel oan sira haré ema Egipto oan sira mate latan lerek iha tasi ibun. Sira haré mós kbiit maka’as Na’i nian hasouru Egipto oan sira. Israel oan sira hahu hamta’uk Maromak hodi fiar iha Na’i no iha Nia atan Moisés.

Tuir mai, Moisés ho Israel oan sira hananu knananuk ida nune’e hodi hahi Na’i. “Ha’u sei hananu ba Na’i, nebé hafutar-An ho glória; hamou’ut iha tasi kuda sira no kuda na’in sira hotu”.

Maromak Futar Lia.

 

Salmo Responsorial                                                                                                                        Ex. 15. 8, 9, 10 e 12, 13 e 27 (R. 1b) Refrão : Hananu ba Na’i nebé hafutar-An ho glória!!! Repete-se

Hodi iis Ita hiru nian,

Wé halibur-an hamutuk,

Laloran sira halo didin ida;

Tasi kle’an nakloke iha klaran. Refrão

 

Funu-baluk dehan: “Ha’u sei duni tuir sira,

Ha’u sei toman sira hodi fahe sira riku-soin ba malu,

Ha’u klamar sei haksolok

Wainhira halo rahun buat hotu ho surik”. Refrão

 

Ita haruka anin no tasi tolan sira,

Sira mou’ut hanesan makadadi iha wé si’ak,

Ita halloo liman Ita liman kuana, rai tolan kedas sira hotu.

Maibé, Na’i, Ita dada dalan ba Ita povo be Ita soi,

No ho Ita kbiit Ita lori sira ba Ita Horik fatin,

Hôrik fatin metin be Ita halo, Na’i. Refrão

 

Aclamação                                                                                                                                                                                           Jo. 14. 23

Refrão : Aleluia, Aleluia!! Repete-se

Ema nebé hadomi Ha’u, sei halo tuir Ha’u nia liafuan;

Ha’u Aman sei hadomi nia, Ami sei mai hela o nia. Refrão

 

Evangelho                                                                                                                                                                                    Mt. 12. 46-50

Na’i Jesus Cristo nia Evangelho nu’udar São Mateus haktuir:

Iha tempo nebá, wainhira Jesus sei ko’alia daudaun ba ema lubun boot, Nia inan ho Nia maun alin sira to’o mai iha liur hodi buka atu ko’alia ho Nia. Ema ida dehan ba Nia: “Ita nia inan no Ita nia maun alin sira hakarak ko’alia ho Ita”. Jesus hatan ba ida nebé koalia ba Nia: “Se mak Ha’u nia inan, se mak Ha’u nia maun alin sira?” Hafoin Nia lolo liman ba nia escolante sira hodi dehan: “Sira ne’e mak Ha’u nia inan no Ha’u nia maun alin sira. Basá ema hotu nebé halo tuir Ha’u Aman Lalehan nia hakaran, ema ne’e mak Ha’u Nia maun, Ha’u nia feton no Ha’u Nia inan”.

Lia Maksoyn.

Leave a Reply

Your email address will not be published. Required fields are marked *