shadow
Diocese de Dili > NOTÍCIAS > LETURA DIÁRIA > Quinta – Feira, XVI Semana Tempo Comum (ANO C)

Quinta – Feira, XVI Semana Tempo Comum (ANO C)

Primeira Leitura          Ex. 19. 1-2, 9-11, 16-20b

Lia housi Livro Êxodo:

Liu tiha fulan tolu, housi loron nebé Israel oan sira sai housi rai Egipto, iha loron ne’e duni sira to’o iha rai fuik maran Sinai nian, iha nebé sira hari sira tenda hodi hôrik ba. Sira hela kedas iha foho nia hun.

Na’i lia tun ba Moisés, dehan: “Ha’u sei mai hasouru malu ho ó iha kalohan mahar ida nia laran atu povo sira bele rona wainhira ha’u ko’alia ho ó atu sira bele tau neon iha ó ba nafatin”. Tuir mai, Moisés haktuir povo nia liafuan ba Na’i.

Na’i hateten tan ba Moisés: “Ó ba hateten ba povo atu hamos sira-an ohin no aban dader. Sira sei fase sira nia hatais hodi prepara sira-an ba bainrua, basá, iha loron bad ala tolu, Na’i sei tun iha foho Sinai, iha ema tomak nia oin”.

Iha loron ba dala tolu, dader, mosu rai lakan no tarutu, kalohan boot nakukun tun mai iha foho leten; povo sira rona korneta lian maka’as. Povo sira iha tenda laran ta’uk nakdedar. Moisés haruka sira sai housi tenda laran atu lori sira sa’e ba Maromak futar oin hodi hela hotu iha foho hun. Ahi suar taka metin foho Sinai, basá, Na’i tun iha nia housi ahi lakan boot leet. Ahi suar sa’e hanesan ahi matan boot nian ida hodi halo foho ne’e nakdedar maka’as tebes. Korneta nia lian hetok maka’as liu tan. Moisés ko’alia ho Maromak; Maromak hatan ba nia ho lia hanesan rai tarutu nian. Na’i tun iha foho Sinai nia leten, iha foho áas. Na’i bolu Moisés housi foho tutun.

Maromak Futar Lia.

 

Salmo Responsorial                                                                                                                           Dan. 3. 52, 53-54, 55-56 (R. 52b)

Refrão : Hahi no glória ba Na’i ba nafatin!!! Repete-se

Rahun di’ak ba Na’i, ita aman sira nia Maromak,

Ba Itaboot, hahi no glória ba nafatin.

Rahun di’ak ba Ita naran santo no kmanek,

Ba Itaboot, hahi no glória ba nafatin. Refrão

 

Rahun di’ak iha templo santo Ninia glória nian,

Ba Itaboot, hahi no glória ba nafatin.

Rahun di’ak iha trono Ninia reino nian,

Ba Itaboot, hahi no glória ba nafatin. Refrão

 

Rahun di’ak ba Na’i be haré borus fatin kle’an tomak,

No be tur iha querubim sira leten,

Ba Itaboot, hahi no glória ba nafatin.

Rahun di’ak ba Na’i, iha áas Lalehan nian,

Ba Itaboot, hahi no glória ba nafatin. Refrão

 

Aclamação                                                                                                                                                                                           Mt. 11. 25

Refrão : Aleluia, Aleluia!! Repete-se

Rahun di’ak ba Ita, Aman, Na’i Lalehan no rai nian,

Tan Ita hatudu mistério reino Lalehan nian ba kiik sira. Refrão

 

Evangelho                                                                                                                                                                                     Mt. 13. 10-17

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus nia escolante sira hakbesik ba Nia dehan: “Tansá Ita ko’alia ba sira ho aiknanoik?” Nia hatan ba sira: “Ba imi, Maromak fó hatene tiha mistério sira reino lalehan nian, maibé ba sira lae. Basá ba ida nebé iha ona, sei fó tan atu nia iha liu tan; maibé ida nebé la iha, buat uitoan mós nebé nia iha sei hasai tan housi nian. Tan ne’e mak Ha’u ko’alia ba sira ho aiknanoik, bas’a sira hateke daudaun, maibé la haré; sira sée tilun daudaun maibé la rona, ka hatene lós. Nune’e sei sai duni tuir Profeta Isaias nia lia nebé dehan: ‘Imi rona ho tilun, maibé la hatene lós; imi haré ho matan, maibé la haré mós. Basá povo ne’e nia laran tós; sira nia tilun diuk no la bele rona; sira fuan la bele hatene lós keta sira hakribi sira nia sala hafoin Ha’u halo sira fila ba di’ak.’ Maibé ksolok ba imi nia matan basá sira haré; no ba imi nia tilun basá sira rona. Tebes, Ha’u dehan ba imi katak profeta no ema di’ak barak hakarak teb-tebes haré buat nebé imi haré daudaun, maibé la haré; no rona buat nebé imi rona, maibé la rona”.

Lia Maksoyn.

Leave a Reply

Your email address will not be published. Required fields are marked *