shadow
Diocese de Dili > NOTÍCIAS > LETURA DIÁRIA > Sábado, XVI Semana Tempo Comum (ANO C)

Sábado, XVI Semana Tempo Comum (ANO C)

Primeira Leitura                        Ex. 24, 3-8

Lia housi Livro Êxodo:

Iha loron hirak nebá, Moisés mai fó hatene ba povo Na’i nia liafuan no Na’i nia lia hakotu. Povo tomak hatan hodi lian ida de’it, hateten: “Liafuan hotu nebé Na’i hateten, ami sei moris tuir lolós ba nafatin”. Tuir mai, Moisés hakerek tiha iha livro Na’i nia liafuan hirak ne’e. Iha loron tuir mai, dadersan de’it, Moisés hari altar ida iha foho hun, hatur mós fatuk sanulu resin rua tuir uma kain sanulu resin rua housi Israel. Hafoin nia haruka klosan sira balu housi Israel oan sira, atu oho karau oan sira hodi hasa’e ba Na’i nu’udar sacrifício dame nian. Nune’e, Moisés hasai tiha ran balu hodi fakar iha sanan no balu seluk nia fakar iha altar leten. Hafoin, nia foti livro moruk nian hodi lê ba povo nebé hotu hatan: “Buat hotu nebé Na’i hateten, ami sei moris tuir lolós; ami sei halo tuir Na’i nia hakarak”. Tuir mai, Moisés káer ran iha hisik ba povo hodi dehan: “Ne’e mak ran moruk nian nebé Na’i kesi imi hotu iha Nia, tuir liafuan sira nebé imi rona daudaun”.

Maromak Futar Lia.

 

Salmo Responsorial                                                                                                                       Sal. 49(50). 1-2, 5-6, 14-15 (R. 14a)

Refrão : Hasa’e ba Na’i sacrifício hahi nian!!! Repete-se

Na’i ko’alia, Maromak kbiit Na’in,

No halibur tiha rai hotu housi loro-sa’e to’o loro-monu.

Iha Sião be kmook tebes, Maromak dirak;

Ita nia Maromak sei mai, no Nia sei la nonok. Refrão

 

“Halibur Ha’u nia emar sira,

Sira be hametin Ha’u Nia moruk ho sacrifício”.

Lalehan haklaken Nia justice,

Maromak rasik sei mai halo justiça. Refrão

 

Hasa’e sacrifício hahi nian ba Maromak,

Halo tuir ó nia lia hakotu ba Leten áas liu hotu.

“Bolu Ha’u iha loron susar,

Ha’u sei soi ó no haraik glória ba ó”. Refrão

 

Aclamação                                                                                                                                                                                         Tg. 1. 21b,c

Refrão : Aleluia, Aleluia!! Repete-se

Simu ho laran hakmatek liafuan nebé kuda ona iha

Imi be bele soi imi klamar. Refrão

 

Evangelho                                                                                                                                                                                    Mt. 13. 24-30

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus dehan tan aiknanoik ida ba sira: “Reino Lalehan nian hanesan ema ida nebé kuda fini di’ak iha nia to’os; maibé wainhira nia emar sira toba daudaun, nia funu baluk mai kuda du’ut áat iha trigo leet, hafoin nia ba tiha. Wainhira trigo sai boot tiha hodi fó fuan, du’ut áat mós mosu. To’os na’in nia atan sira mai buka nia hodi dehan ba nia: ‘Na’i itaboot la kuda fini di’ak iha ita nia to’os? Du’ut áat mai housi nebé?’ Nia hatan: ‘Ha’u nia funu baluk ruma mak halo buat ne’e’. Atan sira dehan ba nia: ‘Ita boot hakarak ami ba fokit tiha nia?’ ‘Lae’, nia dehan, ‘keta halo be hodi fokit du’ut áat, imi fokit mós trigo. Husik sira rua moris hamutuk ba; loron ko’a hare nian to’o mai mak ha’u sei dehan ba to’o atan sira: ‘Hili uluk du’ut áat ba hodi futu hamutuk atu sunu; trigo fali, halot tiha iha ha’u nia hoka’”.

Lia Maksoyn.

Leave a Reply

Your email address will not be published. Required fields are marked *