shadow
Diocese de Dili > NOTÍCIAS > REFLEXÃO > TELEFONE HO MAROMAK (Leitura no Reflexão Domingo Comum XVII-Ano C 2019)

TELEFONE HO MAROMAK (Leitura no Reflexão Domingo Comum XVII-Ano C 2019)

Primeira Leitura                     Gén 18, 20-32

Lia housi Livro Génesis:

Iha loron hirak nebá, Maromak lia tun nune’e: “Lia hasouru Sodoma no Gomorra todan teb-tebes, tan sira salan boot teb-tebes!… Ha’u sei tun ba hodi haré to’ok lia nebé to’o mai Ha’u tuir ka la tuir sira nia hahalok. La tuir karik, Ha’u sei hatene”. Iha oras ne’e, ema Na’in tolu nebé tama iha Abraão uman, husik tiha Abraão, hodi la’o ba Sodoma. Abraão sei hamriik hela iha Na’i nia oin. Nia hakbesik ba Na’i hodi hasa’e lia nune’e: “Ita Boot sei oho ema di’ak hamutuk ho ema áat? Keta iha karik ema di’ak lima-nulu iha cidade laran! Ita sei hanoin atu oho tebes sira hotu? Ita sei la haraik perdua ba cidade ne’e tan ema di’ak lima-nulu nebé tur iha cidade? Tebes, Ita sei la halo ida ne’e: Oho ema di’ak hamutuk ho ema áat, halo sira rua hetan rahun áat hanesan! Ida ne’e Ita sei la halo duni. Raiklaran nia juíz sei la halo justiça?” Na’i hatán ba nia: “Ha’u hetan karik ema di’ak lima-nulu iha cidade Sodoma, Ha’u sei perdua cidade ne’e, tan ema di’ak sira ne’e”.

Abraão hasa’e lia nafatin nune’e: “Ha’u barani hasa’e nafatin ha’u lian ba Ita, maski ha’u la folin liu rai-rahun no áhi-kdesan. Keta hela karik ema na’in lima, atu halo lima-nulu. Tan de’it ema na’in lima, Ita sei halakon cidade tomak?” Na’i lia tun, dehan: “Ha’u hetan karik ema di’ak hat-nulu resin lima iha nebá, Ha’u sei la halakon cidade”. Abraão dala ida tan hasa’e lia, dehan: “Keta iha de’it hat-nulu karik!” Na’i hatán: “Tan sira hat-nulu, Ha’u sei la sobu rahun cidade”.

Abraão hasa’e teni lia: “Ha’u Na’in, keta hirus! Tan atan ha’u hasa’e lia dala ida tan: “Keta iha de’it ema di’ak tolu-nulu iha nebá?” Na’i simu hodi dehan: “Ha’u hetan karik iha nebá ema di’ak tolu-nulu, Ha’u sei la sobu rahun cidade”. Abraão husu teni: “Atan oan sei aten barani atu hasa’e lia ba Ita: “Keta iha de’it ema di’ak rua-nulu karik?”. Na’i simu, dehan: “Tan ema di’ak rua-nulu ne’e, Ha’u sei la harahun cidade”. Abraão hasa’e teni lia: “Na’i, keta hirus atan oan: ha’u sei hasa’e lia dala ida ne’e tan: “Keta iha de’it ema di’ak sanulu iha nebá?”. Na’i lia tun, dehan: “Maski nune’e, Ha’u sei la sobu rahun cidade”, tan sira sanulu ne’e”.

Maromak Futar Lia.

 

Salmo Responsorial                                                                                                                   Sal. 137(138), 1-2ª. 2bc-3. 6-7ab. 7c-8

Refrão : Na’i, wainhira ha’u harohan ba Ita, Ita rona nafatin ha’u lian!!! Repete-se

Na’i, ho laran luak ha’u hananu ba Ita

Tan Ita rona ha’u lian.

Iha Anjo sira oin, ha’u sei hahí Ita,

Sei hana’i iha Ita kadunan. Refrão

 

Ha’u sei hananu ba Ita domin no laran di’ak,

Tan Ita nia neon di’ak tebes.

Ha’u harohan ba Ita, Ita rona ha’u;

Ha’u moris hetan íis foun. Refrão

 

Ita liman soy ha’u,

Maromak sei hato’o nia kmanek mai ha’u.

Na’i, Ita laran luak rohan laek;

Ita la hakribit sasán nebé Ita haki’ak. Refrão

 

Reino hotu nia ulun sei hahí Ita,

Wainhira rona Ita lian,

Sira hahí Ita kmanek,

Tan Nia kbiit boot tebes. Refrão

 

Segunda Leitura                                                                                                                                                                          Col. 2, 12-14

Lia housi São Paulo nia surat ba sarani sira iha Colósso:

Maun-alin sira: Tan baptismo, imi hakoi-an tiha ona ho Cristo, imi moris hias ona ho Cristo, basá, imi fiar Na’i Maromak kbiit, kbiit nebé halo Cristo moris hias housi mate. Imi mate ona, tan imi nia salan sira no tan imi ema gentio, la dauk simu circuncissão. Maibé, Na’i Maromak halo imi moris hias ona hamutuk ho Cristo. Na’i Maromak perdua tiha ona imi nia salan hotu-hotu; Na’i Maromak les tiha ona surat nebé hakerek hela ita nia salan sira. Surat ne’e mak halo ita susar iha lei nia oin. Maibé, Na’i Maromak halakon tiha ona surat ne’e, hodi hedi tiha Nia iha Cruz.

Maromak Futar Lia.

 

Aclamação                                                                                                                                                                                              Lc. 11, 9

Refrão : Aleluia, Aleluia!! Repete-se

Husu ba, imi sei simu.

Buka ba, imi sei hetan.

Tuku odamatan ba, odamatan sei nakloke. Refrão

 

Evangelho                                                                                                                                                                                         Lc. 11, 1-13

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus hamulak hela iha fatin ida. Hotu tiha, nia Escolante ida, hasa’e lia ba Nia: “Na’i, hanourin ami hamulak hanesan João Baptista mos hanourin nia escolante sira”. Jesus lia tun ba sira: “Imi hamulak dehan nune’e: Ami Aman, tulun ami hahí Ita naran. Halo Ita nia Reino to’o mai ami. Haraik ai-han loron-loron nian mai ami, atu ami bele moris. Haraik perdua mai ami salan, nu’udar ami perdua ba ema halo áat ami. La bele husik ami monu ba tentação”. Jesus lia tun teni ba sira: “Imi iha karik belun ida, iha kalan boot, imi ba karik nia uma, hodi hateten ba nia: Belun, fo netik pão fuan tolu mai, basá, ha’u belun ida foin to’o mai housi dook. Ha’u la iha liu buat ida atu fo han ba nia. Belun ne’e bele hatán housi uma laran nune’e: Keta mai book ha’u! Odamatan taka metin ona; Ha’u ho ha’u oan sira, ami toba hotu ona. Ha’u la bele hader atu fo buat ruma ba ó. Tebes, Ha’u dehan ba imi: Ema ne’e la bele hader atu fo pão tan sira belun malu, maibé, nia sei hader tan nia hakarak toba hakmatek. Tan ne’e, nia sei hader atu fo buat nebé nia belun hakarak. Ha’u mos dehan ba imi: Husu ba, imi sei simu! Buka ba, imi sei hetan duni! Tuku odamatan ba, oadamatan sei nakloke ba imi! Basá, ema hotu nebé husu, sei simu. Ema nebé buka, sei hetan. Ema hotu nebé dere odamatan, odamatan sei nakloke ba sira. Ema sê mak nia oan husu pão, fo fatuk ida? Nia oan husu karik ikan ida, fo samean ida? Nia oan husu karik manu-tolun ida, fo sakunar ida? Ne’e duni, maski imi ema áat, imi hatene fo buat di’ak ba imi oan sira; nune’e mos, imi nia Aman Lalehan sei haraik Espírito Santo ba sira nebé husu Espírito Santo ba Nia”.

Lia Maksoyn.

 

 

Reflexão :

 TELEFONE HO MAROMAK

               Progeresso tecnológica ida nebé ohin loron facilita tebes ema halo comunicação mak telemovel. Ho aparelho ida nee, habak distância comunicação entre ema ho ema. Progresso seluk hanesan media Social (Medsos) mos contribui mais fácil ba humanidade iha processo comunicação tanba bele halo voice call ho video call. Aspecto negativo husi tecnologia mak tendência ema nian hodi hasees-an husi Maromak. Husi aspecto religioso, oraação amk meio fácil no gratuito nebé facilita comunicação ema ho Maromak. Comunicação ida nee naturalmente gratuita (gratis) alias la uza pulsa. De facto, precesa tecnologia desvia ema husi comunicação gratuita ida nee. Falhanço nee laos mosu husi tecnologia nee rasik maibé, mai husi ema nebé utiliza sala liberdade. São Gregório husi Nazianze hatete; iha buat principal tolu (3) nebé Maromak hakarak husi ema hotu nebé simu ona Sacramento Baptismo; (a). Fiar nebé metin, (b). Koalia sai Lia los no (c). Hamate-an. Evangelho Domingo semana nee, Na’i Jesus Cristo convida ita nobun nudar Cristão Católico hodi compreende no respeita sentido oração iha ita nia moris.

Nudar haktuir iha São Lucas nia relato katak; Jesus reza daudaun, nudar exemplo no modelo ba ita sarani sira atu banati tuir. Iha Jesus nia maneira halo oração, iha neba ita bele haré relação no comunicação diak entre Jesus ho Aman Maromak iha Espírito Santo. Ita nudar Cristão Católico, precisa halo oração bebeik basá, oração mak maneira comunicação ao mesmo tempo oração mak sinal hodi prova ita nia fiar ba Maromak.

               Oração laos atu obriga Maromak halo tuir ita nia vontade ka hakarak sira. Oração nebé autêntico mak lalaok ida nebé nakloke no husik ita-an atu Maromak nia vontade eh Maromak nia Espírito mak habook ita nia moris. Ho oração, halo ita sai escolante nebé fiel ba Jesus, no hamutuk ho Jesus, Nia halo tuir Aman Maromak nia vontade (Providência Divina).

São Lucas Domingo semana nee, hatoo kona ba ORAÇÃO nebé hafahe ba parte 3 atu ita bele contempla hanesan:

(a). Kona ba oração AMI AMAN (PAI NOSSO; Lc 11,1-4);

(b). Kona ba PERSEVERANÇA (ketekunan) iha ORAÇÃO; Lc 11, 5-6).

(c). Kona ba resultado ORAÇÃO; Lc 11, 9-13.

               Escolante sira husu ba Jesus oinsa sira bele halo oração ho fuan tomak no perseverante ba Maromak. Jesus hatudu exemplo oração hamutuk (comunal) ema Cristão verdadeiro nian. Iha oração AMI AMAN nee, Jesus hakarak hanorin katak; Maromak nudar AMAN ida nebé tau matan ba oan sira no fo duni saida mak oan sira precisa iha moris, Aman nebé fo perdão no liberta oan sira husi tentação aat.

Oração hamutuk; escolante sira, Jesus bolu atenção hodi halao moris hanesan Jesus nia escolante lolos. Laos moris nudar individuo ou particular maibé, responsabiliza malu nudar ema fiar nain.  Oração mos nudar  oração Apostolo, tan nee oração laos nudar meio hodi chatting ho Maromak nudar HAU maibé hase Maromak nudar AMI/ITA, nebé consciente ba interece comum. Oração nebé diak precisa basea ba princípio solidadriedade, subsidiaridade no relação amizade ho ema seluk.

               Impossível ita reza sério se oração nee ba ita-an rasik deit. Nee significa katak Reino Maromak nia seidauk too mai basá, ita hamulak ba Aman Maromak katak; halo Ita nia Reino too mai ami, laos halo Ita nia Reino too mai hau mesak deit. Liu husi telemóvel ita bele hatoo informação privado ou colectivo. Iha oração Ami Aman, ita hatoo informação colectivo (informação hamutuk).

Pão eh ai-han lorloron nebé ita husu ba Maromak laos ba loron ohin deit maibé, ita precisa ai-han ba moris lor-loron nian too aban bainrua. Ita mos husu perdão ba Aman Maromak tan sala sira nebé ita halo bebeik iha moris nee. Tan Maromak laran diak, ita hetan duni perdão Maromak nian liu husi Amu lulik sira iha Sacramento Confessa/Reconciliação. Atu perdão nee kmanek liu tan, ita nudar Cristão precisa mos fo perdão ba ema ruma nebé halo aat mai ita.

Evangelho Domingo semana nee, hakarak hatur sentido laos falhanço moral nian deit maibé, aspecto material mos precisa tau iha cristão sira nia atitude; significa laos ita precisa fo perdão deit maibé, fo tulun mos ba ema nebé precisa ita nia tulun. 

Nee mak sentido fundamental husi oração AMI AMAN be Cristo hanorin. Oração nee nudar lia harohan (pedido) ba ita ema kiak sira (kiak tan halo sala bebeik iha Maromak futar oin). Oração nee precisa ita harohan bebeik laos wainhira ita precisa deit maibé, harohan nee precisa continua too Maromak bolu ita fila ba mundo seluk.

               Certeza husi Maromak nia laran luak (Misericórdia); Ai-knanoik kona ba ema ida nebé ba dere odamatan iha kalan boot hodi husu tulun ba nia belun nebé foin mai husi viagem dook. Iha ai-knanoik nee, Jesus hakarak explica kona ba caractarística oração verdadeira, ai-knanoik nee so hetan deit iha Evangelho Lucas nian. Iha neba ita rona katak; fo-foun uma nain rejeita hodi fo tulun ho razão oioin nebé baibain mosu iha comunidade, maibé, ikus mai uma nain nee disponibiliza hodi tulun duni nia belun nebé mai dere odamatan iha kalan boot. Nunee, se ita ema koko aplica lalaok nee, certamente Aman Maromak iha lalehan sei loke matan ba ita nia oração sira nebé ita hatoo ho intenção lubu-lubuk nee. Maromak la taka matan ba ema sala nain nia lalaok basá, Aman Maromak laran luak duni (misericordioso) hodi rona ita nia hamulak. Ho Maromak buat hotu hetan certesa basá, Maromak nee consistente iha Ninia promessa sira. tanba nee mak Jesus hatete iha Evangelho katak; tuku ba, odamatan sei nakloke.

Nee mak provas ida katak; sucesso husi ita nia hamulak eh oração laos depende ba ita nia capacidade hodi formula oração maibé, barak ou oitoan, kleur ou lais, badak ou naruk, nee depende ba Aman Maromak nia laran luak no ema nia disponibilidade husi ema hodi husu eh dere odamatan Maromak nian. Maromak nia laran luak nee ita Cristão Católico so bele simu wainhira ita consciemte duni katak ita nia pecado halo ita kiak tebes iha graça Maromak nian. Ita nudar Aman Maromak nia emar eh oan doben sira, precisa hatene diak no aat saida mak ita halo ona ba Maromak liliu ba ita nia maluk sira. Assim Seja. (Ignas Lopes)

 

Leave a Reply

Your email address will not be published. Required fields are marked *