shadow
Diocese de Dili > NOTÍCIAS > LETURA DIÁRIA > Segunda – Feira, XVII Semana Tempo Comum (ANO C)

Segunda – Feira, XVII Semana Tempo Comum (ANO C)

Primeira Leitura          Ex. 32. 15-24, 30-34

Lia housi Livro Êxodo:

Iha loron hirak nebá, Moisés tun fali housi foho Sinai mai, lori ai kabelak lei nian, hakerek iha ai kabelak sorin-sorin. Ai kabelak sira Maromak Nia liman fatin; Maromak rasik mak hakerek iha ai kabelak sira.

Josué rona povo hahi haklalak. Nia dehan ba Moisés: “Ema sira iha tenda, haklalak hakilar tan funu”. Moisés hatan: “La’os lian knananuk ksolok manan nian, la’os lian laran susar lakon nian; ha’u rona knanuk ho lian oi-oin”.

Wainhira la’o besik rai luan, nia haré karau vaka ida halo ho osan mean: iha karau ne’e nia sorin-sorin ema dansa hela. Tan ne’e, Moisés hirus teb-tebes, soe ba rai ai kabelak sira lei nian nebé nia simu, hodi tuda rahun tiha iha foho nia hun. Nia káer karau vaka osan mean nebé Israel oan sira halo, sunu mutuk tiha, tuku halo rahun, kahor ho wé, obriga Israel oan sira atu hemu. Moisés husu ba Aarão: “Povo ne’e halo sá ba ó, atu ó halo nia hala’o sala boot hanesan ne’e?” Aarão hatan ba nia: “Keta laran hirus hanesan ne’e ha’u na’in! Ita rasik hatene povo ne’e nia neon sadere duni bas ala. Sira rasik mak hateten mai ha’u: ‘Halo maromak ida mai ami atu la’o iha ami oin; basá, Moisés ne’e, ema nebé hasai ami housi Egipto, oras ne’e nia iha nebé, ami la hatene’. Nune’e, ha’u dehan ba sira: ‘Sé mak iha osan mean?’ Sira hasai sira nia osan mean hodi fo mai ha’u. Hafoin, ha’u tau baa hi hodi sai tiha karau vaka ne’e’.

Iha loron tuir mai, Moisés hateten ba povo: “Imi halo sala ida boot tebtebes. Maibé, oras ne’e ha’u sa’e ba Maromak Nia futar oin, bele hetan karik perdua ba imi salan”. Nune’e, Moisés sa’e fila fali ba Na’i nia sorin hodi dehan: “Oh! Povo ne’e halo sala boot ida hodi halo maromak falso ida ba nia an ho osan mean! Itaboot hakarak karik perdua ba nia salan ne’e. Se la’e, ha’u husu atu hasai tiha ha’u naran housi livro nebé Itaboot hakerek”. Na’i hatan ba Moisés: “Ema nebé halo sala hasouru Ha’u, mak Ha’u sei hasai nia naran housi Ha’u nia livro. Oras ne’e ó bele fila fali atu lori povo ne’e ba fatin nebé Ha’u hatudu ona ba ó. Ha’u nia Anjo sei la’o ho ó iha ó nia oin. Maibé, iha loron nebé atu husu konta, Ha’u sei castigo sira tan sira sala ne’e”.

Maromak Futar Lia.

 

Salmo Responsorial                                                                                                                 Sal. 105(106). 19-20, 21-22, 23 (R. 1ª)

Refrão : Agradece ba Na’i tan Nia di’ak!!! Repete-se

Ou           Aleluia!

Iha Horeb sira halo karau vaka oan osan mean nian,

Sira adora maromak falso nebé sira halo;

Sira troca Na’i Nia Glória,

Ho ilas kara vaka oan nian ida nebé han du’ut. Refrão

 

Sira haluha tiha Maromak nebé soi sira,

Maromak nebéhalo kmanek oi-oin iha Egipto,

Kmanek oi-oin iha rai Cam,

Hatudu kbiit wa’in tebes iha Tasi Mean. Refrão

 

Nia hakarak atu halakon sira,

Maibé Moisés, ida be Nia hili teri netik,

Ko’alia housi sira, Na’i hatun Nia hirus,

Sira hetan sadi’a hodi la mate mohu. Refrão

 

Aclamação                                                                                                                                                                                             Tg. 1. 18

Refrão : Aleluia, Aleluia!! Repete-se

Aman Maromak halo ita sai oan hakiak housi lialós,

Atu it abele sai oan fudin iha Nia criatura hotu nia leet. Refrão

 

Evangelho                                                                                                                                                                                     Mt. 13. 31-35

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus haktuir tan aiknanoik ida ba sira: “Reino lalehan nian hanesan mustarda musan ida nebé ema kuda iha nia to’os. Musan ne’e kiik liu musan sira hotu; maibé boot mai, nia moris boot liu hotu, to’o sai aihun nebé manu sira lalehan nian mai hamahan an iha nia sanak sira”.

Nia dehan tan aiknanoik seluk ba sira: “Reino lalehan nian hanesan fermento nebé feto ida kahur ho farina sasukat tolu, to’o nia sa’e didiak”.

Buat ne’e hotu Jesus dehan ba ema lubun boot ho aiknanoik sira; la ho aiknanoik mak Nia la ko’alia ba sira. Nune’e buat nebé uluk profeta dehan sai tuir lolós duni: “Ha’u sei loke Ha’u ibun ho aiknanoik, Ha’u sei haklaken buat sira nebé subar houri mundo hahú”.

Lia Maksoyn.

Leave a Reply

Your email address will not be published. Required fields are marked *