shadow
Diocese de Dili > NOTÍCIAS > LETURA DIÁRIA > Quarta – Feira, XVII Semana Tempo Comum (ANO C)

Quarta – Feira, XVII Semana Tempo Comum (ANO C)

Primeira Leitura                     Ex. 34. 29-35

Lia housi Livro Êxodo:

Wainhira Moisés tun fila fali housi foho Sinai, nia lori ho ai kabelak sira Lei nian. Tan nia ko’alia kleur ho Maromak, nia oin sai lakan nabilan. Maibé nia la hatene tuir nia an. Aarão ho Israel oan sira tomak hateke ba Moisés; sira hare katak nia oin sai lakan nabilan, sira ta’uk hakbesik ba nia. Nune’e, Moisés bolu sira; Aarão no ulun sira povo nian ba hasouru Moisés nebé ko’alia ho sira. Tuir mai, Israel oan sira hotu hakbesik ba Moisés no nia hato’o ba sira ordem sira hotu nebé Na’i fó hatene ba nia iha foho Sinai. Wainhira ko’alia hotu tiha ho sira, Moises taka netik nia oin ho hena véu ida. Wainhira nia tama ba Tenda Hasouru Malu nian atu ba iha Na’i nia futar oin, ko’alia ho Na’i, Moisés hasai tiha hena véu iha iha nia oin to’o sai fila fali housi nebá. Sai tiha mai liur, nia hato’o ba Israel oan sira ordem sira nebé nia simu housi Na’i. Sira haré Moisés nia oin lakan tebes. Hafoin. Moisés taka fila fali nia oin  ho hena véu to’o nia tama fila fali iha Tenda Hasouru Malu nian atu ko’alia ho Nai.

Maromak Futar Lia.

 

Salmo Responsorial                                                                                                                                  Sal. 98(99). 5-7, 9, (R. cf. 9c)

Refrão : Ita, Santo, Na’i, ami nia Maromak!!! Repete-se

Hahí Na’i, ita nia Maromak,

Takrabat ba rai iha Nia futar ain;

Nia mak Santo. Refrão

 

Moisés, Aarão housi Nia na’ilulik sira,

Samuel housi sira be harohan ba Nia  naran;

Harohan ba Na’i no Nia rona sira. Refrão

 

Na’i ko’alia ho sira housi kalohan laran;

Sira halo tuir Nia ukunfuan no

Lei nebé Nia haraik ba sira. Refrão

 

Hahí Na’i, ita nia Maromak,

No takrabat ba rai iha Nia foho santo nia oin;

Nia mak Santo, ita nia Maromak. Refrão

 

Aclamação                                                                                                                                                                                         Jo. 15. 15b

Refrão : Aleluia, Aleluia!! Repete-se

Ha’u bolu imi belun, Na’i lia tun, tan Ha’u dehan ona ba imi

Lia hotu nebé Ha’u rona housi Ha’u Aman.  Refrão

 

Evangelho                                                                                                                                                                                    Mt. 13. 44-46

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus dehan ba ema lubun boot: “Reino lalehan nian hanesan murak mean ida nebé subar hela iha to’os laran, nebé ema ida hetan hodi haksubar fali. Ho ksolok boot nia fa’an buat hotu nebé nia iha hodi sosa to’os ne’e”.

Reino lalehan nian hanesan contrato na’i ida nebé buka fatuk murak sira. Hetan tiha ida nebé folin boot, nia fa’an tiha buat nebé nia iha hodi ba sosa fatuk murak ne’e.

Lia Maksoyn.

Leave a Reply

Your email address will not be published. Required fields are marked *