shadow
Diocese de Dili > NOTÍCIAS > LETURA DIÁRIA > Terça – Feira, XVII Semana Tempo Comum (ANO C)

Terça – Feira, XVII Semana Tempo Comum (ANO C)

Primeira Leitura      Ex. 33. 7-11, 34. 5b-9, 28

Lia housi Livro Êxodo:

Iha loron hirak nebá, hanesan bai-bain, Moisés foti sai Tenda housi acampamento hodi ba hatur iha liur. Tenda ne’e naran Tenda Hasouru Malu nian. Ema nebé hakarak ko’alia ho Maromak, ba iha Tenda Hasouru Malu nian, nebe la dook housi acampamento. Wainhira Moisés sai atu ba Tenda, povo tomak hamriik. Ida-idak sei hamriik iha nia tenda odamatan rasik to’o Moisés tama iha Tenda Hasouru Malu nian. Wainhira Moisés tama tiha iha laran, kalohan boot ida tun mai, hari an iha Tenda nia odamatan no Na’i ko’alia ho Moisés. Povo tomak haré hetan kalohan ne’e, nebé hari an hela iha odamatan oin Tenda Hasouru Malu nian. Ema tomak hamriik, ida-idak tuku tur ba rai iha nia tenda rasik nia odamatan. Na’i ko’alia ho Moisés oin ho oin, hanesan ema ida ko’alia ho nia belun ida. Tuir mai, Moisés fila fali ba acampamento. Maibé nia ajudante be foin sa’e Josue, Num nia oan, la sai housi tenda laran.

Moisés harohan ba Na’i Nia naran. Nune’e, Na’i liu iha Moisés nia oin hodi haklaken: “Na’i, Na’i mak Maromak ida laran-luak no laran maus, la rai hirus, maibé laran kmanek no neon lós. Rai metin Nia laran kmanek ba ema rihun ba rihun. Perdua nafatin sala sira, maibé, hatene lós ema nebé sala ho ema nebé la sala. Inan aman nia salan monu ba oan sira leten, oan sira nia salan monu ba bei-oan sira leten to’o derasaan tolu no háat”. Moisés monu kedas ba rai hodi hakneak no hakruk to’o rai harohan, dehan: Itaboot haré karik ha’u di’ak iha Ita futar oin, ne’e sá simu ha’u nia harohan; haraik tulun hodi la’o iha ami leet. Tebes duni, ami povo ida sala na’in, maibé Na’i, perdua ami salan tomak; halo ami sai Ita liman rohan”. Moisés hela hamutuk ho Na’i iha fatin nebá; la han la hemu iha loron háat nulu no kalan háat nulun nia laran. Na’i hakerek iha ai kabelak liafuan sira aliança nian: ukunfuan sira be sanulu.

Maromak Futar Lia.

 

Salmo Responsorial                                                                                                       Sal. 102(103). 6-7, 8-9, 10-11, 12-13 (R. 8ª)

Refrão : Na’i laran-luak no laran maus!!! Repete-se

Na’i halo justice.

No tahan ema sira be kiak no terus todan.

Nia hatudu Nia dalan ba Moisés,

No kbiit ba Israel oan sira. Refrão

 

Na’i laran di’ak no laran maus,

La rai hirus no laran di’ak tebes;

La si’ak bei-beik no hatatan,

La rai hirus ba nafatin. Refrão

 

La hare ita tuir hahalok áat,

La selu ita tuir ita salan;

Hanesan lalehan dook liu housi rai,

Nune’e Nia hatudu nia laran luak

Ba sira be hamta’uk Nia. Refrão

 

Nu’udar loro-sae dook housi loro-monu,

Nune’e, Nia hadook ita housi ita salan;

Nu’udar aman ida hadomi nia oan sira,

Nune’e mós Na’i hadomi sira be hamta’uk Nia. Refrão

 

Aclamação                                                                                                      

Refrão : Aleluia, Aleluia!! Repete-se

Fini mak Maromak futar liafuan sira, Cristo mak karik fini.

Sé mak buka hetan fini ne’e sei hela tinan-ba-tinan.  Refrão

 

Evangelho                                                                                                                                                                                       Mt. 13. 36-3

Na’i Jesus Cristo nia Evangelho nu’udar São Mateus haktuir:

Iha tempo nebá, husik tiha ema lubun boot ne’e, Jesus ba fali uma. Nia escolante hakbesik ba Nia hodi dehan: “Hanourin mai ami aiknanoik kona ba du’ut áat iha to’os”. Nia hatan ba sira: “Ida nebé kuda fini di’ak mak Oan Mane. To’o mak mundo. Fini di’ak mak reino nia oan sira. Funu baluk nebé kuda fini áat mak diabo. Loron ko’a nian mak loron ikus mundo ne’e nian. Sira nebé ko’a mak anjo sira. Ne’e duni, hanesan sira futu du’ut áat hodi sunu iha ahi, nune’e mós sei mosu wainhira mundo sei to’o nia rohan. Oan Mane sei haruka nia anjo atu hasa’e tiha housi reino sira hotu nebé fó exemplo áat no sira hotu nebé halo áat, hodi soe sira ba ahi lakan; iha nebá sira sei tanis no ruun nehan. Ema di’ak sira sei nabilan hanesan loron iha sira Aman nia reino. Ema nebé iha tilun, rona ba!”

Lia Maksoyn.

Leave a Reply

Your email address will not be published. Required fields are marked *