shadow
Diocese de Dili > NOTÍCIAS > LETURA DIÁRIA > Sexta – Feira, XVII Semana Tempo Comum (ANO C)

Sexta – Feira, XVII Semana Tempo Comum (ANO C)

Primeira Leitura                 Lev. 23. 1, 4-11, 15-16, 27, 34b-37

Lia housi Livro Levítico:

Na’i lia tun ba Moisés nune’e: “Loron festa Na’i nian mak hirak ne’e, loron assembleia santa nian nebé iha nia tempo lolós, ó sei bolu hamutuk Israel oan sira.

Iha loron sanulu resin háat, fulan ba dala uluk nian, molok rai atu kalan, sei celebra Páscoa hodi hahí Na’i; no iha loron sanulu resin lima fulan ne’e nian imi sei halo Festa Pão Azimos nian, hodi hahí Na’i. Iha loron hitu nia laran, imi sei han de’it pão la ho fermento. Iha loron ba dala uluk, imi sei iha assembleia santa ida, imi sei la halo serviço todan. Iha loron hitu nia laran, imi sei hasa’e sacrifício ksolok nian ba Na’i hodi hasa’e buat karan tunu iha ahi. Iha loron da dala hitu, imi sei iha assembleia santa ida; imi sei la halo serviço todan.

Na’i lia tun teni ba Moisés nune’e: “Ó ko’alia ba Israel oan sira hodi dehan nune’e: ‘Wainhira imi to’o iha rai nebé Ha’u hatudu ba imi, iha nebá, wainhira imi sohi haré eh batar, imi nia to’os nia fuan, nebé imi sohi ba dala uluk, imi sei lori futun ida-idak ba na’ilulik. Nia hasa’e ba Na’i, atu iha Na’i nia futar oin Na’i bele haksolok ho imi. Na’ilulik sei hasa’e ba Na’i nune’e, iha loron be tuir sábado.

Im sei sura semana hitu lolós, hahu housi loron tuir sábado, iha loron nebé imi lori futun aihan fulin mai hodi hasa’e ba Na’i. Imi sei sura to’o loron lima nulu, tuir loron sábado ba dala hitu, imi sei hasa’e tan sacrifício ida ba Na’i.

Imi sei sura semana hitu lolós, hahu housi loron tuir sábado, iha loron nebé imi lori futun aihan fulin mai hodi hasa’e ba Na’i. Imi sei sura to’o loron lima nulu, tuir loron sábado ba dala hitu, imi sei hasa’e tan sacrifício ida ba Na’i.

Tuir buat hirak ne’e, iha loron sanulu ba fulan dala hitu, mak loron Hamos-an nian. Imi sei iha assembleia santa ida; imi sei halo penitência hodi hasa’e ba Na’i sacrifício ksolok nian housi ahi.

Housi loron sanulu resin lima fulan ba dala hitu nian, iha loron hitu nia laran imi sei halo Festa Tenda nian hodi hahí Na’i. Iha loron ba dala uluk imi sei iha assembleia santa ida; imi sei la halo serviço todan ida. Iha loron hitu nia laran, imi sei hasa’e ba Na’i sacrifício ksolok nian housi ahi. Iha loron ba dala ualu imi sei iha assembleia santa ida; imi sei hasa’e ba Na’i sacrifício ksolok nian housi ahi. Loron ne’e mak loron ikus liu ba assembleia; imi sei la halo serviço todan iha loron nebá.

Hirak ne’e mak loron santo ba Na’i, iha nebé imi sei halibur malu, halo assembleia santa sira atu hasa’e ba Na’i sacrifício ksolok nian housi ahi, sacrifício ho balada sira, sacrifício hasa’e pão no tua nian, no sacrifício seluk-seluk tan, tuir ceremônia loron ida-idak nian.

Maromak Futar Lia.

 

Salmo Responsorial                                                                                                                Sal. 80(81). 2-4, 5-6ªb, 10-11ab (R. 2ª)

Refrão : Hahí Maromak ba, ita nia Kbiit!!! Repete-se

Haksolok iha Maromak basá Nia ita kbiit,

Hahí Jacob nia Maromak ba;

Hahí no hananu hodi harpa no lira nia lian,

Iha loron sira festa nian. Refrão

 

Nu’udar lei ida ba Israel,

Ukunfuan ida Maromak Jacob nian;

Nu’udar ordem nebé Nia fó ba José,

Wainhira sai housi rai Egipto. Refrão

 

Ó seo la iha tan maromak seluk,

Ó sei la adora tan maromak rai seluk nian;

Ha’u mak Na’i, ó nia Maromak,

Nebé halo ó sai housi rai Egipto. Refrão

 

Aclamação

Refrão : Aleluia, Aleluia!! Repete-se

Maromak Nia liafuan hela ba nafatin.

Ne’e mak liafuan di’ak nebé haklaken tiha ba imi.  Refrão

 

Evangelho                                                                                                                                                                                    Mt. 13. 54-58

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus fila ba nia rain. Nia hanourin iha sinagoga, halo ema hotu hakfodak hodi dehan: “Nia maktenek ho nia kbiit hodi halo milagre hirak ne’e mai lós housi nebé? Nia la’os badaen ai nia oan? Nia inan nia naran la’os Maria, no mós nia maun alin nia naran la’os Tiago, José, Simão ho Judas? Nia feton la hela hamutuk ho ita? Ne’e duni, buat hirak ne’e hotu, Nia hetan lós housi nebé?” No sira lakohi simu Nia. Maibé Jesus dehan ba sira: “Iha Nia rai de’it no iha Nia uma rasik mak ema hewai Profeta ida”. Nia la halo milagre barak iha nebá, tan ema sira la fiar.

Lia Maksoyn.

Leave a Reply

Your email address will not be published. Required fields are marked *