shadow
Diocese de Dili > NOTÍCIAS > REFLEXÃO > RIKU IHA MUNDO-KIAK IHA LALEHAN

RIKU IHA MUNDO-KIAK IHA LALEHAN

(Leitura no Reflexão ba Domingo Comum XVIII-Ano C 2019)

 

Primeira Leitura      Co. (Ecle) 1, 2; 2, 21-23

Lia housi Livro Eclesiastica:

“Sasán furak no kmanek ema nian – hateten Coeleth – sasán furak no kmanek wain ema nian, furak no kmanek leet de’it!” Ema bele serviço ho ulun, bele serviço ho matenek, bele serviço to’o rohan: nia sei husik nia riku-soin ba ema nebé la tau liu liman ba serviço ne’e. Serviço ida ne’e, kmanek leet de’it. Serviço ida ne’e, susar boot ida. Ne’e duni, ema ida ne’e, nia badinas karik ba, nia matenek boot karik ba, nia fakar kosar-wén iha rai-klaran karik ba, nia hetan sá ida lós ho buat hirak ne’e hotu? Loron-loron nia hetan mak neon-sala iha nia moris tomak. Ninia badinas sai naha boot ida. Kalan mós, nia laran la metin, la hakmatek. Buat hirak ne’e hotu, kmanek leet de’it, furak leet de’it”.

Maromak Futar Lia.

 

Salmo Responsorial                                                                                                                                           Sal. 94(95), 1-2. 6-7. 8-9

Refrão : Ohin imi rona karik Na’i nia lian, Imi keta haksumik imi laran!!! Repete-se

Mai hananu haksolok,

Mai haklaken ita nia kbiit maksoyn.

Hakbesik ba Na’I hodi fó agradece;

Hananu haksolok ba ita Na’in. Refrão

 

Mai, tuku-tur ba rai,

Hana’i Maromak be hakia’ak ita.

Na’i, ita nia Maromak;

Ita nia povo, Nia bibi oan. Refrão

 

Rona Na’i nia lian,

Keta haksumik imi laran,

Hanesan uluk iha rai fuik maran,

Imi aman sira koko Ha’u,

Maski sira hare kmanek oin-oin Ha’u halo ba sira. Refrão

 

Segunda Leitura                                                                                                                                                                    Col. 3, 1-5. 9-11

Lia housi São Paulo nia surat ba sarani sira iha Colósso:

Maun-alin sira: imi moris hias ona ho Cristo! Tan ne’e, imi sei tau matan de’it ba sasán leten nian. Cristo moris hias, iha lalehan, tur iha Aman Maromak sorin kwanan. Imi nia laran sei monu de’it ba lalehan nia di’ak. Keta hadomi sasán rai-klaran ne’e nian. Imi nia moris subar hela iha Maromak, hamutuk ho Cristo, tan imi mate tiha ona ho Cristo. Wainhira Cristo hiit-An fila hikas mai, imi nia moris sei sai kmanek lolós hanesan Cristo nian. Basá, Cristo imi nia moris hun. Ne’e duni, halo susar imi nia laran nebé hakarak tuir rai nia lisan áat. Katak: moris áat, sala fo’er, lisan áat sira, hanoin áat, karak-ten. Salan sira ne’e halo ema hanesan adora lulik. Imi be soe tiha ona imi nia ema tuan ho nia hahalok áat sira, imi sira ne’e keta lohi malu! Imi, ema foun ona, ema foun nebé hafoun-an nafatin tuir Maromak nia ílas atu bele sai ema matenek lolós. Oras ne’e, la iha ona grego ka judeu; la iha ona ema simu circuncissão ka ema la dauk simu circuncissão; la iha ona atan ka ema la atan ona. Cristo mak iha, Cristo mak tomak, Cristo mak hôrik iha ema hotu-hotu.

Maromak Futar Lia.

 

Aclamação                                                                                                                                                                                           Lc. 21, 36

Refrão : Aleluia, Aleluia!! Repete-se

Neon moris, hamutuk nafatin,

Atu imi bele hasouru Mane Maksoyn. Refrão

 

Evangelho                                                                                                                                                                                      Lc. 12, 13-21

Na’i Jesus Cristo nia Evangelho nu’udar São Lucas haktuir:

Iha tempo nebá, housi ema lubun sira leet, ema ida dehan ba Jesus: “Mestre, dehan ba ha’u nia maun atu fahe liman-rohan ba ho ha’u”. Maibé, Jesus hatán ba nia: “Belun, sê mak foti Ha’u ba Juíz? Sê mak haruka Ha’u atu fahe imi nia sasán?” Hotu tiha, Jesus lia tun ba sira hotu: “Imi loke matan haré: Keta kaan sasán naran-naran de’it! Laós ema nebé iha soin barak mak hetan moris naruk!” Hafoin, Jesus haktuir aiknanoik ida ne’e: “Ema riku ida nia toos maka’as teb-tebes. Ema ne’e, tur hanoin iha nia laran nune’e: ‘Ha’u sei halo sá lós, atu bele halot ha’u nia ai-han wa’in ne’e?’ Hafoin dehan: ‘Ha’u ba halo nune’e: Ha’u sei ba sobu hotu, ha’u nia armazém sira, hodi fali armazém boot; iha nebá, ha’u sei halot ha’u nia trigo no sasán hotu. Hafoin, ha’u sei dehan ba ha’u nia klamar: ‘Klamar, ó iha buat barak, halot hela ba tinan barak. Descansa hodi han hemu hakmatek’. Maibé, Maromak hatán ba nia: ‘Laran makerek! Kalan ne’e duni sira sisi ó atu saran ó nia klamar. Buat nebé ó halibur hela, hela ba sê lós? Nune’e mós, ema nebé halibur hamutuk riku-soin ba nia an rasik, maibé, ki’ak hela iha Maromak Futar oin”.

Lia Maksoyn.

 

 

Reflexão;

RIKU IHA MUNDO-KIAK IHA LALEHAN

Sasan furak no kmanek ema nian, furak no kmanek leet deit!… nia hetan saida los husi buat hirak nee hotu? Jesus dehan: Laós ema nebé iha soin barak mak hetan moris naruk! Se mak hakarak resin sasan oi-on husi liur, nee tanba nia mamuk husi laran (Pe Leo scj). Tanba nee mak São José Maria Escrivá (Fundador: OPUS DEI) hatete lia murak ida nunee: “Laos ita hotu bele sai riku, sai matenek, sai conhecido maibé, ita hotu hetan bolu ba santidade”.

Domingo semana ida nee, ita hanai no agradece ba Maromak basá, Ninia Futar Lia Fuan lori ita nia atenção oinsa la bele fo importância deit ba sasan mundo nian maibé, precisa mos fo importância ba sasan lalehan nian (moris santidade).

 Livro Eclesiástica (Coelet) iha primeira leitura hamosu lia makhusuk/pergunta nebé dehan:”sa lerek mak ema hetan liu husi ninia esforço sira be nia halo?// “Apa faedah yang diperoleh manusia dari segala usaha yang dilakukannya?” ”, São Paulo iha segunda Leitura aconselha sarani Colossense sira dehan:”… imi sei tau matan de’it ba sasan leten nian… Imi nia laran sei monu deit ba lalehan nia diak. Keta hadomi sasan rai-klaran nee nian. Imi nia moris subar hela iha Maromak, hamutuk ho Cristo, tan imi mate tiha ona ho Cristo”.

Jesus Cristo rasik iha Evangelho São Lucas nian, convida ita Cristão Católico nobun hodi hanoin didiak riku-soin be ita hetan iha rai nee. Jesus hamosu pergunta ida dehan: ”Buat nebé ó halibur hela, hela ba se los?”. Iha Evangelho nia rohan Jesus bolu atenção forte liu tan hodi dehan:”…, ema nebé halibur hamutuk riku-soin ba nia-an rasik, maibé, ki’ak hela iha Maromak futar oin”.” 

 Iha leitura tolu (Primeira-Segunda leitura no Evangelho), ita la hetan impressão eh ordem ruma atu ita desvaloriza riku soin iha rai nee, nem hodi hadook-an tiha husi buat hirak nee. Basá, ema nudar criatura Maromak nian, sempre precisa no iha direito atu hetan sasan (material) atu bele sustenta moris ho digno. Maibé, furak no kmanek liu wainhira sasan nebé ita hetan iha rai nee, halo ita hatene kmanek oinsa Maromak nia glória.

Ema iha ou hetan riku soin barak nudar rezultado husi nia kosar ben, nee la bandu nem contrário ho Maromak nia vontade. Maibé, riku soin be horik iha rai nee, precisa utiliza ba ema hotu nia necessidade tuir dalan nebé kmook. Jesus, iha ai-knanoik nebé haktuir iha Evangelho São Lucas; hanorin doutrina ida hodi sai hanesan mata dalan eh bukae atu ita bele moris nudar ema liliu nudar Cristão Católica. Moris nudar Maromak nia emar nebé hatene haré ema seluk hanesan maun alin tan Cristo nia moris hias iha graça espírito Baptismo nian. Labele kaan ten resin ba sasan basa Jesus dehan: Laós ema nebé iha soin barak mak hetan moris naruk!

Jesus laos bandu atu ema esforço-an serviço hetan riku soin barak, maibé, Jesus fo hanoin nafatin atu ema la bele sai ema nebé kaan ten resin ba riku soin, hakarak hetan mesak, hakarak bou riku soin ba-an rasik, hakarak ukun mesak, hakarak hadau poder, hakarak nia partido mak diak deit, hakarak nia grupo arte marciais mak diak liu. Iha ita nia sociedade, existe maluk Cristão Católico lobuk ida mak  sai corruptor, sai mafia, sai distribuidor droga, sai agente ba tráfico humano, sai broker hodi facilita ema estrangeiro tama mai barbarak iha Timor, inclui mos comete iha ação crime oin-oin nebé cria desordem iha sociedade no pior liu tan hatun imagem Timor Leste hanesan nação foun.

Santo Padre Francisco iha nia mensagem tinan 2015 crítica sociedade ohin loron hodi dehan:”Numa sociedade embriagada pelo consumo, prazer, abundância, luxo, aparência e narcisismo, Jesus nos chama a um comportamento sóbrio, simples, equilibrado, linear, capaz de entender e viver o essencial”.

Jesus deseja katak; riku soin nebé ita iha; sai hanesan sasukat diak atu ita mos hetan riku soin iha Maromak futar oin. Atu hetan riku soin iha Maromak nia futar oin, ema precisa tau mos importância ba Reino Lalehan atu ita nia moris aban bainrua (Moris klamar nian) hetan mos diak. Tanba nee mak; Jesus iha Ninia Evangelho bolu atenção hodi dehan: “Buat nebé ó halibur hela, hela ba se los? Nune’e mos, ema nebé halibur hamutuk riku-soin ba nia an rasik, maibé, ki’ak hela iha Maromak futar oin”.

Se ita reflecte didiak relato Evangelho semana nee, liliu Nai Jesus nia ai-knanoik kona ba ema riku ho nia armazem (gudang), ita bele compreende realidade balu iha moris nee. Tuir lolos, riku soin nebé ema hetan atu facilita ema nia moris maibé, iha cidade Dili por exemplo; afinal kareta motor barak demais too impede tiha movimento ema nian. Agarafamento/kemacetan halo funcionário estado barak la serviço efectivo, estudante barak tama escola tarde, inclui mos acidente tráfico nebé loron ba loron acontece bebeik. Ema sosa motor eh kareta tanba orgulho pessoal (bangga diri) laos tanba necessidade. Se tanba necessidade karik, maibé, depois desvia tiha utilização nee. Exemplo; família ida sosa motor ida ho intenção atu facilita fen, lean no oan sira la bele tarde ba missa maibé, realidade nebé ita haré mak; laen tulan deit fen ho oan sira mai too portão Igreja hafoin laen lori fali nia motor eh kareta nee hodi fila ba uma.  Too momento sira hanesan nee, ita bele hanoin, será que riku soin hanesan kareta eh motor fo benefício/valor ba ema nia moris sarani? Eh keta loron sábado, Domingo ho loron férias sira, foin sae (jovem) barak nadodon ba santuário Ramelau hodi hasai foto tau iha facebook deit?

Iha sorin seluk, ema barak mos lamenta ho agarafamento (kemacetan) tráfico. Maske nune’e, produção kareta motor tinan ba tinan aumenta liu tan no ema rihun ba rihun mos hakarak nafatin sosa produção hirak nee. Jesus simplesmente fo imagem kona ba situação ohin loron liu husi ai-knanoik kona ba ema riku; ninia colheita sira tina-tinan aumenta too fatin la suficiente atu tau. Nune’e, ema riku ne’e hanoin atu hari’i fatin foun nebé boot liu tan atu nune’e, riku soin sira bele tau iha neba hodi sustenta nia moris ba tempo naruk. Nee nudar expressãp ida husi ema nia kaan ten nebé rohan laek. Ohin hakark ida nee, aban hakarak ida neba. Até kaben nain sira mos ohin gosta feto ida nee, aban gosta tan ida neba. Fen sira mos haré novidade nee, sira mos halo aksi balas dendam maibé kuitadu, oan sira banati hahalok diak saida husi mentalidade nee?

Afinal, maneira hanoin, atitude no lalaok hanesan nee Jesus considera hanesan lalaok beik nian. Se riku soin hirak nee fo ksolok ba nia-an deit, nee so fo ksolok durante nia moris deit. Riku soin refere la garante continuidade moris no ksolok iha mundo seluk.

Aban bainrua iha Maromak Futar Oin, sasukat no lalaok diferente ho mundo nian sasukat. Se ita hanoin deit diak ba an rasik, Jesus haré katak nee hanoin beik no kloot. Hanoin hanesan nee halo ema habosok-an deit ho imaginação nebé la fixo. Riku soin nee loron ida sei mohu nune’e deit maibé, graça Maromak nian sei horik ba nafatin. Precisa ita recorda nafatin Jesus nia lia menon iha Evangelho be tenik: ”Buat nebé ó halibur hela, hela ba se los? Nune’e mos, ema nebé halibur hamutuk riku-soin ba nia an rasik, maibé, ki’ak hela iha Maromak futar oin”. Ema hanoin katak; hodi harí uma andar boot sira, furak, naroman, nudar kmaenk rohan laek. Nee pensamento nebé falha iha Maromak nia Futar Oin; Basá, buat hirak nee dura kalan ida deit (alias loron baluk deit).

Ema Católico nebé simu we baptismo, precisa coloca Cristo nudar centro ba nia moris. Ba ida ne’e, matenek nain fiar nian balu hatete:” É Inutil ter Cristo nos lábios e o mundo no coração//la iha folin wainhira temi Cristo iha ibun no tau liu mundo iha fuan”. Tuir los, tau Cristo iha fuan no coloca mundo iha ibun deit.

Wainhira ita kaan bei-beik hodi halibur riku soin sira bar-barak, nune’e ita nia klamar mos kiak-krekas ba bebeik. Nune’e ita la hamrook ona ba sasan lalehan nian. Mundo ohin loron lori dadaun Cristão Católico sira barak mak monu tama iha onda/arus ida nee. Papa Francisco iha ninia homília wanhira visita America Latina hateten:”mundo ohin loron halo ema halibur riku-soin bulak rai too haluha tiha Jesus Cristo”.

Mai ita nobun contempla no reflecte mensagem semana nee hodi hamoris fali sentimento hamrook ba moris santidade iha Maromak Futar Oin. Hadook-an bebeik husi kaan resin ba riku soin, interece privado, interece partido, interece grupo, soe tiha egoismo, hapara corrupção, hadook-an husi droga, la bele involve tráfico humano, hakribi aborto, nee significa katak; ita halibur dau-daun riku soin iha Maromak nia oin. Utiliza ita nia riku soin sira didiak hodi descobre Maromak nia glória. Ba ida nee, Papa Francisco dala ida tan iha nia mensagem hatete nunee: ”Cristão mak ema ida nebé hanoin no halao moris tuir Maromak nia hakarak iha Espírito Santo//O Cristão é uma pesoa que pensa e age de acordo com Deus, de acordo com o Espirito Santo”. Nee duni, Maun alin sira: Imi moris hias ona ho Cristo! Tan ne’e, imi sei tau matan de’it ba sasan leten (lalehan) nian. Assim Seja e Bem Haja. (Ignaslopes).

Leave a Reply

Your email address will not be published. Required fields are marked *