shadow
Diocese de Dili > NOTÍCIAS > LETURA DIÁRIA > Sábado, XVII Semana Tempo Comum (ANO C)

Sábado, XVII Semana Tempo Comum (ANO C)

Primeira Leitura                 Lev. 25. 1, 8-17

Lia housi Livro Levítico:

Na’i ko’alia nune’e ba Moisés iha foho Sinai: “Ó sei sura semana hitu tinan-tinan, katak, tinan hitu dala hitu; nune’e sei hetan semana hitu iha tinan-tinan, iha tinan hatnulu resin sia. Iha loron sanulu fulan ba dala hitu, ó sei haruka fó hatene ba ema tomak hodi trombeta nia lian. Ne’e mak Loron Penitência nian; imi sei huu trombeta iha imi nia rai laran tomak. Housi tinan lima nulu ba lima nulu seluk, imi sei celebra Tinan Santo ida hodi haklaken ema tomak nia liberdade iha nação laran. Sei sai nu’udar festa boot ida ba imi; ida-idak sei simu fila fali nia riku-soin hodi ba hamutuk fali nia família. Tinan lima nulu ne’e sei sai nu’udar tinan festa boot nian ba imi; imi sei la kuda, sei la sohi. Hanesan tinan santo no graça nian ba imi; imi sei han buat nebé rai fó.

Iha tinan graça nian ne’e, ida-idak sei simu fila fali nia riku-soin. Imi fa’an eh sosa karik buat ruma housi maun-alin seluk, imi sei buka atu keta halo áat nia maun-alin. Wainhira ó sosa buat ruma housi ema seluk, eh fa’an ba nia, buka hatene tinan hira liu ona housi tinan santo. Wainhira nia fa’an karik buat ruma ba ó, nia buka hatene tinan hira liu ona housi tinan nia sohi. Buat nebé iha ona tinan barak, nia folin mós boot; buat nebé iha tinan uitoan, nia folin mós uitoan, basá, nia fa’an tuir tinan hirak nebé nia sohi. Imi ida keta halo áat ba imi nia maun-alin seluk; ó sei hamta’uk ó nia Maromak. Ha’u mak Na’i, imi nia Maromak.

Maromak Futar Lia.

 

Salmo Responsorial                                                                                                                             Sal. 66(67). 2-3, 5, 7-8 (R. cf. 4)

Refrão : Na’i, povo rai tomak nian, hahí Ita!!! Repete-se

Maromak hanoin ita, haraik bensa mai ita,

Hatudu mai ita, Nia futar oin nabilan.

Iha rai-klaran, ema sei hatene Nia dalan;

Iha povo sira leet, ema sei hatene Nia maksoyn. Refrão

 

Reino hot-hotu sei haksolok,

Tan Itaboot tesi lia ho justiça,

Hodi ukun reino hotu iha rai. Refrão

 

Rai fó ona nia fuan;

Na’i, ita nia Maromak, haraik bensa mai ita.

Na’i haraik mai ita, Nia bensa;

Hahí Nia housi rai-ikun to’o rai-ulun. Refrão

 

Aclamação

Refrão : Aleluia, Aleluia!! Repete-se

Maromak Nia liafuan hela ba nafatin.

Ne’e mak liafuan di’ak nebé haklaken tiha ba imi.  Refrão

 

Evangelho                                                                                                                                                                                             Mt. 5. 10

Na’i Jesus Cristo nia Evangelho nu’udar São Mateus haktuir:

Iha tempo nebá, liurai Herodes rona kona ba Jesus nia naran boot. Herodes dehan ba nia emar sira: “Tebes, ema ne’e João Baptista nebé moris fali ona! Tan ne’e nia iha kbiit atu halo milagre sira”.

Herodes káer duni João hodi futu nia ho corrente no hatama nia iha kadeia tanba Herodiades, nia alin Filipe nia káben; basá João dehan ba nia: “Ó la bele hola nia”. Herodes hakarak oho João maibé nia ta’uk povo basá povo haré nia nu’udar profeta. Maibé iha loron nebé Herodes halo tinan, Herodiades nia oan feto dansa iha ema hotu nia oin hodi fó ksolok ba Herodes. Tan ne’e, nia hakotu lia ho juramento atu fó ba fetoran ne’e buat hotu nebé nia husu. Hodi nia inan nia liafuan, nia hatan: “Fó mai ha’u João Baptista nia ulun iha bikan boot ida”. Liurai neon susar, maibé tanba nia juramento no nia bainaka sira, nia haruka ema atu tesi João na ulun iha kadeia laran hodi lori mai. Sira lori ulun mai iha bikan ida hodi fó ba fetoran nebé fó fali ba nia inan. João nia escolante sira mai foti nia isin hodi ba hakoi; hafoin sira ba fó hatene ba Jesus.

Lia Maksoyn.

Leave a Reply

Your email address will not be published. Required fields are marked *