shadow
Diocese de Dili > NOTÍCIAS > LETURA DIÁRIA > Segunda – Feira, XVIII Semana Tempo Comum (ANO C)

Segunda – Feira, XVIII Semana Tempo Comum (ANO C)

Primeira Leitura                 Num. 11. 4b-15

Lia housi Livro Número nian:

Iha loron hirak nebá, Israel oan sira hateten nune’e: “Sé mak sei fó na’an mai ita atu han? Ita hanoin hetan fila fali ikan nebé ita han ‘de graça” de’it iha rai Egipto; pepino, pateka, lis no lis-asu la susar ba ita! Oras ne’e, ita susar ba buat hotu! La iha buat ida iha ne’e! Iha de’it maná!”

Maná ne’e hanesan coentru musan no atu haré hanesan goma-ai-ben. Povo ida-idak sai atu hili; hafoin, dulas rahun eh fai rahun. Tuir mai te’in hodi halo bolo. Midar hanesan dosi be halo ho mina. Kalan, wainhira maha-wén monu iha acampamento, monu mós maná.

Moisés rona povo tanis, ida-idak iha nia família, iha odamatan tenda nian. Maromak Nia castigo boot tebes, halo Moisés neon sala. Nune’e, Moisés hasa’e lia ba Na’i dehan: “Tan sá Ita halo terus Ita atan? Tan sá Ita la haré hodi tau povo ne’e iha ha’u liman? Povo ne’e ha’u mak ko’us? Ha’u mak halo moris povo ne’e atu Itaboot halia mai ha’u: ‘Kele nia didi’ak hanesan inan hakiak ida kele kosok-oan ida, to’o iha rai nebé Ha’u hakotu nanis ona ho juramento ba nia bei-ala sira?’ Ha’u sei ba hetan na’an iha nebé atu fó ba povo ne’e hotu? Tan sira mai tanis iha ha’u oin hodi dehan mai ha’u: ‘Fó na’an mai ami atu han’. Ha’u mesak sei la bele halo buat ida ba povo ne’e; ne’e todan tebes mai ha’u. Ita hakarak fó todan ne’e mai ha’u karik, ne’e sá, di’ak liu halo ha’u mate tiha; ha’u monu karik ba Ita matan, halo, atu ha’u la haré tan terus ne’e”.

Maromak Futar Lia.

 

Salmo Responsorial                                                                                                                                          Sal. 80(81). 12-17 (R. 2ª)

Refrão : Haksalak iha Maromak, Nia ita nia tulun!!! Repete-se

Ha’u Nia povo la rona Ha’u lian,

Israel la halo tuir Ha’u Nia liafuan;

Tan ne’e, Ha’u saran ba sira fuan tós,

Husik sira tuir sira nia hakaran. Refrão

 

Oh! Ha’u Nia povo rona karik Ha’u,

Israel tuir karik Ha’u dalan,

Sira nia funu baluk sira sei hakru’uk ba sira,

Ha’u Nia liman sei mai hasouru funu baluk sira. Refrão

 

Ema sira nebé la hatene Na’i, hahí nia,

Nia moris sei tuba rai metin nafatin;

Ha’u sei fó han nia ho aihan di’ak nian,

Ha’u sei fó hemu nia ho wani-wén foho nian. Refrão

 

Aclamação                                                                                                                                                                                            Mt. 4. 4b

Refrão : Aleluia, Aleluia!! Repete-se

Ema la moris de’it ho aihan, maibé ho liafuan

Sira nebé sai housi Maromak futar ibun. Refrão

 

Evangelho                                                                                                                                                                                     Mt. 14. 13-21

Na’i Jesus Cristo nia Evangelho nu’udar São Mateus haktuir:

Iha tempo nebá, rona tiha katak ema oho ona João Baptista, Jesus sa’e ba ró ida hodi ba mesak iha rai fuik maran; maibé hatene tiha ne’e, ema lubun boot husik cidade sira hodi la’o tuir buka Nia. Tun housi ró hodi haré ema barak ne’e, Nia hanoin teb-tebes sira hodi fó isin di’ak ba sira nebé moras.

Loraik daudaun ona, escolante sira hakbesik ba Nia hodi dehan: “Fatin ne’e rai fuik, no kalan besik ona; haruka ema sira ne’e ba ona, atu sira bele sosa aihan iha knua sira”. Nune’e Jesus dehan ba sira: “Sira lalik ba; imi rasik fó han sira ba”. Sira hatan ba Nia: “Ami iha de’it pão fuan lima no ikan rua”. “Lori sira mai”, Nia dehan. Hafoin Nia haruka ema lubun boot tur iha du’ut leten. Nia káer pão fuan lima no ikan rua ne’e, foti matan ba Lalehan hodi fó bensa. Tuir mai Nia silu pão sira ne’e hodi fó ba escolante sira; hafoin sira fahe ba ema lubun boot. Sira hotu han to’o bosu; baluk sira nebé resin, sira tau ba luhu sanulu resin rua nakonu! Ema sira nebé han hamutuk mane rihun liman, la sura feto no labarik.

Lia Maksoyn.

Leave a Reply

Your email address will not be published. Required fields are marked *