shadow
Diocese de Dili > NOTÍCIAS > LETURA DIÁRIA > Terça – Feira, XVIII Semana Tempo Comum (ANO C)

Terça – Feira, XVIII Semana Tempo Comum (ANO C)

Primeira Leitura                 Num. 12. 1-13

Lia housi Livro Número nian:

Iha loron hirak nebá, Maria ho Aarão hateten áat Moisés, tan de’it nia káben, feto housi Etiópia. Tebes duni, nia káben ho feto Etiópe ida. Sira dehan: “Ba Moisés de’it mak Na’i ko’alia? La ko’alia mós ba ita?” Na’i rona hela sira ko’alia. Moisés, ema ida nebé haraik-an teb-tebes; iha rai ne’e, la hetan ema ida nebé haraik-an hanesan nia.

Teki-tekir, Na’i dehan ba Moisés, Aarão no Maria: “Imi na’in tolu mai iha Tenda Hasouru Malu nian”. Sira na’in tolu ba. Nune’e, Na’i tun mai housi riin kalohan nian ida hodi hela iha Tenda nia odamatan. Hafoin bolu Aarão ho Maria, sira na’in rua hakbesik ba Na’i. Na’i dehan ba sira: “Imi rona didi’ak Ha’u Nia liafuan ba: Iha karik imi leet profeta ruma, Ha’u hatudu Ha’u-an ba nia hanesan mehi ida, eh ko’alia ho nia iha mehi ida. Maibé, Ha’u la halo nune’e ho Ha’u Nia atan Moisés: Nia ema ida nebé Ha’u tau neon; nia ema housi Ha’u nia uma laran rasik. Ba nia, Ha’u ko’alia oin ho oin, haré ho matan rasik, la hodi mehi; Nia haré Na’i nia lalatak rasik! Tan sá imi la ta’uk ko’alia hasouru Ha’u atan Moisés?”

Na’i hatudu Nia hirus hasouru sira na’in rua. Hafoin, Na’i fila hikas fali wainhira kalohan hadook-an housi Tenda. Iha oras ne’e kedas, Maria hetan moras lepra, halo nia isin tomak mutin hanesan neve. Aarão fila ba Maria, haré ba katak nia hetan ona moras lepra.

Nune’e, Aarão dehan ba Moisés: “Ha’u na’i, sadi’a ami: Keta hamonu sala ne’e mai ami leten, basá, ami halo tan ami beik, atu nia keta sai hanesan kiik-oan ida nebé moris mai housi nia inan nia knotak mate uluk tiha ho isin dodok”.

Nune’e, Moisés harohan ba Na’i hodi dehan: “Na’i sadi’a Ita atan, fó ba nia isin di’ak ba”.

Maromak Futar Lia.

 

Salmo Responsorial                                                                                                    Sal. 50(51). 3-4, 5-6ª, 6bc-7, 12-13 (R. cf. 3ª)

Refrão : Na’i, ami sala duni, sadi’a ami!!! Repete-se

Na’i, sadi’a ha’u, tan Ita laran-luak,

Tan Ita laran di’ak tebes, kasu ha’u salan!

Fase ha’u áat tomak,

Hamos ha’u salan hotu. Refrão

 

Ha’u hatene katak ha’u sala,

Ha’u salan iha hela ha’u oin.

Na’i, ha’u sala hasouru Ita,

Ha’u halo sala iha Ita oin. Refrão

 

Nune’e, Ita tesi lia mai ha’u tuir justiça,

No Ita Nia tesi tuir lialós.

Tanba ha’u moris mai ho sala,

Ha’u inan be sala na’in kô’us ha’u. Refrão

 

Hakiak iha ha’u, Na’i, fuan mós ida,

Hafoun iha klamar, kkbiit foun ida.

Keta soe ha’u dook housi Ita futar oin,

Keta hadook housi ha’u, Ita espírito santidade. Refrão

 

Aclamação                                                                                                                                                                                           Jo. 1. 49b

Refrão : Aleluia, Aleluia!! Repete-se

Na’i, Ita mak Maromak nia Oan Mane,

Ita mak Israel nia Liurai. Refrão

 

Em vez deste Evangelho, pode ler-se  Mt. 15, 1-2, 10-14, como vem logo a seguir, especiamente no Ano A, quando foi lido no dia anterior.

Evangelho                                                                                                                                                                                    Mt. 14. 22-36

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus haruka escolante sira sa’e ró hodi ba uluk tasi sorin ba; Nia fali haruka ema lubun fila ba uma. Haruka tiha sira ba uma. Haruka tiha sira ba uma, Nia sa’e ba foho atu harohan mesak-mesak. To’o kalan, Nia mesak de’it iha nebá. Ró fali kilometro ruma ona iha tasi klaran, laloran baku maka’as, basá anin huu hasouru. To’o kalan fahe ba háat, Nia hakbesik ba sira hodi la’o iha tasi leten. Haré tiha Nia la’o iha tasi leten, escolante sira ta’uk hodi dehan: “Rai na’in ida!” Sira hakilar ho ta’uk. Jesus ko’alia kedas ba sira dehan: “Hakmatek ba! Ha’u mak ne’e: keta ta’uk!” Ne’e duni Pedro hatan dehan: “Na’i, Itaboot mak nebá karik, haruka ha’u ba to’o Itaboot housi laloran leten”. Ne’e duni, Jesus simu: “Mai!” Pedro tun housi ró hodi la’o iha laloran leten atu ba to’o Jesus. Maibé, haré anin huu maka’as, nia tauk hodi hahu mouut. Nia hakilar. “Na’i, soi ha’u!” Jesus lolo liman kedas ba nia hodi káer nia dehan: “Ema fiar kiik, tansá ó laran namlele?” Sira tama tiha ba ró laran, anin maus tiha. Sira nebé iha ró laran monu iha Jesus nia ain hodi dehan: “Tebes duni, Itaboot Maromak Niaa Oan Mane”.

Hakur tiha tasi, sira tun ba rai Geresaré. Hatene tiha Nia, ema sira rai nebá nian ba fó hatene ba maluk sira iha fatin hotu. Sira lori ba Nia moras sira hotu, hodi husu ba Nia atu husik netik sira kona nia tais ninin. No sira nebé kona, hetan isin di’ak.

Lia Maksoyn.

 

Outro Evangelho á escolha, conforme atrás foi indicado:

Evangelho                                                                                                                                                                             Mt. 15. 1-2, 10-14

Na’i Jesus Cristo nia Evangelho nu’udar São Mateus haktuir:

Iha tempo nebá, ema fariseu no escriba balun housi Jerusalém mai ko’alia ba Jesus dehan: “Tansá mak Ita nia escolante sira la tuir lisan bei ala sira nian? Sira la fase liman molok atu han”.

Tuir mai Nia halibur ema lubun boot hodi dehan ba sira: “Rona didi’ak ba hodi buka hatene! La’os buat nebé tam housi ibun mak hafo’er ema, maibé buat nebé sai housi ibun, buat ne’e mak halo ema fo’er”.

Nune’e escolante sira hakbesik hodi dehan ba Nia: “Ita hatene katak fariseu sira laran moras wainhira sira rona Ita ko’alia nune’e?” Nia hatan ba sira: “Ai hotu nebé Ha’u Aman Lalehan la kuda sei fokit tiha. Husik ema sira ne’e ba; sira hanesan matan delek sira nebé buka hatudu dalan ba matan delek sira seluk, sira na’in rua sei monu hotu iha rai kuak”.

Lia Maksoyn.

Leave a Reply

Your email address will not be published. Required fields are marked *