shadow
Diocese de Dili > NOTÍCIAS > LETURA DIÁRIA > Quarta – Feira, XVIII Semana Tempo Comum (ANO C)

Quarta – Feira, XVIII Semana Tempo Comum (ANO C)

Primeira Leitura           Num. 13. 1-2, 25-14. 1, 26-29, 34-35

Lia housi Livro Número nian:

Iha loron hirak nebá, Na’i hateten ba Moisés, iha rai fuik maran Parã nian: “Haruka ema balun ba haré rai Canaã, nebé Ha’u sei fó ba Israel oan sira. Imi sei haruka ema ida housi imi nia uma-kain ida-idak, nebé matenek tebes iha sira leet”. Liu tiha loron hatnulu, ema sira ne’e fila fali mai, wainhira sira haré didi’ak tiha rai nebá. To’o mai, Sira ba hasouru Moisés, Aarão no comunidade tomak Israel nian iha Cades, iha rai fuik maran Parã nian. Sira fila housi rai nebá ho ai-funan oi-oin no buat seluk-seluk tan, hodi hatudu ba comunidade tomak.

Sira haktuir nune’e ba Moisés: “Ami ba rai nebé ita haruka ami ba; tebes, iha nebá suli duni susu-wén no wani-wén, no ami lori ai-funan housi rai nebá nian mak ne’e. Maibé, povo nebé moris iha rai nebá iha kkbiit, sira nia cidade sira mesak bobo’ot de’it, soldado sira hein metin cidade hirak ne’e. Iha nebá, ami haré mós Anac nia bei-oan sira; amalecita sira hôrik iha rai Nugueb; hitita sira, jebuseu sira no amorreu sira hôrik ba iha foho, no cananeu sira hela besik tasi no iha mota Jordão nia sorin-sorin”. Hafoin, Caleb haruka ema hotu nonok tiha iha Moisés nia oin, hodi dehan: “Ita sa’e ba, hodi hadau tiha rai ne’e; ita bele hasai tiha rai mai ita”. Maibé, ema sira ba hamutuk ho nia, dehan: “Ita la bele ba funu hasouru povo ne’e, basá, nia kkbiit maka’as liu ita”. Sira hahu haktuir buat áat kona ba rai nebé sira haré hodi dehan ba Israel oan sira; Rai nebé ami ba haré, rai ne’e tolan nia emar sira; ema hotu iha nebé ami haré iha nebá mesak ain áas de’it. Ami haré iha nebá gigante sira – derasaan Anac nian, nebé rasa gigante sira nian – Ami haré ba ami-an rasik hanesan klala’ek sira iha sira oin”.

Nune’e, comunidade tomak hahu hakilar ho lian maka’as, no povo tanis iha kalan ne’e tomak. Na’i lia tun ba Moisés no Aarão nune’e “To’o wainhira lós mak Ha’u bele tahan ema laran áat sira ne’e, no sira nebé hamúu hasouru Ha’u? Ha’u rona Israel oan sira nia hamúu hasouru Ha’u. Tan ne’e, ó ba dehan ba sira: ‘Tebes duni, hanesan Ha’u moris – Na’i futar lia – nune’e, Ha’u sei halo ba imi, tuir buat nebé imi hato’o mai Ha’u tilun. Imi hotu nebé tau ona naran iha livro arrolamento nian ho tinan ruanulu ba leten, nebé hamúu hasouru Ha’u, sei mate hotu iha rai fuik maran ne’e. Imi ba haré rai nebá hamutuk loron hatnulu nia laran. Loron ida sei sai hanesan tinan ida. Nune’e, imi sei terus iha tinan hatnulu nia laran, tan imi nia salan sira todan; nune’e mak imi sei hatene oinsá Ha’u sei fó castigo ba imi. Ha’u mak Na’i nebé ko’alia: Nune’e mak Ha’u sei fó castigo ba comunidade áat nebé hamriik hasouru Ha’u. Sira sei sai mohu iha rai fuik maran ne’e; sira sei mate hotu iha ne’e’”.

Maromak Futar Lia.

 

Salmo Responsorial                                                                                                      Sal. 105(106). 6-7ª, 13-14, 21-22, 23 (R. 4ª)

Refrão : Hanoin ami, Na’i, tan Ita domin ba Ita povo!!! Repete-se

Ou         : Aleluia!

Ami sala hanesan ami aman sira,

Ami halo buat áat no la tuir Ita hakaran.

Iha rai Egipto, ami aman sira la hatene tuir

Ita Nia hahalok kmanek sira. Refrão

 

Lalais sira haluha Ita hahalok sira,

La fó laran ba Ita hahalok kmanek sira.

Sira tenta Maromak iha rai fuik maran,

Hodi sira nia ka’an, sira koko Maromak. Refrão

 

Sira haluha tiha Maromak nebé soi sira,

Halo buat kmanek oi-oin iha Egipto,

Buat kmanek oi-oin iha rai Cam,

Halo buat foun iha Tasi Mean. Refrão

 

Hakotu tiha ona lia atu hamohu sira,

Maibé, Nia atan Moisés tau netik nia-an iha klaran;

Harohan housi sira hodi hamamar Na’i Nia laran,

Sira la mate, sira la lakon. Refrão

 

Aclamação                                                                                                                                                                                             Lc. 7. 16

Refrão : Aleluia, Aleluia!! Repete-se

Profeta boot ida mosu tiha iha ita nia leet:

Maromak mai haré tiha Nia povo. Refrão

 

Evangelho                                                                                                                                                                                     Mt. 15. 21-28

Na’i Jesus Cristo nia Evangelho nu’udar São Mateus haktuir:

Iha tempo nebá, sai tiha housi nebá, Jesus liu ba rai Tiro no Sidonia nian. Iha oras nebá feto cananeia ida nebé mai housi rai nebá hahu hakilar dehan: “Na’i, David Nia Oan, sadi’a ha’u: diabo fó terus boot ba ha’u nia oan feto”. Maibé Nia la hatan lia fuan ida. Escolante sira hakbesik ba Nia hodi husu: “Hatan tiha ba nia ba, basá nia hakilar bei-beik tuir ita”. Nia hatanL “Ha’u mai de’it ba bibi sira nebé lakon housi uma-kain Israel nian”. Maibé feto ne’e mai hakneak iha Nia oin dehan: “Na’i, tulun ha’u!” Nia simu: “La di’ak hasai oan sira nia aihan hodi soe fali ba asu oan sira!” Feto ne’e dehan fali: “Ne’e lós duni, Na’i; maibé asu oan sira mós han etu mumun nebé monu housi sira na’in nia mesa”. Jesus hatan ba nia: “Feto, ó nia fiar boot tebes! Halo duni tuir ó hakarak ba”. Iha oras nebá, nia oan feto hetan fali isin di’ak.

Lia Maksoyn.

Leave a Reply

Your email address will not be published. Required fields are marked *