shadow
Diocese de Dili > NOTÍCIAS > LETURA DIÁRIA > Quinta – Feira, XVIII Semana Tempo Comum (ANO C)

Quinta – Feira, XVIII Semana Tempo Comum (ANO C)

Primeira Leitura                    Num. 20. 1-13

Lia housi Livro Número nian:

Iha loron hirak nebá, iha fulan ba dala uluk, Israel oan sira to’o iha rai fuik maran Sin nian. Sira hela kleur iha Cades, iha nebé Maria mate hodi hakoi duni iha fatin ne’e.

Tan fatin ne’e la iha wé ba sira, sira hahu ko’alia hasouru Moisés ho Aarão, hodi dehan ba Moisés: “Di’ak liu ami mate hanesan ami maun-alin sira mate iha Na’i Nia oin! Tan sá ó lori Na’i nia emar sira mai iha rai fuik maran ne’e atu husik ami mate iha ne’e ho ami nia balada sira? Tan sá ó halo ami sai housi rai Egipto hodi lori ami mai iha fatin áat ne’e? Fatin ne’e la di’ak atu kuda fini; la iha ai figuera, la iha uvas, la iha romãzeira nia hun, no mós la iha kedas wé atu hemu!”.

Moisés ho Aarão husik hela povo hodi ba iha Tenda Hasouru Malu nian, monu taka oin ba rai. Nune’e, Na’i Nia glória mosu ba sira. Na’i hateten ba Moisés nune’e: “Kaer iha ó nia óe, libur povo hamutuk ho ó nia alin Aarão. Hafoin,  iha sira hotu nia oin, ó sei haruka ba fatuk boot nebá atu nia husik wé suli sai housi nia. Ó sei halo wé moris housi fatuk inan, hodi fó hemu sira no sira nia balada sira”.

Moisés hasai kedas nia óe iha Na’i nia oin tuir Na’i haruka. Tuir mai, Moisés ho Aarão libur povo tomak iha fatuk inan nia oin. Moisés dehan ba sira: “Imi be laran áat, rona mai! Ami bele halo wé moris ba imi housi fatuk inan ne’e?” Moisés foti sa’e nia liman hodi óe baku dala rua iha fatuk inan ne’e. Nune’e, wé suli mai boot teb-tebes; sira hahu hemu no sira nia balada sira mós hemu.

Na’i dehan ba Moisés no Aarão: “Tan imi la fiar iha Ha’u katak Ha’u bele hatudu Ha’u Nia santidade ba Israel oan sira, imi sei la lori povo ne’e tama iha rai nebé Ha’u hakotu ona ba imi”. Ne’e mak wé Meriba nian, iha nebé Israel oan sira ko’alia hasouru Na’i nebé hatudu ba sira Ninia santidade.

Maromak Futar Lia.

 

Salmo Responsorial                                                                                                                    Sal. 94(95). 1-2, 6-7, 8-9 (R. cf. 8ab)

Refrão : Ohin imi rona karik Na’i nia lian, keta taka imi nia fuan!!! Repete-se

Mai, ho laran ksolok

Ita hahí fatuk inan ita salvação nian.

Ita ba Nia futar oin hodi fó graça,

Ho knananuk nia lian ita hahí Na’i. Refrão

 

Mai, ita tuku tur ba rai,

Adora Na’i be halo ita moris.

Na’i mak ita nia Maromak,

Ita, Nia povo, bibi sira Nia luhan nian. Refrão

 

Imi rona Nia lian ba, keta taka imi fuan,

Hanesan uluk imi halo iha rai fuik maran.

Iha nebá, imi bei-ala sira koko Ha’u,

Maski haré tiha ona Ha’u kbiit nia hahalok. Refrão

 

Aclamação                                                                                                                                                                                          Mt. 16. 18

Refrão : Aleluia, Aleluia!! Repete-se

Ó mak Pedro, iha fatuk ida ne’e nia leten, Ha’u sei hari

Ha’u nia Kreda no inferno nia odamatan sira sei la manan hodi hasouru nia. Refrão

 

Evangelho                                                                                                                                                                                     Mt. 16. 13-23

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus to’o iha rai Cesarei Filipe nian, Jesus husu ba nia escolante sira: “Ema sira dehan Oan Mane ne’e sé lós?” Sira hatan; “Balun dehan katak Nia mak João Baptista, seluk katak Elias, seluk fali katak Jeremias ka profeta ruma.” Jesus dehan ba sira; “Imi fali? Imi dehan Ha’u sé?” Simão Pedro simu hodi dehan: “Itaboot mak Cristo, Maromak moris nia Oan.” Jesus hatan ba nia: “Ksolok ba ó, Simão, Jonas nia oan, basá la’os isin ka ran mak hatudu buat ne’e ba ó, maibé Ha’u nia Aman nebé iha Lalehan. Ha’u dehan fali ba ó: ‘Ó Pedro, no iha fatuk ne’e nia leten Ha’u sei harii Ha’u nia Kreda; inferno nia odamatan sira sei la bele halo buat ida hasouru nia. Ha’u sei fó chave reino lalehan nia ba ó; buat hotu nebé ó futu iha rai, sei kore mós iha lalehan; no buat hotu nebé ó kore iha rai , sei kore mós iha lalehan’” Hafoin Nia haruka nia escolante sira atu la bele dehan ba ema ida katak Nia mak Cristo.

Housi tempo nebá, Jesus hahu fó sai ba nia escolante sira katak Nia tenki ba Jerusalém atu hetan terus barak housi katuas  sira, housi na’ilulik boot sira no escriba sira; ema sei oho Nia, hafoin, liu tiha loron tolu, Nia sei moris hi’as fali. Pedro lori Nia ketak hodi hahu haksi’ak Nia dehan: “Maromak hadook ne’e housi Ita; buat áat ne’e la bele  kona Ita, Na’i!” Maibe, fila tiha ba Pedro, Jesus dehan: “Ba Ha’u nia kotuk, Satanas, ó teri netik Ha’u dalan; basá ó la hanoin Maromak nia hanoin, maibe ema nian.”

Lia Maksoyn.

Leave a Reply

Your email address will not be published. Required fields are marked *