shadow
Diocese de Dili > NOTÍCIAS > REFLEXÃO > MORIS HANESAN AVIÃO IDA; SE NIA PARA, NIA SEI MONU

MORIS HANESAN AVIÃO IDA; SE NIA PARA, NIA SEI MONU

Leitura & Reflexão Domingo XIX Tempo Comum-Ano C 2019

 

Primeira Leitura                       Sab. 18, 6-9

Lia housi Livro Sabedoria:

Na’i Maromak fo hatene sai kedas ba ita nia bei-ala sira kalan nebé Nia halo mate Egipto sira nia oan mane boot sira hotu. Nune’e, hatene tiha lolós katak sira fiar Maromak futar lia, sira bele laran metin liu tan. Na’i, Ita povo titu hela ema di’ak sira nia maksoyn no ema aat sira nia susar. Nu’udar Ita fo todan ba ami nia funu baluk sira, nune’e mos Ita bolu ami atu hela hanesan Ita nia emar, hodi hahí Ita. Ema di’ak sira nia oan hasa’e sub-subar sacrifício ba Maromak; sira hotu-hotu laran ida de’it, hodi hakotu lia ida nune’e: “ema santo sira sei hetan mos di’ak no aat hodi hananu tuir bein sira nia lisan”.

Maromak Futar Lia.

 

Salmo Responsorial                                                                                                                              Sal. 32(33), 1. 12. 18-19. 20. 22

Refrão : Rahun di’ak ba povo nebé hili Maromak ba nia Na’in!!! Repete-se

Ema di’ak haksolok iha Na’i

Ema laran mos hana’i Maromak.

Rahun di’ak ba povo nebé hili

Na’i ba nia Maromak;

Reino nebé, Maromak hili ba Nia liman rohan. Refrão

 

Maromak tau matan ba nia atan sarani,

Tau matan ba sira nebé hein Na’i nia domin,

Atu kasu klamar sira housi mate,

Hodi haraik moris iha susar laran. Refrão

 

Ita neon hein Maromak

Nia, ita kbiit, ita mahein.

Haraik Ita kmanek mai ami:

Na’i, ami hein Ita tulun. Refrão

 

Segunda Leitura                                                                                                                                                                Heb. 11, 1-2. 8-19

Lia housi surat ba sarani Hebreu sira:

Maun-alin sira: Fiar mak di’ak nebé ita sei hein hela. Fiar mak hatudu katak sasán sira nebé ita la haré, iha duni. Tan fiar, Maromak hili ita nia bein sira. Tan fiar, wainhira Na’i Maromak bolu Abraão, nia halo tuir de’it, hodi la’o ba rai nebé Maromak atu haraik ba nia. Nia tur iha ai-hun, hanesan Isaac no Jacob, nebé simu hamutuk ho nia liman rohan Na’i hakotu lia atu fó. Basá, Abraão hein tebes atu hetan cidade ida nebé hatuur iha rai metin; cidade ne’e, Maromak rasik mak hanoin atu halo, Nia rasik mak harí. Tan fiar, Sara mos, maski ferik liu ona, simu kbiit atu hako’us, basá nia fiar lia nebé Na’i Maromak hakotu ona, kona ba nia. Tan ne’e, housi ema ida de’it, maski nia katuas liu ona, moris ema barak teb-tebes hanesan fitun iha lalehan, hanesan rai henek iha tasi ibun. Sira hotu fiar to’o mate, la to’o hetan di’ak nebé Maromak hakotu lia atu fó. Sira haksolok hodi hateke de’it housi dook ba di’ak sira ne’e; sira dehan katak sira ema mai housi rai seluk ida, sira ema la’o rai iha mundo rai klaran. Ema sira nebé bele hateten nune’e, sira hatudu mai ita katak sira buka hela rai ida. Sira hanoin karik sira rain, sira bele fila fali ba. Maibé, lae! Sira buka rai ida be di’ak liu, rai ne’e lalehan. Nune’e, Maromak rasik la moe atu hela hanesan sira nia Maromak. Tebes duni, Na’i Maromak harí cidade ida ne’e ba sira. Tan fiar, Abraão saran Isaac ba mate, wainhira Maromak koko nia. Abraão nia oan mane mesak Isaac nebé atu saran ona ba mate, kona ba oan ne’e, Maromak hakotu lia ida, dehan: “Housi Isaac, sei moris ema nebé sei lori ó nia naran”. Abraão hanoin katak, Na’i Maromak bele halo mate, sira moris fali. Tan ne’e, nia simu fali nia oan, maibé, nia simu oan ne’e, hanesan sinal ida.

Maromak Futar Lia.

 

Aclamação                                                                                                                                                                                        Luc. 12, 40

Refrão : Aleluia, Aleluia!! Repete-se

Hadi’a nafatin imi laran, tan tempo nebé imi la dun hein

Mane Maksoyn hiit-An mai. Refrão

 

Evangelho                                                                                                                                                                                     Lc. 12, 32-48

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba Escolante sira nune’e: “Reino kiik keta ta’uk, basá, Na’i Maromak hakarak haraik Reino ba imi. Fa’an imi nia sasán hodi fó esmola. Imi halo ba imi hahalok nebé la bosan, halibur ba imi soin nebé la mohu iha lalehan. Iha lalehan, naókten sei la besik, mirai sei la han. Basá, iha fatin nebé ó halot ó nia soin, iha fatin ne’e mós ó sei tau ó laran. Kesi metin imi nia futu-kabun. Halo imi nia áhi oan moris nafatin. Imi sei moris hanesan ema nebé hein hela nia Na’in wainhira fila mai housi festa káben, atu bele loke kedas odamatan iha oras nia to’o mai. Rahun di’ak teb-tebes ba atan sira nebé hadér hela, wainhira nia Na’in to’o mai. Tebes, Ha’u dehan kedas ba imi: Na’i ne’e sei ba hatáis hodi haruka nia atan sira ba tur iha mesa. Hafoin, Nia sei fila housi sira leet hodi serbí sira. La dauk kalan boot, ka rai fahe rua ona, mak Na’i ne’e to mai karik, maibé, hetan nia atan sira sei hader hela. Tebes, atan sira ne’e sei hetan rahun di’ak duni. Imi rona didi’ak ida ne’e: uma na’in ida hatene karik tuku hira mak na’ok-ten atu mai, nia sei la husik na’ok nia uma laran. Imi mós haré didi’ak, basá, iha oras nebé imi la hanoin kona, Mane-Maksoyn sei hiit-An mai”. Pedro simu ba Jesus, dehan: “Na’i, Ita haktuir aiknanoik ida ne’e mai ami de’it, ka ba ema seluk mós?” Jesus lia tun ba nia: “Maibé, sê lós ema di’ak no matenek atu Na’i foti nia hanesan ulun ida atu fahe ai-han, tuir lolós oras, ba Na’i nia emar sira ida-idak? Atan nebé hatene halo nune’e, wainhira nia Na’in to’o mai; atan ne’e hetan di’ak duni. Tebes, Ha’u dehan kedas ba imi: Na’i sei halo atan ne’e ukun nia uma laran tomak. Maibé, atan ne’e keta hanoin karik iha nia laran: ‘Ha’u nia Na’in, kleur mak sei to’o’. Nune’e, nia baku atan mane no feto sira, nia han, hemu to’o lanu. Iha oras ne’e, nia Na’in sei to’o mai, iha loron nebé nia la hanoin kona, nia Na’in sei haketan nia, tau nia hamutuk ho ema aat sira”.

Lia Maksoyn.

 

 

Reflexão :

MORIS HANESAN AVIÃO IDA; SE NIA PARA, NIA SEI MONU

Maluk Cristão sira….certamente balu pernah sente ona oinsa sae avião. Bai-bain, molok avião atu semo (take off/lepas landas), iha avizo ida nebé dehan: ba passageiro sira nebé ami respeita, bem vindo iha avião Air Timor. Chefe ba ita nia voo (penerbangan) ida nee mak capitão Carlito Araujo. Avião ida nee completa ona ho odamatan 2; ida iha parte oin no ida seluk iha parte kotuk. Avião ida nee mos completo ho janela emergência; 2 iha cabina parte oin no 2 seluk iha cabina parte kotuk.

Passageiro sira nebé ami respeita, basea ba regulamento avião nian, pramugari sira sei fo exemplo oinsa bele utiliza cinto (sabuk) de guarda, oinsa bele loke.

Ami mos sei hanorin oinsa uza pelambung wainhira avião tun emergência iha be leten ou tun iha tasi laran.

Essência husi aviza ou informação hirak nee hotu mak; atu prepara passageiro sira wainhira mosu acontecimento ruma nebé ema la espera. Maibé, wainhira ita observa didiak lalaok passageiros sira wainhira rona aviza nee, certamente ema balu deit mak rona sério ba avizo nee, passageiro balun la tau atenção tanba sira toman/costuma ona ho aviza hirak hanesan nee, tan sira rona bebeik ona.

Iha leitura Evangélica Domingo semana nee, Jesus ita bele compara hanesan pramugari ida nebé explica kona ba ponto importante balun nebé relaciona ho ita nia avião da vida (pesawat kehidupan) nebé ita hot-hotu hola parte nudar passageiro iha avião refere nia laran.

Jesus nia Lia Fuan murak nudar alerta ida ba ema hotu atu matan moris neon nain ba novidade nebé mosu maibé, ita la espera. Jesus convida ita nobun atu matan moris neon nain, laos iha situação nebé halo ema tauk maibé matan moris neon nain iha Fé no Esperança.

Moris nee lao bebeik ba oin hanesan ponteiro relógio ida nebé dulas la para. Nunee, ita nia vida mos lori dadaun ita ba fragilidade isin nian nebé ita la escapa. Ba ida nee, ema budhista sira hatoo sira nia analogia ida dehan;”Wainhira ita moris mai, mundo haksolok no ita tanis tan nee, esforço-an ba atu wainhira ita mate, mundo tanis, ita haksolok”.

Dala barak ita sente moris nee hanesan laloran boot ida nebé tun sae-tun sae hela deit. dalaruma ita sente moris nee valor boot duni, dala balu mos ita sente moris nee bai-bain deit, moris nee hanesan deit. Ema hedonista (ema nebé buka gosto deit) sira dehan: Moris nee dala ida deit tanba nee, diak liu goza tiha kedas tanba quando ita mate hotu ona. Ba ema fiar nain sira, tau convicção (keyakinan) ida dehan: Moris nee graça ida tanba nee, halo moris nee didiak tuir Maromak haruk basá, se ita hatene halao moris nee didiak, maske moris dala ida deit mos natoon ona tanba liu tiha mundo nee, ita sei hetan moris rohan laek iha Cristo Jesus. Dinâmica moris hirak nee halo de tal maneira que ema lobuk moris lakon esperança.

Amu lulik ida hatoo nia experiência nunee: iha tinan 2005 liu ba, nia sae avião Adam Air husi Batam; distrito ida iha Sumatra neba atu ba Jakarta. Iha momento neba, clima la dun diak tanba udan boot, anin boot no kalohan falun metin. Maibé, compahia Adam Air obriga atu voo (penerbangan) ba loron nee, tem que halao duni. Wainhira avião semo ona too altitude nebé determinado, avião nee sente hanesan semo iha fatin deit tanba nia la bele atu semo tama kalohan no anin nebé boot. La kleur deit avião semo badak fali hodi hentan força hafoin semo aas fali hodi too lalais fatin destinado. Passageiro sira hotu inclui mos amu lulik nee sente hanesan fuan atu monu sal-sala tanba avião semo nakdoko no tun sae hela deit……….

Reflecte ba momento hirak hanesan nee, ita bele foti lição ruma husi neba. Habadak lia, ita bele dehan; ho duração moris nebé frágil no badak nee, Maromak hakarak hanorin ita atu fo valor ba moris nee basá, moris nee iha valor boot iha Maromak futar oin.

Moris nee graça ida nebé valor boot tebes husi Maromak. Maromak halo moris nee hanesan mistério boot nebé ema la hatene tuir wainhira mak nia atu remata. Ba ida nee, Jesus sempre bolu atenção hodi hanorin katak; matan moris-neon nain basá, ita la hatene wainhira mak Nai too mai. Iha Ai-knanoin Evangelho Domingo semana nee, Jesus rasik hakarak revela factus ida katak ita nia mate bele mosu mai iha qualquer tempo.

Ida nee laos significa Maromak atu tau laço ba ita hanesan ema naok ten nebé mai naok maibé, Jesus hakarak justifica deit katak; ida nebé mak hadau ita nia moris mak mate nee rasik (pecado) laos Maromak. Maromak mak buat hotu nebé moris nia hun no abut.   

Tuir los, Maromak lakohi atu ema hetan mate (monu ba pecado) maibé, dalaruma ita rasik mak hakarak monu ba nakukun mate nian. Iha relato Evangelho kona ba Lázarus nia mate, ita bele haree passagem nee nudar exemplo ida oinsa Maromak hakarak ema hotu hetan moris. Wainhira rona katak Lázaro mate ona liu loron tolu, Jesus tanis ba nia belun Lázaro. Ita bele husu; tansa Jesus tanis ba Lázaro nebé mate ona? Nudar ema, Jesus tanis ba Lázaro tanba Nia hatene katak: hori uluk kedas Maromak lakohi atu ema hetan mate.

Ita bele husu tenik; se nunee, tansa ema tem que hasoru realidade mate nian? São Paulo hatan hodi dehan: ”Upah maut adalah dosa (Rom 6:23), tetapi karunia Allah ialah hidup yang kekal dalam Kristus Yesus, Tuhan kita. Melalui Yesus, Allah menganugerahkan kehidupan kekal bagi kita//É que o salário do pecado é a morte; ao passo que o dom gratuito que vem de Deus é a vida eterna, em Cristo Jesus, Senhor nosso”. Nee significa katak: Maromak haraik moris nee nudar graça eh dom gratuita ida maibé, pecado mak halo ema tem que hasoru mistério mate nian.

 

Incertesa (ketidak pastian) iha moris nee, tuir los la bele sai hanesan ameaça ida ba moris nee. Ita precisa utiliza moris nee ba lalaok diak sira. Ita mos consciente katak; ema hot-hotu nem ida mak hakarak hasoru realidade mate nee. Ita mos la hatene los será que ita sei hetan nafatin oportunidade hodi halao moris nee diak liu tan iha loron aban? Buat hot hotu mistério hela deit. São Paulo dehan; bah hau, Moris mak Cristo no mate nee sorte ida.

Amu lulik ida hatoo tan nia experiência ida katak; fulan hirak liu ba, nia ba celebra missa matebian iha capela ida hodi hanoin senhor ida nebé mak foin mate. Família sira haktuir katak; senhor nee foin simu Sacramento Matrimónio no la kleur deit nia mate de repente. Iha momento nee, nia ba halo exercício (latihan/olahraga) hafoin nia fila mai uma, iha kalan nee kedas nia mate nunee deit. Ita la imagina oinsa Família nee sente triste ho senhor nee nia mate nebé sira nunca hanoin atu acontece nunee.  

Ita la hatene será que ita sei hetan nafatin realiza ita nia plano sira iha mundo nee hotu tiha mak ita foin bele mate? Maibé, ita hotu iha oportunidade/biban hodi fiel no responsável ba moris lor-loron, hanesan atan nebé ita rona iha Evangelho Domingo semana nee.

Iha ai-knanoik ida iha tempo uluk, haktuir katak; palhaço/badut (ema nebé halo cómico iha teatro sira) ida horik iha palácio liurai nian ida. Ninia knaar principal mak halo cómico atu halo liurai ho ninia convidado sira sente haksolok no hamnasa iha festa boot sira. Liurai sempre contente ho lalaok cómico sira nebé nia apresenta. Badut nee sempre apresenta cómico nebé oi-oin deit.

Iha loron ida, palhaço nee comete falhanço boot ida nebé obriga nia tem que hetan condenação ba mate. Nia ema kaer toman halo sala ho Liurai nia oan feto. Molok hetan condenação mate, Liurai bolu palhaço nee hodi hateten: ”hau hanoin hikas ona teatro cómico sira hotu nebé o halo ona ba hau. Hau mos hanoin hetan oinsa o sempre halo hau haksolok ho cómico hirak nee. Tan nee, hau hakarak atu o hili rasik maneira oinsa hau bele condena o ba mate”.
Rona tiha nee, palhaço nee hanoin oitoan hafoin hatan ba liurai dehan: ”Nai liurai, ita laran kmaan karik, hau hakarak mate wainhira hau idade ona. Agora la bele oho lai hau. Rona tiha pedido nee, liurai sente cómico no hamnasa kumu kabun, too ikus liurai cancela tiha castigo nee hodi haruka palhaço nee servi nafatin iha liurai nia palácio.

Ita hotu certamente hakarak wainhira katuas-ferik tiha lai mak foin bele mate/husik mundo nee. Maibé, ita la hatene será que ita sei hetan nafatin biban hanesan nee? Eh keta aban dader ita mate ona karik?

Ita nobun iha nee nudar Maromak nia servidor/manu ain. Iha Evangelho Jesus hatete: ”Rahun di’ak teb-tebes ba atan sira nebé hader hela, wainhira nia Na’in too mai. Atan nebé hatene halo nunee, wainhira nia Na’in to’o mai, atan ne’e hetan di’ak duni// hamba-hamba yang didapati tuannya berjaga-jaga ketika ia datang”. Hamba yang setia dan bertanggung jawab tidak akan takut soal kapan tuannya itu akan datang. Hamba yang tidak setia melihat itu sebagai sebuah kemalangan, tetapi hamba yang setia melihat saat itu sebagai waktu yang baik”. Atan nebé matan moris neon nain sempre hein wainhira mak nia Nia too mai. Bele iha dader, bele iha kalan, bele iha kalan fahe rua ou bele iha qualquer tempo.

Liu husi reflexão Domingo semana nee, ita hotu hetan chamada de atenção hodi horik nafatin iha sentido matan moris neon nain (vigilância). Precisa mos ita reflecte Santa Teresa de Calcuta nia lia murak nebé dehan: Maromak laos bolu ita hodi hetan sucesso maibé, Maromak bolu ita hodi sai fiel// Kita tidak dipanggil untuk menjadi sukses, tetapi untuk setia”.

Ita termina reflexão nee ho conlusão badak ida hodi dehan: Moris Cristão nudar avião ida. Se ita para, ita sei monu//”Hidup Kristiani adalah seperti sebuah pesawat. Jika anda berhenti maka anda akan jatuh“. Assim seja e Bem Haja. (ignaslopes).

 

 

Leave a Reply

Your email address will not be published. Required fields are marked *