shadow
Diocese de Dili > NOTÍCIAS > LETURA DIÁRIA > XIX Domingo Tempo Comum (ANO C)

XIX Domingo Tempo Comum (ANO C)

Primeira Leitura                       Sab. 18, 6-9

Lia housi Livro Sabedoria:

Na’i Maromak fo hatene sai kedas ba ita nia bei-ala sira kalan nebé Nia halo mate Egipto sira nia oan mane boot sira hotu. Nune’e, hatene tiha lolós katak sira fiar Maromak futar lia, sira bele laran metin liu tan. Na’i, Ita povo titu hela ema di’ak sira nia maksoyn no ema aat sira nia susar. Nu’udar Ita fo todan ba ami nia funu baluk sira, nune’e mos Ita bolu ami atu hela hanesan Ita nia emar, hodi hahí Ita. Ema di’ak sira nia oan hasa’e sub-subar sacrifício ba Maromak; sira hotu-hotu laran ida de’it, hodi hakotu lia ida nune’e: “ema santo sira sei hetan mos di’ak no aat hodi hananu tuir bein sira nia lisan”.

Maromak Futar Lia.

 

Salmo Responsorial                                                                                                                              Sal. 32(33), 1. 12. 18-19. 20. 22

Refrão : Rahun di’ak ba povo nebé hili Maromak ba nia Na’in!!! Repete-se

Ema di’ak haksolok iha Na’i

Ema laran mos hana’i Maromak.

Rahun di’ak ba povo nebé hili

Na’i ba nia Maromak;

Reino nebé, Maromak hili ba Nia liman rohan. Refrão

 

Maromak tau matan ba nia atan sarani,

Tau matan ba sira nebé hein Na’i nia domin,

Atu kasu klamar sira housi mate,

Hodi haraik moris iha susar laran. Refrão

 

Ita neon hein Maromak

Nia, ita kbiit, ita mahein.

Haraik Ita kmanek mai ami:

Na’i, ami hein Ita tulun. Refrão

 

Segunda Leitura                                                                                                                                                                Heb. 11, 1-2. 8-19

Lia housi surat ba sarani Hebreu sira:

Maun-alin sira: Fiar mak di’ak nebé ita sei hein hela. Fiar mak hatudu katak sasán sira nebé ita la haré, iha duni. Tan fiar, Maromak hili ita nia bein sira. Tan fiar, wainhira Na’i Maromak bolu Abraão, nia halo tuir de’it, hodi la’o ba rai nebé Maromak atu haraik ba nia. Nia tur iha ai-hun, hanesan Isaac no Jacob, nebé simu hamutuk ho nia liman rohan Na’i hakotu lia atu fó. Basá, Abraão hein tebes atu hetan cidade ida nebé hatuur iha rai metin; cidade ne’e, Maromak rasik mak hanoin atu halo, Nia rasik mak harí. Tan fiar, Sara mos, maski ferik liu ona, simu kbiit atu hako’us, basá nia fiar lia nebé Na’i Maromak hakotu ona, kona ba nia. Tan ne’e, housi ema ida de’it, maski nia katuas liu ona, moris ema barak teb-tebes hanesan fitun iha lalehan, hanesan rai henek iha tasi ibun. Sira hotu fiar to’o mate, la to’o hetan di’ak nebé Maromak hakotu lia atu fó. Sira haksolok hodi hateke de’it housi dook ba di’ak sira ne’e; sira dehan katak sira ema mai housi rai seluk ida, sira ema la’o rai iha mundo rai klaran. Ema sira nebé bele hateten nune’e, sira hatudu mai ita katak sira buka hela rai ida. Sira hanoin karik sira rain, sira bele fila fali ba. Maibé, lae! Sira buka rai ida be di’ak liu, rai ne’e lalehan. Nune’e, Maromak rasik la moe atu hela hanesan sira nia Maromak. Tebes duni, Na’i Maromak harí cidade ida ne’e ba sira. Tan fiar, Abraão saran Isaac ba mate, wainhira Maromak koko nia. Abraão nia oan mane mesak Isaac nebé atu saran ona ba mate, kona ba oan ne’e, Maromak hakotu lia ida, dehan: “Housi Isaac, sei moris ema nebé sei lori ó nia naran”. Abraão hanoin katak, Na’i Maromak bele halo mate, sira moris fali. Tan ne’e, nia simu fali nia oan, maibé, nia simu oan ne’e, hanesan sinal ida.

Maromak Futar Lia.

 

Aclamação                                                                                                                                                                                        Luc. 12, 40

Refrão : Aleluia, Aleluia!! Repete-se

Hadi’a nafatin imi laran, tan tempo nebé imi la dun hein

Mane Maksoyn hiit-An mai. Refrão

 

Evangelho                                                                                                                                                                                     Lc. 12, 32-48

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba Escolante sira nune’e: “Reino kiik keta ta’uk, basá, Na’i Maromak hakarak haraik Reino ba imi. Fa’an imi nia sasán hodi fó esmola. Imi halo ba imi hahalok nebé la bosan, halibur ba imi soin nebé la mohu iha lalehan. Iha lalehan, naókten sei la besik, mirai sei la han. Basá, iha fatin nebé ó halot ó nia soin, iha fatin ne’e mós ó sei tau ó laran. Kesi metin imi nia futu-kabun. Halo imi nia áhi oan moris nafatin. Imi sei moris hanesan ema nebé hein hela nia Na’in wainhira fila mai housi festa káben, atu bele loke kedas odamatan iha oras nia to’o mai. Rahun di’ak teb-tebes ba atan sira nebé hadér hela, wainhira nia Na’in to’o mai. Tebes, Ha’u dehan kedas ba imi: Na’i ne’e sei ba hatáis hodi haruka nia atan sira ba tur iha mesa. Hafoin, Nia sei fila housi sira leet hodi serbí sira. La dauk kalan boot, ka rai fahe rua ona, mak Na’i ne’e to mai karik, maibé, hetan nia atan sira sei hader hela. Tebes, atan sira ne’e sei hetan rahun di’ak duni. Imi rona didi’ak ida ne’e: uma na’in ida hatene karik tuku hira mak na’ok-ten atu mai, nia sei la husik na’ok nia uma laran. Imi mós haré didi’ak, basá, iha oras nebé imi la hanoin kona, Mane-Maksoyn sei hiit-An mai”. Pedro simu ba Jesus, dehan: “Na’i, Ita haktuir aiknanoik ida ne’e mai ami de’it, ka ba ema seluk mós?” Jesus lia tun ba nia: “Maibé, sê lós ema di’ak no matenek atu Na’i foti nia hanesan ulun ida atu fahe ai-han, tuir lolós oras, ba Na’i nia emar sira ida-idak? Atan nebé hatene halo nune’e, wainhira nia Na’in to’o mai; atan ne’e hetan di’ak duni. Tebes, Ha’u dehan kedas ba imi: Na’i sei halo atan ne’e ukun nia uma laran tomak. Maibé, atan ne’e keta hanoin karik iha nia laran: ‘Ha’u nia Na’in, kleur mak sei to’o’. Nune’e, nia baku atan mane no feto sira, nia han, hemu to’o lanu. Iha oras ne’e, nia Na’in sei to’o mai, iha loron nebé nia la hanoin kona, nia Na’in sei haketan nia, tau nia hamutuk ho ema aat sira”.

Lia Maksoyn.

Leave a Reply

Your email address will not be published. Required fields are marked *