shadow
Diocese de Dili > NOTÍCIAS > LETURA DIÁRIA > Quinta – Feira, XX Semana Tempo Comum (Ano C)

Quinta – Feira, XX Semana Tempo Comum (Ano C)

Primeira Leitura                    Jz. 11. 29-39ª

Lia housi Livro Juízes nian:

Iha loron hirak nebá, Na’i nia Espírito tun ba Jefté. Jefté la’o lemo iha Galaad no Manassés, liu housi Mispá, Galaad nian; housi Mispá, Galaad nian, nia liu ba ema amon sira rain. Hafoin, Jefté hasa’e promesa ne’e ba Na’i; “Ita haraik karik mai ha’u liman, ema amon sira no ha’u fila hodi manan funu hasouru sira, ema nebé sai uluk housi odamatan ha’u uman nian hodi mai hasouru ha’u, nia sai Na’i Nian, ha’u sei hasa’e nia nu’udar sacrifício”. Tuir mai, Jefté liu ba ema amon sira rain, atu hafunu hasouru sira; Na’i saran duni sira ba nia liman. Nia hamohu sira housi Aroer to’o besik Minit, hola cidade ruanulu, hodi to’o iha Abel-Queramin. Lakon tiha iha funu boot ne’e, amon oan sira haraik-an lós iha Israel oan sira oin.

Maibé, wainhira Jefté fila ba uma, iha Mispá, nia oan feto sai mai hasouru nia, ho tamborin sira lian no dansa. Nia oan feto ida de’it; Nia la iha tan oan mane no mós oan feto seluk tan. Wainhira nia haré nia oan feto, nia les tiha nia hatais hodi dehan: “Aia, ha’u oan feto, tan sá ó halo susar ha’u! Ó mak halo ha’u mate! Basá, ha’u lia hakotu tiha ona iha Na’i Nia futar oin; ha’u la bele fila kotuk’. Nia hatan ba nia aman: “Ha’u aman, ita hakotu ona lia ho Na’i karik, halo mai ha’u, tuir ita lia hakotu ona, wainhira Na’i haraik tiha ona kbiit ba ita hodi halakon ita funu baluk, ema amon sira”. Hafoin, dehan ba nia Aman: “Ha’u husu de’it favor ida ne’e ba ita atu haraik mai ha’u: Husik ha’u livre iha fulan rua nia laran, hodi la’o ba-mai iha foho ho ha’u nia feto maluk sira hodi tanis tan ha’u hela nu’udar fetora”. Nia aman hatan ba nia: “Di’ak, la’o ba!” no husik nia oan feto la’o iha fulan rua nia laran. Nia ba hamutuk ho nia feto maluk sira, tan nia hela nu’udar fetora ba nafatin. Liu tiha fulan rua, Nia fila ba nia aman nia uma; Housi nia, nia aman halo tuir duni lia nebé nia hakotu ba Na’i.

Maromak Futar Lia. 

 

Salmo Responsorial                                                                                            Sal. 39(40). 5, 7-8ª, 8b-9, 10-11ab (R. cf. 8ª e 9ª)

Refrão :  Na’i, ha’u mai atu halo tuir Ita hakaran!!! Repete-se

Rahun di’ak ba ema nebé tau neon iha Na’i,

Hodi la fila ba ema laran áat sira.

Ksolok ba ema be tau neon iha Na’i,

No la fila ba sira be tuir dalan bosok nian. Refrão

 

Itaboot la kohi sacrifício no buat-karan,

Maibé loke ha’u tilun atu rona.

Ita la husu buat-karan eh na’an maten,

Tan ne’e ha’u dehan: “Ha’u mak ne’e!”. Refrão

 

Kona ba ha’u, hakerek nanis ona iha livro Lei nian,

Atu halo tuir Ita hakaran.

Ida ne’e mak ha’u hakarak, ha’u Maromak,

Ita ukunfuan hela iha ha’u fuan laran. Refrão

 

Ha’u sei haklaken ita justiça ba ema lubun boot,

Na’i, Ita hatene katak ha’u la taka ha’u ibun;

Ha’u la subar Ita Nia justiça iha ha’u fuan okos;

Ha’u haklaken Ita Nia fidelidade no maksoyn. Refrão

 

Aclamação                                                                                                                                                                              Sal. 94(95). 8ab

Refrão : Aleluia, Aleluia!! Repete-se

Ohin imi rona karik Na’i Nia lian,

Keta taka imi nia fuan. Refrão

 

Evangelho                                                                                                                                                                                       Mt. 22. 1-14

Na’i Jesus Cristo Nia Evangelho nu’udar São Mateus haktuir:

Iha tempo nebá, Jesus ko’alia fali ho aiknanoik ne’e ba boot sacerdote sira nian no ba ema kbaen povo nian hodi dehan ba sira: “Reino Lalehan nian hanesan liurai ida nebé halo festa kaben ba nia oan mane. Nia haruka atan sira atu ba bolu convidado sira ba festa, maibé sira lakohi mai. Nia haruka tan atan sira seluk dehan: ‘Dehan ba convidado sira: Aihan pronto tiha ona, ha’u nia karau ho balada bokur sira oho tiha ona, buat hotu nahe tiha ona, mai festa casamento’. Maibé, hanesan lia la kona sira, ida ba tiha nia to’os, ida ba nia contrato, sira seluk, káer tiha atan sira, baku sira no oho sira. Liurai, laran nakali teb-tebes, haruka nia soldado sira atu oho ema áat sira ne’e hodi sunu sira nia cidade. Hafoin nia dehan ba atan sira: ‘Festa kaben pronto ona, maibé convidado sira la soi. Ne’e duni, imi ba dalan sira hodi convida ba festa kaben nian ema hotu nebé imi hetan’. Atan sira sai duni ba dalan sira no halibur hamutuk ema hotu nebé sira hetan, di’ak no áat hodi halo fatin festa kaben nian nakonu ho bainaka. Wainhira liurai tama atu haré bainaka sira, nia haré ema ida nebé la hatais unuk festa nian. Nia ba ema ne’e: ‘Belun, oin sá ó tama iha ne’e la hatais festa kaben nian?’ Ema ne’e nonok hela. Tan ne’e, liurai dehan ba atan sira: ‘Imi kesi metin nia liman ho ain, soe nia ba nakukun iha liur, iha nebá, ema sei tanis no ruun nehan’ Basá Na’i bolu ema barak, maibé hili de’it uitoan”

Lia Maksoyn. 

Leave a Reply

Your email address will not be published. Required fields are marked *