shadow
Diocese de Dili > NOTÍCIAS > LETURA DIÁRIA > XXI Domingo Tempo Comum (ANO C)

XXI Domingo Tempo Comum (ANO C)

Primeira Leitura                     Is. 66. 18-21

Lia housi Livro Profeta Isaías:

Nai lia tun, dehan: “Hau mai atu libur hamutuk povo hotu-hotu, ema tomak ho lisan oin-oin. Sira hotu sei mai haré Hau kbiit. Iha sira leet, Hau sei halo buat foun ida. Housi ema sira ne’e nia leet, Hau sei hili sira balun nebé sei moris atu haruka sira ba rai Tarsis, Somália, Líbia, ba rai Mosech, Rós, Tubal no rai Jónia. Hau sei haruka mos sira ba dook iha tasi balun ba, ba ema sira nebé la dauk rona Hau naran, la dauk haré Hau kbiit. Sira sei haré duni Hau naran iha povo sira leet. Nu’udar buat karan ida ba Nai Maromak, sira sei lori mai housi nação ida-idak, imi nia maun-alin sira, sae kuda burro no kuda camelo. Nai mak lia tun dehan: sira sei lori ema sira nee mai Hau foho Jerusalém, nu’udar Israel oan sira, lori sira buat karan ba tau iha luhu mesa mós, atu hasae ba Nai nia kreda. Hau sei hili sira balun ba nailulik atu serbi iha Kreda laran”.

Maromak Futar Lia.

 

Salmo Responsorial                                                                                                                                                          Sal. 116(117), 1-2

Refrão : Ba mundo rai-klaran haklaken menon foun!!! Repete-se

Nação tomak hanai Maromak

Povo rai-klaran haklaken Maromak! Refrão

 

Maromak domin tahan ita,

Tahan nafatin tuir lia menon! Refrão

 

Segunda Leitura                                                                                                                                                               Heb. 12, 5-7. 11-13

Lia housi surat ba sarani Hebreu sira:

Maun-alin sira: imi haluhan ona Escritura nia doutrina hanourin? Escritura hanourin imi hanesan oan: “Hau oan, keta hakribit Nai nia hanourin! Keta laran susar, wainhira Nai hanourin o. Basá, Nai hanourin ema nebé Nia hadomi. Nai castigo ema nebé Nia simu hanesan oan”. Imi terus atu imi hatene sóe imi nia lisan aat. Nai Maromak haré imi hanesan oan. Tebes, aman nebé mak la hanoin nia oan? Iha oras nebé Maromak hanourin ita, ita haré deit terus, ita la haré liu ksolok. Maibé, aban-bain-rua, terus nee sei fila ba paz no justiça ba ema hotu nebé toman terus. Nee duni, foti nafatin imi nia liman nebé kole ona, lao tuir dalan los, atu imi nebé lao kudeik, la bele sidi, maibé, atu bele hetan fali isin diak.

Maromak Futar Lia.

 

Aclamação                                                                                                                                                                                          Lc. 13, 30

Refrão : Aleluia, Aleluia!! Repete-se

Nai koali: Sira be haraik-an sei hetan fatin diak;

Sira be buka fatin diak, sei la hetan. Refrão

 

Evangelho                                                                                                                                                                                     Lc. 13, 22-30

Nai Jesus Cristo nia Evangelho nu’udar São Lucas haktuir:

Iha tempo nebá, Jesus liu housi cidade no knua sira hodi hanorin. Nia tuir dalan ba Jerusalém, ema ida husu ba Nia: “Nai, ema oitoan deit mak sei hetan rahun diak?” Jesus dehan ba sira hotu: “imi sei haka’as-an atu tama housi odamatan kloot! Hau dehan los ba imi katak ema barak hakarak tama, maibé la bele. Uma na’in bele hamrik ba taka tiha odamatan, imi sei buka odamatan housi liur, dehan: Nai loke odamatan mai ami”. Maibé, Nai sei hatan ba imi: ‘Hau la hatene imi nebé los!’. Iha oras nee imi sei dehan:’ami han hemu ho Ita, Ita hanourin iha ami uma oin’. Maibé, Na’i sei hatan: ‘Hau la hatene imi mai housi nebé. Imi sai tiha housi Hau oin, imi nebé la tuir justiça’. Iha nebá, sei ruun nehan, wainhira imi haré Abraão, Isaac, Jacob no profeta sira hotu iha Maromak nia reino; Maibé, imi fali hela iha liur. Ema housi loro-sa’e no loro monu, housi rae no lor, sei mai tur hodi han iha Maromak nia Reino. Ema ikus liu sei uluk fali, ema uluk liu sei ikus fali!”

Lia Maksoyn.

Leave a Reply

Your email address will not be published. Required fields are marked *