shadow
Diocese de Dili > NOTÍCIAS > LETURA DIÁRIA > Sexta – Feira, XXII Semana do Tempo Comum (Ano C)

Sexta – Feira, XXII Semana do Tempo Comum (Ano C)

Primeira Leitura                     Col. 1. 15-20

Lia housi São Paulo nia Surat ba sarani sira iha Colossos:

Maun alin sira: Jesus Cristo mak ilas Maromak nian nebé matan la haré; Nia mak Oan boot liu sasan hot-hotu nian; basá iha Nia mak Maromak hakiak buat hot-hotu; buat nebé matan haré no buat nebé matan la haré: Liurai nia kadunan, ukun Na’in, Na’i ulun, kbiit, buat hotu ne’e mosu housi Nia no tanba Nia. Nia mak uluk liu sasan hot-hotu, no buat hotu bele hela de’it iha Nia. Nia mak ulun isin lolon tomak nian, katak Kreda. Nia mak hun, no Nia mak Ida nebé moris hi’as uluk housi mate, atu sai uluk liu iha buat hot-hotu.

Basá Maromak hakarak duni atu halo Nia nakonu lolos ho di’ak, no housi Nia, Maromak hakarak hadame buat hot-hotu ho Nia An; no housi Nia, anba ran nebé Nia fakar iha Cruz, Maromak hametin dame iha rai nu’udar iha Lalehan.

Maromak Futar Lia.

 

Salmo Responsorial                                                                                                                                Sal. 99(100). 2, 3, 4, 5, (R. 2c)

Refrão : Mai iha Na’i futar oin ho knananuk ksolok nian!!! Repete-se

Rai tomak hahí Na’i!

Serbi Na’I ho ksolok,

Mai iha Na’i ho knananuk ksolok nian. Refrão

 

Hatene ba katak Na’i mak Maromak!

Nia hakiak ita, ita Ninian,

Ita mak Nia povo,

Bibi sira housi Nia bibi luhan. Refrão

 

Tanba Na’i mak di’ak,

Nia laran luak rohan laek;

Nia neon los habelar housi otas ba otas. Refrão

 

Aclamação                                                                                                                                                                                             Jo. 8. 12

Refrão : Aleluia, Aleluia!! Repete-se

Nai dehan: Ha’u mundo nia roman; ema sé tuir Ha’u,

la la’o iha nakukun, maibé, sei  hetan roman moris nian. Refrão

 

Evangelho                                                                                                                                                                                       Lc. 5. 33-35

Na’i Jesus Cristo nia Evangelho nu’udar São Lucas haktuir:

Iha tempo nebá, escriba no fariseu sira hateten ba Jesus: “João nia escolante sira hadera an dala barak hodi hamulak. Fariseu  sira nia escolante sira halo mos nune’e. Maibé, O nian fali han hemu.” Jesus hatan ba sira: “Imi bele halo noivo nia bainaka sira hadera an uanhira noivo sei hela ho sira. Loron sei to’o mai, uanhira ema sei hasai noivu husi sira; foin mak sira sei hadera an iha loron hirak nebá.”

Nia haktuir tan aiknonoik  ida ne’e ba sira: “Ema ida la tesi hatais foun ida atu taka hatais tuan nia kuak; halo nune’e karik, ida foun sei les ida tuan, hena nebé hasai housi ida foun la los ho hatais tuan. Ema ida la rai hela tua foun iha tua fatin kulit tuan; nia halo nune’e karik, tua foun sei halo fera tua fatin kulit tuan hodi halo tua nakfakar de’it,  no tua fatin kulit sei sai áat. Maibé tua foun sei tau iha tua  fatin kulit foun, no sira rua sei la lakon. La iha ema ida nebé, hemu tiha tua tuan, hakarak hemu tan tua foun, basá nia dehan: ‘Tua tuan mak di’ak.’”

Lia Maksoyn.

Leave a Reply

Your email address will not be published. Required fields are marked *