shadow
Diocese de Dili > NOTÍCIAS > REFLEXÃO > TUIR JESUS…!! TODAN DEMAIS?

TUIR JESUS…!! TODAN DEMAIS?

Leitura no Reflexão DOMINGO COMUM XXIII-Ano C 2019

 

Primeira Leitura        Sab. 9, 13-19 (13-18b)

Lia housi livro Sabedoria:

Ema sé mak bele hatene Maromak nia hanoin? Ema sé mak bele hanoin kona Na’i nia hakaran? Ita ema nia hanoin namlele; ita nia matenek ábut laek. Isin lolon dodok ida ne’e halo todan klamar; horik fatin rai ne’e nian hanesan klamar be hanoin buat oin-oin. Susar atu hatene buat hira-hirak iha rai leten; ho haka’as-an mak ita hetan buat nebe iha ita nia liman. Se mak bele hetan buat nebe iha lalehan? Na’i, ita boot la haraik karik neon naroman, ita la haraik karik ita Espiríto Santo, ema sé mak bele hatene ita nia hanoin? Nuné mak ita haloos ema horik rai sira dalan, hodi hanorin ema sira tuir ita hakarak.

Maromak Futar Lia.

 

Salmo Responsorial                                                                                                                         Sal. 89(90), 3-4. 5-6. 12-13.  14-17

Refrão : Na’i houri uluk kedas Ita boot ami mahan!!! Repete-se

Na’i, Ita Boot bele fila ema sira ba rai rahun,

Hodi dehan: “ Ema oan sira, imi fila”

Na’i, iha Ita Boot futar oin

Tinan rihun ida, nu’udar loron horik-seik be liu ona. Refrão

 

Na’i, Ita lori sira,

Sira la’o liu, lais hanesan  mehi rai-hun mutin;

Hanesan du’ut matak dader’

Namlaik loraik. Refrão

 

Na’i, hanorin ami sura ami loron,

Atu hetan fuan matenek.

Na’i, fila hi’as mai bainhira los?

Bainhira Ita sei hanoin ita atan sira? Refrão

 

Tulun ami lalais ho Ita laran luak,

Atu ami moris ho ksolok!

Hatudu ita boot laran di’ak

Atu ami kosar-wen hetan folin. Refrão

 

Segunda Leitura                                                                                                                                                                 Flm. 9b-10, 12-17

Lia husi São Paulo nia surat ba Filemon:

Doben: ha’u, Paulo, katuas ona, oras ne’e, dadur hela tan Cristo Jesus, ha’u husu ba ó  atu tulun Onésimo, ha’u nia oan nebé haki’ak iha terus laran. Ha’u haruka nia ba ó; nia nu’udar ha’u fuan rasik. Ha’u hakarak duni nia hela hamutuk ho ha’u, iha ó nia fatin atu tulun ha’u terus, tan Evangelho. Maibé, la hodi ó nia hakarak ha’u la bele halo buat ida: atu buat di’ak nebé ó halo, tan ó nain rasik hakarak halo ho laran di’ak ema ida la obriga.  Nia kala dook tiha oituan housi ó; maibé ó simu fali nia hela nafatin ho ó, la’os hanesan atan oan, maibé liu fali atan, nu’udar alin doben ida. Nia mai ha’u nune’e duni: oinsa tan fali ba ó la’os de’it tuir ema moris, iha mos Maromak futar oin. Ne’e duni, ó haré duni katak ita Na’in rua hamutuk tebes, ne’e sá, ó simu nia ba, nu’udar ó simu ha’u-an rasik.

Maromak Futar Lia.

 

Aclamaҫão                                                                                                                                                                                          1 Jo. 4, 12

Refrão : Aleluia, Aleluia!! Repete-se

Ita hadomi malu, Maromak horik ho ita,

Nia domin boot duni iha ita, Refrão

 

Evangelho                                                                                                                                                                                     Lc. 14, 25-34

Na’i Jesus Cristo nia Evangelho Nu’udar São Lucas haktuir:

Iha tempo nebá, ema lubun boot tuir Jesus. Nia fila ba sira, hodi dehan:“Ema sé  mai buka Ha’u, maibé la husik hadomi aman-inan, kaben, oan, alin maun no moris, la bele sai ha’u nia escolante. Ema sé la lori nia Cruz la’o tuir ha’u, la bele sai ha’u nia escolante. Imi nebe ida mak, atu halo uma aas ida, la tur uluk hodi hare osan iha eh lae atu halo to’o rohan? Keta halo be, foin hahu hari, kbiit la iha atu halo to’o rohan; hafoin; ema sira be hare, hahu hamoe nia, hodi dehan: ema ne’e hahu hari, maibé la bele halo to’o rohan! Liurai ida nebé mak ba funu hasoru liurai seluk, la tur uluk lai hodi hanoin, nia bele eh lae, ho de’it soldadu rihun sanulu funu hasuru ida nebé mai hasoru ho soldadu rihun rua-nulu? Haré ba la bele, ida seluk sei dook hela, haruka ona manu ain ba husu dame. Nune’e mos imi nebe la husik nia riku soi, la bele sai ha’u nia Escolante”.

Lia Maksoyn.

 

 

Reflexão :

TUIR JESUS…!! AFINAL TODAN DEMAIS?

Ema latina sira dehan: SALUS VESTRA IN MANUS VESTRA; o nia salvação iha o nia liman rasik tanba Cristo mak dalan moris nian, então ita hatene oinsa atu hakbesik ba Jesus liu husi ita nia disponibilidade rasik. Kmanek liu wainhira ita moris banati tuir Cristo nia lalaok no hanorin sira. Ita ema nia hanoin namlele; ita nia matenek ábut laek. Isin lolon dodok ida ne’e halo todan klamar. Moris Hanesan du’ut matak dader’ Namlaik loraik.

Mundo oras nee fácil tebes fo acesso ba ema hotu. Uluk ema hamlaha precisa processo naruk hodi tein hahan maibé ohin loron instan (fácil & lalais), precisa deit minuto 3-5 hodi dan pop mie (Loke, tau be manas, hein too minuto 3, bele han ona). Nee exemplo ida husi mundo instan. Lalaok instan  nee neneik-neneik hanorin ema atu rejeita qualquer forma insegurança no sentido sacrifício. Nee significa katak buat nebe fácil halo ema la kohi moris iha terus, lakohi halo sacrifício iha moris, pior liu tan lakohi terus iha moris hodi entende sentido Cruz (sacrifício/terus). Ema buka dalan corta hodi atinge ninia mehi. Ukun nain ida buka dalan terik hodi kaer ukun too baruk, hodi riku lalais, hodi bele hetan riku soin barak tan.

Evangelho São Lucas Domingo semana nee, apresenta requésitos (persyaratan) balu nebe ema precisa cumpri, wainhira hakarak sai Jesus nia escolante. Persyratan eh requisitos hirak nee, balu Jesus temi claro no directamente ba ema hirak nebe rona Nia maibé, requesitos balu mos Jesus apresenta liu husi ai-knanoik sira.

Requesito absoluto (syarat mutlak) hodi sai Jesus nia escolante lolos iha 4 mak hanesan:

(1). La bele kesi-an metin ho família (Lc 14, 26).

(2). Riku soin (Lc 14,33).

(3). Pronto simu terus/sacrifício (Lc 14, 27).

(4). Pronto simu desafio no exigência sira (Lc 14, 28-32).

Sarani ohin loron considera terus (sacrifício) nudar lalaok negativo ida nebe precisa hasees tiha husi ema nia moris. Maibé Jesus fo sentido katak terus (sacrifício-Cruz) bele hanorin ema hatene depende no agradece ba Maromak. Ema otas nee nian entende sala katak se Maromak nee domin nain no ema nebe fiar nain, automaticamente Maromak tenke hasees nia husi terus no susar sira.

Igreja Católica basea ba Jesus nia hanorin nebe tenik katak:”Ema nebe la lori nia Cruz, nia la merece tuir Hau” (Mt 10,38). Nee significa katak ema hotu tanto kiik-tanto boot, tanto riku-tanto kiak, sei koko moris terus iha rai nee hodi hatene Maromak nia diak oinsa.

Cruz nudar dalan terus nebé ema (sarani sira) tenke hasoru molok ba too Jesus. Terus balu mosu tanba ema nia desejo rasik, terus balu mosu hodi prova ema nia fiar, terus balu mosu nudar realidade nebe ema la bele sees husi neba.

Santo Agostinho hanorin tipo Cruz Nai nian nebe precisa ita hatene; (1) Cruz físico no (2) Cruz Espiritual. Cruz físico refere ba ema nia paixão (nafsu) sira nebe iregualar (tak teratur) nebe relativo ho ema nia senso (tocar, sentir, visão,…etc), iha nee inclui kedas oinsa ema kaan kaer ukun, ema kaan halibur osan ba futuro tuir dalan ilegal, ema respeita malu tuir kor partido, tuir kor grupo, tuir cor família,…etc.

Enquanto Cruz espiritual, tuir Santo Agostinho hanorin katak; tuir Jesus nia haruka (doutrina) nudar assunto nebe precisamente ita tenke tau atenção; significa ita tenke hatene controla saida mak expressa iha Cruz físico nian hanesan menciona iha leten. Basá, criz espiritual bele halo ema controla kaan ten sira, necessidade iregualar sira, hatene haraik-an, simplicidad, respeita, bem comum, inclui mos ema nia hanoin aat ba ema seluk nebe la tuir ita nia vontade pessoal tanto iha sociedade nunee mos iha mundo político.

Jesus nia pergunta ba ema ida-idak nebe decide hakarak tuir Nia mak:”o pronto duni ona atu tuir Hau (Jesus)?” manan sa lerek wainhira o decide atu sai Hau (Jesus) nia escolante? Sai Hau (Jesus) nia escolante mak folin boot liu eh o nia laran kmaan (disponibilidade) mak dignidade aas liu? Ba se se deit, kiak eh riku, boot eh kiik, hetan cargo boot eh la iha serviço – ema hotu-hotu tem que foti decisão claro no hanesan.

Bele, disponível no hakarak duni selu valor aas (sacrifício) hodi tuir Jesus? Experiência hatudu katak; bai-bain quando ita hahu harí eh halao buat ida ou participa iha programa ruma, ita sente semangat los, entusiasmo forte, contente,…Maibé, liu tiha tempo ruma…ita hahu baruk ona, lakon esperança, entusiasmo menos, no seluk tan. Pergunta ba ita mak nee: nudar Católico, será que ita bele mantem posição, persistente no entusiasmo nafatin hodi sai Jesus nia emar ba qualquer situação? Hanoin ba Jesus nia lia fuan be hateten: “Ema nebe hakarak tuir Hau, sei loru nia Cruz hodi lao tuir Hau”. Se mak mantem posição, se sei manan.

Iha ai-knanoik nebe São Lucas apresenta iha Evangelho Domingo semana nee, tanto ema nebe atu harí torre aas ou ema nebe marca estrategia hodi ba halo funu, precisa halo calculação no considera mos risco hirak nebe sei mosu, molok foti decisão definitiva.

Nudar Jesus nia emar, precisa hatene katak; atu tuir Jesus exige fidelidade (kesetiaan) ida ba Jesus, nebe tem que tau iha prioridade. Em princípio, wainhira ita simu Jesus nia personalidade, automaticamente ita hakarak duni hulan mos Nia Cruz! Nunee, lalaok hirak nee hotu significa saida ba ita nia existência? Significa saida ba ita nia moris, significa saida ba ita nia knaar nudar Jesus nia escolante, nudar sarani, nudar Cristão Católico nebe simu ona we baptismo?

Ohin loron, ita moris iha sociedade pluralismo; significa ita hasoru situação oi-oin deit, cultura foun tama iha ita leet, religião mosu oi-oin ho figura ONG, partido bar-barak, grupo oioin, ema raça oi-oin,…situação ida nee hamosu desafio oi-oin, exigência bar-barak, no ikus mai lori ema ba hadau malu posição social, estatuto diak, popularidade, osan, riku soin, gosto, no iha tempo hanesan provoca mos ema compete, hadau malu poder, gap kiak-riku no injustiça.

Então, iha situação hirak hanesan nee mak, Cristão Católico sira hetan bolu atu banati tuir Jesus Cristo nia hahalok ho Ninia doutrina sira, nunee ita bele foti decisão claro ba hahalok no ba ita nia moris. Jesus rasik hateten: Ema sé la lori nia cruz la’o tuir ha’u, la bele sai ha’u nia escolante. Ida nee mak desafio boot ba Católico hotu. Ita haree fali ba kotuk, saida mak ita halo ona nudar sarani Católico? Dalabarak ita hakarak hili hotu kedas lalaok oi-oin iha ita nia sociedade. Nudar Cristão Católico, tuir los ita hili dalan ida deit mak Jesus Cristo nia exemplo moris no Ninia doutrina.

Lalaok Cristão nian nee hamosu perigo lobuk ida, ita sai ema nebe la iha decisão fixo ou la iha princípio (pendirian tidak tetap), sai oportunista; exemplo ema muda tun-muda sae husi partido ida ba partido seluk tanba buka poder no posição, muda religião husi ida ba ida seluk tanba ema fahe osan. Ita nia fiar nakdoko ba mai tanba ema seluk fácil influencia ita nia moris, ita fácil buka buat nebe fo gosto do que buat nebe exige sacrifício. Buat hirak nee halo ita la consegue moris tuir Jesus nia lalaok. Ita sai fiar nain Católico maibé, hahalok hanesan gentio, fiar roh-rohan deit, sai sarani maibé la brani simu consequência, hahalok la tuir fiar Cristão Católico nian. Dom Basílio ba hahalok hirak hanesan nee hatete: ohin loron ema sarani, sarani nafatin maibé, naok, naok nafatin, missa, missa nafatin maibé, corrupção, corrupção nafatin, kama, rua, kama tolu nafatin.

Liliu ba foin sae sira, importante teb-tebes atu hetan educação no hetan convite hodi foti decisão no hili tuir dalan los! Tansa? Tem que nunee? Tanba felicidade lolos laos temporário ou sementara deit, maibé, permanente no dura too tempo naruk. Felicidade eh ksolok nee, ita bele atinge wainhira ita halo buat ruma nakonu ho comitmento, esforço, consistência tuir lalaok moris Jesus nian.

Felicidade eh ksolok rohan laek ema Cristão Católico ida sei atinge duni wainhira, nia hakas-an hodi halo tuir decisão no escolha moris sarani nian. Decisão ida nee mak oinsa ita nia moris banati tuir saida mak Cristo haruka. Tanba nee mak ema religioso sira hateten: para ser feliz de verdade, é preciso, primeiramente e essencialmente, ter uma vida espiritual bem estruturada. Não estruturada em uma mera crença ou religião cheia de regras e proibições, mas etrutura na verdadeira esséncia da vida…quotação nee significa; Felicidade rohan laek ba moris nee, laos tanba ita halo tuir taka matan deit ba regra sira nebe religião estabelece maibé, felicidade eh ksolok rohan laek nee hetan wainhira ita hatene comporta no compreende sentido essencial moris nee tuir Maromak nia hakarak iha Jesus nia hanorin sira.

Atu sai Jesus nia escolante lolos, ita precisa hatene no brani atu simu dificuldade sira nebe ita hasoru iha moris nee. Sai Católico autêntico, sarani ida la bele sai ema oportunista, la bele buka diak deit hodi fo todan ba ema seluk maibé, sarani ida precisa moris adulto iha nia fiar no hatene simu eh halo sacrifício iha moris. Dala ida tan Jesus rasik hatete:Ema sé la lori nia cruz la’o tuir ha’u, la bele sai ha’u nia escolante”.

Tanba nee mak, atu sai Cristão Católico diak eh sai seguidor Cristo nian, ita precisa sai adulto iha fiar basá, ita nia Salvação mai husi Maromak. Problema oinsa atu atinge salvação nee, ita tem que hatene colabora ho Maromak, hatene halo sacrifício no hatene conduz moris nee iha Maromak nia mahan. Iha situação no condição moris iha sociedade nebe deit, Jesus haruka: “Foti decisão ba!” Jesus convida ita nobun hodi sai nia manu-ain eh sai escolante autêntico (asli)

Iha relato Evangelho São Lucas nian justifica katak; Jesus la tolera nem compromi ho ema nebe iha ibun hakarak sai escolante maibé, laran la fo ba Jesus, moris la tuir Jesus nia hanorin. Ba ida nee, Papa Francisco dala ida hateten; “Pecador sim – traidor não”; lia fuan nee significa katak; ema moris sempre monu ba sala ho comete pecado maibé, kmanek liu tan atu ema la bele sai traidor. Sai Cristão Católico precisa ema hirak nebe iha comitmento ba nia moris tomak. Hadook-an husi kaan naresin ba material rai klaran nian, haluha tiha hahalok uluk nian hodi hahu moris foun, tau neon ba família no hatene pratica hahalok caridade tuir dalan Cristão nian (Cf Lc 9, 57-62; 14, 26-33).

Sarani nia laran kmaan (disponibilidade) hodi lori rasik nia Cruz lao tuir Jesus, maske liu husi dalan oi-oin, sacrifício bar-barak, desafio reb-rebo, Jesus fo aten brani ita hodi dehan: ”Jikalau seorang datang kepada-Ku dan ia tidak membenci bapanya, ibunya, isterinya, anak-anaknya, saudara-saudaranya, laki-laki atau perempuan, bahkan nyawanya sendiri, ia tidak dapat menjadi murid-Ku”//«Se alguém vem ter comigo e não me tem mais amor que ao seu pai, à sua mãe, à sua esposa, aos seus filhos, aos seus irmãos, às suas irmãs e até à própria vida, não pode ser meu discípulo (Luk 14:26)”.

Ita ema nia hanoin namlele; ita nia matenek ábut laek. Isin lolon dodok ida ne’e halo todan klamar. Moris Hanesan du’ut matak dader’ Namlaik loraik. Lia fuan Bíblica nee, endereça directamente ba ita nobun nebe sente-an simu ona we baptismo iha Igreja Católica, hakarak lori rasik Cruz tuir Jesus ka lae? …….Seja Louvado Nosso Senhor Jesus Cristo…Para sempre Seja Louvado a Sua mãe Maria Santíssima. (ignaslopes)

Leave a Reply

Your email address will not be published. Required fields are marked *