shadow
Diocese de Dili > NOTÍCIAS > LETURA DIÁRIA > XXIV Domingo Tempo Comum (ANO C)

XXIV Domingo Tempo Comum (ANO C)

Primeira Leitura            Ex. 32, 7-11. 13-14

Lia housi Livro Êxodo:

Iha loron hirak neba, Na’i lia tun ba Moisés, dehan: “Ó tun ona housi foho, basá, ó nia povo nebé ó lori mai housi rai Egipto, sai aat liu tiha ona. La kleur de’it sira la’o dook tiha housi dalan nebé Ha’u hatudu ba sira. Sira halo karau oan besi ida, hafoin, sira hakneak iha nia oin, hasa’e sacrifício ba nia, hodi dehan:  ‘Israel, ó nia Maromak sira mak ne’e; Maromak sira nebé hasai ó housi rai Egipto.”  Na’i lia tun ba Moisés: “Ha’u hare hela povo ne’e: nia, povo ida kakorok to’os. Ó keta harohan fodik ba sira. Husik Ha’u laran nakali hasouru sira; Ha’u sei halakon sira. Maibé, Ha’u sei halo ó sai nação boot ida.”  Tan lia ne’e, Moisés buka halo malirin Na’i nia laran, hodi dehan: “Na’i, tan sa Ita laran nakali hasouru Ita povo, povo nebé Ita hasai housi rai Egipto ho kbiit wa’in, ho liman maka’as? Ita hanoin Abraão, Isaac no Israel, Ita atan sira nebé uluk Ita jura ba Ita an rasik, hodi dehan: ‘Ha’u sei halo imi nia geração sai barak, hanesan fitun iha lalehan; rai ne’e hotu, nebé Ha’u dehan ba imi, Ha’u sei fo ba imi oan sira nu’udar liman rohan tinan ba tinan.” Nune’e, Na’i la kohi fo castigo nebé Nia hodi hata’uk ba Nia povo.

Maromak Futar Lia. 

 

Salmo Responsorial                                                                                                                                    Sal. 50(51), 3-4. 12-14. 17-19

Refrão : Ha’u ba, ha’u ba buka ha’u aman!!! Repete-se

Na’i, sadia ha’u, tan Ita laran luak!

Tan Ita laran di’ak tebes, kasu ha’u salan.

Fase ha’u aat tomak, hamos ha’u salan hotu. Refrão

 

Maromak, haraik fuan mos ida mai ha’u,

Halo foun hikas kbiit ha’u klamar.

Keta soe ha’u ba dook housi Ita futar oin,

keta hadook Ita Espirito housi ha’u. Refrão

 

Na’i, loke ha’u ibun,

ha’u ibun haklaken hahi Ita.

Ha’u sacrifício hakribit salan;

keta hakribit ha’u nia haraik-an. Refrão

 

Segunda Leitura                                                                                                                                                                       1 Tim. 1, 12-17

Lia housi São Paulo nia surat ba Timóteo:

Ha’u agradece Cristo Jesus, ita Na’in, nebé tau laran mai ha’u, hodi hili ha’u ba nia serviço, maibé, uluk ha’u ema aat, ema duni door, ema contra Maromak. Maski nune’e, Na’i laran di’ak mai ha’u, basá uluk ha’u la fiar, hodi halo buat hirak ne’e, tamba la hatene. Ita Na’in nia tulun barak tebes duni hamutuk ho fé no caridade nebé ita hetan iha Cristo Jesus. Sei fiar, hodi simu duni lia-fuan ida ne’e: Cristo Jesus mai iha mundo atu soi ema maksalak sira; maksalak uluk liu mak ha’u. Maibé, ha’u hetan Na’i nia laran luak, uluk knana’in atu Jesus Cristo hatudu Ninia laran malirin. Ema sira be neineik sei fiar iha Nia atu hetan moris rohan laek, sira sei banati tuir ha’u. Sei hahi, sei hasa’e glória ba Maromak be la mate, la haketak malu, ida mesak, Liurai tinan ba tinan. Amen.

Maromak Futar Lia.

 

Aclamação                                                                                                                                                                                           Lc. 15, 19

Refrão : Aleluia, Aleluia!! Repete-se

Aman, ha’u sala hasouru lalehan,

Ha’u sala hasouru Ita; Ha’u la soi Ita bolu ha’u oan. Refrão

 

Evangelho                                                                                                                                                                                         Lc. 15, 1-10

Na’i Jesus Cristo nia Evangelho        Nu’udar São Lucas haktuir:

Iha tempo neba, ema publicano no maksalak sira hakbesik ba Jesus, atu rona Nia. Maibé, ema fariseu no ema escrivão sira hateten ba malu: “Ema ida ne’e simu maksalak sira hodi han ho sira.”  Tan ne’e, Jesus dehan aiknanoik ida ne’e ba sira:  “Iha imi leet ema nebé mak iha karik bibi-malae atu ida, lakon tiha karik ida, nia sei la husik kedas sira sianulu resin sia iha rai fuik, atu ba buka ida be lakon to’o hetan fali nia? Hetan tiha, nia sei tau bibi ne’e iha nia kbaas ho ksolok; to’o tiha uma, nia bolu nia belun sira ho maluk sira be besik, hodi dehan ba sira: “Imi haksolok ho ha’u ba, basá, ha’u hetan fali ona ha’u nia bibi nebé lakon!”  Ha’u dehan kedas ba imi: Hanesan ne’e mos lalehan sei haksolok boot tan de’it ema maksalak ida fila ba di’ak, haksolok liu fali ema di’ak sianulu resin sia, nebé la kuran perdua. Feto ida nebé, mak iha karik dinel sanulu, lakon tiha ida, nia sei la sunu áhi-oan, sei la saar uma laran, sei la buka didi’ak nia dinel to’o hetan fali? Hetan tiha, nia sei bolu belun feto no maluk feto sira, hodi dehan ba sira: “Imi haksolok ho ha’u ba, tan ha’u hetan fali ona dinel be ha’u lakon”.  Tebes, ha’u dehan ba imi: Nune’e mak Maromak nia Anjo sira sei haksolok tan ema maksalak ida fila ba di’ak!”  Jesus lia tun ba sira dehan: “Ema ida iha oan mane na’in rua. Ida kiik dehan ba nia aman: ‘Ha’u aman, fó mai ona buat hirak nebé ha’u nian!’  Aman ne’e fahe sasan tomak ba sira na’in rua. Liu tiha loron ruma, oan kiik ne’e, halibur hamutuk nia sasan tomak, hodi la’o tiha ba rai dook ida; iha neba, nia halo nabén nia soin tomak, hodi moris aat liu. Hamohu tiha nia sasan tomak, rai nia hela ba, hamlaha boot. Nia hahu hetan ona susar. Iha oras ne’e, nia serviço ba rai-na’in ida. Rai-na’in ne’e haruka nia ba toos hein fahi. Nia hakarak teb-tebes han ho fahi sira, maibé, ema ida la husik. Iha oras ne’e, nia hanoin: ‘Ha’u aman iha emar barak, maibé ai-han la kuran; ha’u fali iha ne’e, mate hamlaha! Ha’u la’o ona! Ha’u ba ko’alia ho ha’u aman, hodi dehan: ‘Ha’u aman, ha’u sala hasouru lalehan, sala hasouru ita. Ha’u la soin ona ita bolu nafatin ha’u, ita oan. Hare de’it ha’u nu’udar ita nia trabalhador ida. Nune’e, nia hamriik ba ko’alia ho nia aman. Nia sei dook hela, nia aman hare ona nia. Nia aman hanoin nia teb-tebes, halai ba hasouru nia, hako’ak nia, re’in nia. Nia dehan: “Ha’u aman, ha’u sala hasouru lalehan, sala hasouru ita. Ha’u la soin ona, ita bolu ha’u oan’. Maibé nia aman lia tun ba atan sira: ‘Imi ba lori lalais, hatais furak liu, hodi fo hatais nia. Tau kadeli iha nia liman, sapatu iha nia ain. Ba dada karau bokur oan ida mai, atu oho. Ita sei han hemu, ita sei halo festa duni, basá, ha’u nia oan ida ne’e mate tiha ona, maibé moris fali, nia lakon tiha ona, maibé mosu.” Hotu, sira hahu festa. Maibé, oan mane boot sei iha hela toos. Fila housi toos, hakbesik daudaun uma, nia rona ema hananu no dansa. Nia bolu atan ida, hodi husu sa ida mak iha uma! Atan ne’e hatan: ‘Ó nia alin mak to’o ona mai. Ó nia aman haruka óho karau oan bokur ne’e, basá, nia hare ó nia alin fila ho isin di’ak’. Nia hirus boot, la kohi tama. Tan ne’e, nia aman mai hasouru nia hamáus nia atu tama. Maibé, nia dehan ba nia aman: ‘Tinan hira ona mak ha’u serbi ita, ha’u halo tuir nafatin ita nia hakaran. Maibé, ita la dauk fo bibi oan ida mai ha’u atu halo festa ho ha’u nia belun sira; ita nia oan ida ne’e halakon tiha nia soin ho feto aat sira, nia foin to’o mai, ita óho kedas ba nia karau oan bokur ne’e.”  Nia aman hatan ba nia: ‘Ha’u oan, ó horik  loron-loron ho ha’u. Sasan tomak ha’u nian ó nia mos. Maibé, ita sei halo festa duni, ita sei haksolok duni, basá, ó nia alin ida ne’e mate tiha ona, moris fali, lakon tiha ona, mosu fali”.

Lia Maksoyn.  

Leave a Reply

Your email address will not be published. Required fields are marked *