Primeira Leitura 1Tim. 3. 14-16
Lia housi livro São Paulo nia primeira Surat ba Timóteo:
Oan doben: Ha’u hakerek daudaun ba ó kona ba buat hirak ne’e, maibé ha’u hein katak la kleur ha’u bele haré ó; maibé ha’u la mosu lalais karik, ha’u hakarak katak ó hatene oin sá ema sei moris iha Maromak nia uma laran, katak iha Maromak moris nia Kreda, nebé tahan lialós no rai nia didi’ak. Lós duni, ita nia religião nia mistério kle’an duni: Nia mosu ho isin, Espírito fó sasin ba nia; anjo sira haré nia, haklaken ona ba gentio sira; ema fiar Nia iha mundo tomak, sa’e ba lalehan iha glória.
Maromak Futar Lia.
Salmo Responsorial Sal. 110(111). 1-2, 3-4, 5-6 (R. 2a)
Refrão : Na’i Nia liman fatin boot tebes!!! Repete-se
Ho laran tomak ha’u hahí Na’i,
Hamutuk ho sira be di’ak no lós.
Nia liman fatin boot tebes,
Sira be hadomi Nia;
Hanoin tuir ho neon no laran. Refrão
Boot no kmanek tebes Na’i Nia hahalok sira,
Nia laran-luak no neon mós rohan laek.
Na’i Nia hahalok, ema sei la haluha,
Na’i laran sadi’a no laran di’ak. Refrão
Nia la haluha Nia belun sira,
Tan laran metin ba Nia moruk.
Hatudu ba Nia povo kbiit Nia hahalok nian,
Hodi saran riku soin nação sira nian ba nia. Refrão
Aclamação cf. Jo. 6. 63c, 68c
Refrão : Aleluia, Aleluia!! Repete-se
Na’i, Ita futar liafuan sira mak espírito no moris.
Ita mak iha liafuan moris rohan laek nian. Refrão
Evangelho Lc. 7. 31-35
† Na’i Jesus Cristo nia Evangelho nu’udar São Lucas haktuir:
Iha tempo nebá, Jesus dehan: “Ha’u sei tanesan ema sira otas ne’e nian ho se lós? Sira hanesan se lós? Sira hanesan labarik sira nebé tur hakilar ba malu iha basar dehan: ‘Ami hananu knananuk ksolok nian, maibé imi la dansa; ami hananu knananuk tanis nian, maibé imi la tanis’. Basá João mai, la han pão, la hemu tua, no imi dehan: ‘Nia iha diabo iha nia laran’. Oan Mane mai, han hemu, no imi dehan: ‘Ne’e ema kanteen no lanuteen, publicano no maksalak sira nia belun’. Maibé matenek nia oan sira hatudu katak matenek mak lós duni”.
Lia Maksoyn.
