shadow
Diocese de Dili > NOTÍCIAS > LETURA DIÁRIA > Quinta – Feira, XXIV Semana do Tempo Comum (Ano C)

Quinta – Feira, XXIV Semana do Tempo Comum (Ano C)

Primeira Leitura                 1Tim. 4. 12-16

Lia housi livro São Paulo nia primeira Surat ba Timóteo:

Oan doben: keta husik ema la respeita ó tanba de’it ó sei foinsa’e, maibé sai exemplo di’ak ba fiar na’in sira hotu iha ó nia liafuan, ó nia hahalok, iha ó nia domin, ó nia fiar, no ho ó nia laran mós. Lê escritura ba ema sira, haklaken no hanourin to’o tempo nebé ha’u to’o. Ó simu ona kmanek espírito nian wainhira hodi profeta sira nia liafuan, katuas sira tau liman ba ó; keta husik kmanek ne’e leet de’it. Halo didi’ak ó nia knaar, saran ó an tomak ba nia, atu ema hotu bele haré oin sá ó la’o ba oin. Tau matan didi’ak ba buat nebé ó halo no hanourin; halo ne’e nafatin, nune’e ó sei soi ó an no moris sira hotu nebé rona ó.

Maromak Futar Lia.

 

Salmo Responsorial                                                                                                                                Sal. 110(111). 7-8, 9-10 (R. 2a)

Refrão : Na’i Nia liman fatin boot tebes!!! Repete-se

Na’i Nia liman nia hahalok mesak mós no lós,

Ninia lei sei la muda,

Sei metin tinan-ba-tinan,

Hari iha lialós no justiça. Refrão

 

Nia haruka maksoyn ba Nia povo,

Hametin hodi Nia moruk ba nafatin;

Hana’i Nia naran be Santo tebes! Refrão

 

Hamta’uk Maromak mak hun matenek nian,

Ema neon na’in sira halo tuir,

Nia glória sei hela ba nafatin. Refrão

 

Aclamação                                                                                                                                                                                          Mt. 11. 28

Refrão : Aleluia, Aleluia!! Repete-se

Imi sira hotu nebé kole no terus, mai buka Ha’u.

Ha’u sei kasu imi todan, Na’i dehan. Refrão

 

Evangelho                                                                                                                                                                                       Lc. 7. 36-50

Na’i Jesus Cristo nia Evangelho  nu’udar São Lucas haktuir:

Iha tempo nebá, Fariseu ida convida Jesus atu han hamutuk ho nia. Tama tiha iha nia uma, Nia tur iha mesa. Tuir mai, feto áat ida housi cidade, wainhira nia hatene katak Jesus mai han iha fariseu nia uma, mai lori botil ida ho mina morin, hodi tur iha Jesus nia kotuk, nia hahu fase Nia ain ho matawen, hodi hamaran ho nia fuuk, rei no kose ho mina morin. Haré tiha buat ne’e, fariseu nebé convida Nia hateten ba nia an dehan: “Ema ne’e profeta ida karik, nia sei hatene feto se no sá lós mak kona Nia ne’e, basá nia feto áat ida”.

Jesus hatan, hodi dehan ba nia: “Simão, Ha’u hakarak hato’o buat ruma ba ita”. Nia dehan: “Ko’alia ba, Mestre”. “Ema ida empresta osan ba ema na’in rua: ida halo tusan osan mean atus lima, ida seluk lima nulu. Tanba sira na’in rua la bele selu fali, nia kasu tiha sira nia tusan, ne’e duni, ida nebé mak sei hadomi nia liu tan?” Simão hatan dehan: “Ha’u hanoin katak ida nebé nia kasu tusan boot liu”. No Jesus dehan: “Ita hanoin lós!” Hafoin Nia fila oin ba feto, hodi dehan ba Simão: “Ita haré feto ne’e? Ha’u tama iha ita nia uma, ita la fó be atu fase Ha’u nia ain; maibé nia fali habokon Ha’u nia ain ho nia matewen hodi hamaran ho nia fuuk. Ita la rei Ha’u, maibé hahu Ha’u tama mai, nia la para rei Ha’u nia ain. Ita la kose mina ba Ha’u nia ulun, maibé nia kose Ha’u nia ain ho mina morin. Tan ne’e, Ha’u dehan ba ita: nia sala barak kasu tiha ona, basá nia hadomi makaas liu. Ema nebé hetan perdua ba sala uitoan de’it, nia mós hadomi uitoan de’it”. Tuir mai, Nia dehan ba feto: “Ó nia sala kasu tiha ona”. Sira nebé tur hamutuk ho Nia iha mesa hahu hanoin: “Ema ne’e sé lós atu kasu ema nia sala?” Nia dehan ba feto: “Ó nia fiar mak soi tiha ó; la’o ba iha dame laran”.

Lia Maksoyn.

Leave a Reply

Your email address will not be published. Required fields are marked *