shadow
Diocese de Dili > NOTÍCIAS > LETURA DIÁRIA > Sábado, XXIV Semana do Tempo Comum (Ano C)

Sábado, XXIV Semana do Tempo Comum (Ano C)

Primeira Leitura                   1Tim. 6. 13-16

Lia housi livro São Paulo nia primeira Surat ba Timóteo:

Oan doben: Ohin, iha Maromak nia futar oin, nebé buat moris hotu nia hun, no iha Jesus Cristo nebé ko’alia lolós nu’udar sasin kona ba lialós ba Poncio Pilatos, ha’u saran ba ó knaar atu halo buat hotu nebé ha’u haruka ó, la ho sala ruma eh buat ruma kuran, to’o tempo nebé ita Na’i Jesus Cristo mosu hikas mai, nebé Maromak sei fó hatene sai iha tempo lolós; Maromak nebé kmanek wa’in no buat hot-hotu nia Na’i mesak, Liurai liurai sira nian no Na’i na’i sira hotu nian; Nia mesak mak la mate; nia uma hela iha naroman rohan laek; ema seidauk haré ka bele haré; naran boot no kbiit rohan laek ba Nia. Amen.

Maromak Futar Lia.

 

Salmo Responsorial                                                                                                                                 Sal. 99(100). 2, 3, 4, 5 (R. 2c)

Refrão : Mai iha Na’i futar oin, ho knananuk ksolok nian!!! Repete-se

Rai tomak hahí Na’i,

Serbi Na’i ho ksolok;

Mai to’o Nia ho hananu ksolok nian. Refrão

 

Hatene ba katak Na’i mak Maromak!

Nia hakiak ita, ita Ninian.

Ita, Nia povo, bibi sira Nia luhan nian. Refrão

 

Tama housi odamatan hodi agradece,

Tama ba Nia kadunan ho knananuk hahí nian.

Haliban Nia, hana’i Nia naran. Refrão

 

Tanba Na’i di’ak tebes!

Nia laran luak rohan laek;

Nia fidelidade sei to’o bei oan sira hotu. Refrão

 

Aclamação                                                                                                                                                                                       cf. Lc. 8. 15

Refrão : Aleluia, Aleluia!! Repete-se

Ksolok ba sira nebé rona Maromak Nia liafuan ho neon no laran hodi fó fuan,

tan sira laran metin . Refrão

 

Evangelho                                                                                                                                                                                          Lc. 8. 4-15

Na’i Jesus Cristo nia Evangelho  nu’udar São Lucas haktuir:

Iha tempo nebá, wainhira ema lubun boot halibur hamutuk, hodi hakbesik ba Jesus housi cidade tomak, Nia haktuir aiknanoik ida ne’e: “Ema ida ba kari fini. Nia sei kari dadaun, fini balun monu iha dalan ninin, hafoin ema sama no manu sira housi lalehan mai han sira. Fini balun monu iha fatuk leten; moris tiha, sira namlaik, basá be la iha. Fini balun fali monu iha aitarak laran. Aitarak sira moris hamutuk ho sira, hodi hanehan sira. Ikus mai, fini balun monu iha rai di’ak, hodi moris no fó fuan dala”. Hateten tiha ne’e, Nia dehan ho lia maka’as” “Sira nebé iha tilun atu rona, rona ba!”

Escolante sira husu ba Nia aiknanoik ida ne’e katak sá. Nia hata: “Ba imi fó hatene tiha ona mistério Maromak nia reino nian; maibé ba ema seluk hato’o de’it ho aiknanoik sira, atu hodi haré, sira la haré momós; no hodi rona, sira la hatene momós’.

Ne’e duni aiknanoik ida ne’e katak: fini mak Maromak nia liafuan. Fini nebé monu iha dalan ninin mak ema sira nebé, rona tiha, diabo mai hodi hasai liafuan housi sira nia laran atu sira la bele fiar hodi hetan maksoyn. Fini nebé monu iha fatuk leten mak ema sira nebé wainhira sira rona liafuan, sira simu nia ho ksolok; maibé, tan abut la iha, sira fiar ba tempo uitoan de’it, hafoin husik ona iha oras susar nian. Fini nebé monu iha aitarak laran, ne’e mak sira nebé rona, maibé hanoin oi-oin, riku soi no ksolok mundo ne’e nian hanehan sira, la biban atu sai boot no tasak. No fini nebé monu iha rai di’ak, ne’e mak sira nebé rona liafuan ho neon ho laran, rai didi’ak nia hodi fó fuan, tan sira laran metin”.

Lia Maksoyn.

Leave a Reply

Your email address will not be published. Required fields are marked *