Primeira Leitura 1Tim. 6. 2c-12
Lia housi livro São Paulo nia primeira Surat ba Timóteo:
Oan doben: Hanourin buat hirak ne’e hodi haka’as sira. Ema nebé hanourin buat seluk no la laran metin ba doutrina lolós, katak ita Na’i Jesus Cristo nian, doutrina nebé tuir religião lolós, ema ne’e beikten no loko an hodi hakarak husu buat hotu no haksesuk malu kona ba liafuan sira. Housi ne’e, laran moras, istori malu, hasara malu, no la fiar malu sei mosu mai; sei mosu mós haksesuk malu nebé la hotu housie ma sira nebé hanoin la lós, la hatene lolós buat ida no ema sira nebé hanoin katak religião mak dalan di’ak atu hetan moris di’ak. Religião lori duni mai moris di’ak, maibé ba sira de’it nebé laran haksolok ho buat nebé sira iha ona. Ita la lori buat ida maim undo ne’e, no ita sei la lori sai buat ida housi nia; maibé wainhira ita iha aihan no hatais, ita haksolok ona ho sira ne’e. Ema nebé hakarak sai riku hetan babeur barak; sira heta sira an ho hakarak beik no perigosu oi-oin, nebé nei-neik sei lori sira ba susar boot no todan. Domin ba osan mak buat áat hotu nia hun; iha ema balun nebé, tan tuir nia, husik ona fiar lolós hodi fó ba sira nia klamar kanek boot oi-oin.
Maibé ó, nu’udar ema nebé saran tiha an ba Maromak, sei hewai hotu ne’e. Ó sei haka’as an atu sai santo no hamta’uk Maromak, nakonu ho fiar no domin, ho paciência barak no laran maus. Halo didi’ak funu fiar nian hodi manan moris rohan laek ba ó nian an; laran metin ba moris rohan laek nebé Maromak bolu ó wainhira ó hateten sai ó nia fiar hodi ko’alia lolós kona ba lialós iha sasin barak sira oin.
Maromak Futar Lia.
Salmo Responsorial Sal. 48(49). 6-7, 8-10, 17-18, 19-20 (R. Mt. 5. 3)
Refrão : Rahun di’ak ba sira nebé kiak iha espírito, basá, reino lalehan sira nian!!! Repete-se
Tan sá ha’u sei ta’uk loron susar nian,
Wainhira ema áat sira hale’u ha’u,
Sira be laran metin iha sira kbiit,
Foti an ho sira riku soin? Refrão
Ema ida la bele selu tan nia an,
Ka selu Maromak tanba nia maksoyn;
Basá, la iha riku soi nebé hodi bele selu,
Atu hanaruk nia moris to’o la nahas,
No atu nia la koko lalaok mate nian. Refrão
Ó hare karik ema sai riku, keta laran susar,
No hauwa’in nia uma riku soi.
Wainhira nia mate, sei la lori buat ida,
Nia riku soi sei la hakoi hamutuk ho nia. Refrão
Maski nia haksolok iha moris hodi hanoin:
“Hahí ba ó tanba ó tau matan ba ó didi’ak”.
Nia mós sei hôrik ho nia aman sira
Nebé la haré ona naroman ba nafatin. Refrão
Aclamação cf. Mt. 11. 25
Refrão : Aleluia, Aleluia!! Repete-se
Rahun di’ak ba Ita, Aman, Na’i lalehan no rai nian, tan
Ita hatudu mistério reino lalehan nian ba kiik sira . Refrão
Evangelho Lc. 8. 1-3
† Na’i Jesus Cristo nia Evangelho Nu’udar São Lucas haktuir:
Iha tempo nebá, Jesus la’o housi cidade ida ba cidade seluk no housi knua ida ba knua seluk, hodi hanourin no haklaken liafuan di’ak kona ba Maromak nia reino. Sira sanulu resin rua la’o hamutuk ho Nia, no mós feto balun nebé hetan di’ak housi moras oi-oin no housi espírito áat sira: Maria nebé ema hanaran Madalena, housi nia diabo hitu sai tiha ona; Joana, Herodes nia atan Cusa nia feen, Susana no feto seluk tan, nebé tulun sira ho sira nia riku soi.
Lia Maksoyn.
