shadow
Diocese de Dili > NOTÍCIAS > LETURA DIÁRIA > XXVI Domingo Tempo Comum (ANO C)

XXVI Domingo Tempo Comum (ANO C)

Primeira Leitura                     Am. 6, 1a. 4-7

Lia housi Livro Profeta Amós:

Imi sira be sama hanehan ema ki’ak sira, imi sira be hakarak halakon tiha kiik sira iha rai-klaran, imi ne’e rona didi’ak mai! Imi dehan: “Bainhira mak sei liu fulan foun atu ita bele fa’an tiha ita nia ai-han? Bainhira mak sei liu loron sábado atu ita bele loke ita nia uma laran hodi fa’an ita nia trigo?  Ita sei halo ita nia sasukat sira kiik liu tan, ita sei hasa’e osan mutin nia folin, ita sei halo dasin falsu atu han matak? Ita sei hodi ita nia osan sosa ema ki’ak sira. Ita sei sosa duni ema ki’ak sira hodi chenela par ida. Ita nia fos íkis sira mos, ita sei fa’an hotu.”  Maibé, Na’i hakotu kedas lia ba Jacob, dehan: “Sira nia hahalok ida de’it mos Ha’u sei la haluhan!”

Maromak Futar Lia.

 

Salmo Responsorial                                                                                                                                            Sal. 145(146), 7. 8. 9. 10

Refrão : Ha’u klamar hahí Na’i!!! Repete-se

Na’i tulun ema sira be ema fo terus

haraik ai-han ba ema sira hamlaha,

fo liberdade ba sira be dadur. Refrão

 

Na’i fo roman ba ema sira be matan delek,

ho Nia kbiit tahan ema kbiit laek.

Nia hadomi ema sira be los. Refrão

 

Nia tahan ema sira be la’o rai,

tau matan ba oan ki’ak no faluk,

maibé, taka dalan ba ema aat. Refrão

 

Na’i ukun tinan ba tinan;

Sião, ó nia Maromak liurai tinan ba tinan! Refrão

 

Segunda Leitura                                                                                                                                                                      1 Tim. 6, 19-31

Lia housi São Paulo nia surat ba Timóteo:

Oan doben: Ó, Maromak nia ema, buka haka’as-an tuir justisa, hamta’uk Maromak, fiar hodi halo di’ak, buka terus hotu, laran maus nafatin. Funu maka’as, funu tan fé. Buka manán moris rohan laek. Ba moris ida ne’e mak Maromak bolu ó. Kona ba moris ne’e duni mak ó jura fiar iha ema barak nia oin. Iha Maromak futar oin, Maromak be haraik moris ba buat tomak, mos iha Cristo Jesus futar oin, Cristo be fo sasin di’ak iha Pôncio Pilatos oin, ha’u husu buat ida ne’e ba ó: moris tuir nafatin ó nia fé nebé fo’er la kaer, moris tuir lolos, to’o loron ita Na’in Jesus Cristo mosu mai. Iha oras ne’e, mak Nia sei halo atu ema hotu-hotu hare Nia nu’udar Liurai ida mesak, kbiit wa’in, liurai hotu-hotu nia Liurai, Na’i hotu-hotu nia Na’in, Nia mesak de’it la mate. Nia horik iha roman ema labele to’o ema ida labele hare. Ema haNa’i hahí Nia tinan ba tinan. Amen.

Maromak Futar Lia.

 

Aclamação                                                                                                                                                                                       1 Tim. 6, 11

Refrão : Aleluia, Aleluia!! Repete-se

Ó buka moris tuir justisa, no hahalok santo, moris tuir nafatin fé no laran luak.

Funu maka’as tan ó nia fé. Refrão

 

Evangelho                                                                                                                                                                                      Lc. 16, 19-31

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba fariseu sira:  “Ema riku ida hatais mesa mean furak, ho kabas lahan lotuk. Loron-loron nia halo festa boot. Iha nia odamatan toba hela ki’ak ida naran Lázaro, isin tomak mesak kanek. Ki’ak ne’e hakarak hili étu-munun iha riku nia mesa okos; ásu sira belo hela nia kanek. Loron ida, ki’ak ne’e mate; Maromak nia Anjo sira mai lori tiha nia ba hamutuk ho Abraão. Riku ne’e mos mate; ema hakoi tiha nia ba rai. Terus barak duni iha inferno, riku ne’e foti matan hare housi dook Abraão hamutuk ho Lázaro. Iha oras ne’e, nia hasa’e lia, dehan: “Ha’u aman Abraão, sadia atan ha’u! Haruka netik Lázaro habokon nia liman fuan ba wé hodi halo malirin ha’u nánal, basá, áhi han ha’u maka’as tebes iha ne’e!”  Abraão simu hodi dehan: “Oan, hanoin ba. Ó nia di’ak ó simu ona iha ó nia moris tomak; Lázaro fali simu mak susar iha nia moris tomak. Oras ne’e, Lázaro haksolok iha ne’e, maibé, ó fali hetan terus maka’as. Hafoin, housi ami ba imi mos, rai-horun naruk boot haketak ita. Ema ida hakarak karik liu ba imi, sei labele; imi ida hakarak hakat mai ami, mos sei labele!”  Nia hatan fali hodi dehan:  “Ne’e sa, ha’u aman, ha’u hasa’e lia ba ita atu haruka Lázaro ba ha’u nia uman, basá, ha’u iha alin Na’in lima. Haruka Lázaro fo hatene sira atu labele mai tan fatin aat ida ne’e!” Abraão dehan ba nia:  “Sira iha Moisés no Profeta sira iha nebá. Rona sira ba!” Maibé, nia simu hodi dehan:  “Lae, ha’u aman Abraão! Mate-bian ruma ko’alia ho sira karik, sira sei hakribit sira salan.” Abraão dehan: “Sira la se tilun karik ba Moisés no Profeta sira, maski mate-bian ruma moris hi’as housi mate, sira sei la hakribi salan liu!”

Lia Maksoyn.

Leave a Reply

Your email address will not be published. Required fields are marked *