shadow
Diocese de Dili > NOTÍCIAS > LETURA DIÁRIA > XXVII Domingo Tempo Comum (ANO C)

XXVII Domingo Tempo Comum (ANO C)

Primeira Leitura            Hab. 1, 2-3. 2, 2-4

Lia housi Livro Profeta Habacuc:

Na’i, to’o bainhira los mak ha’u husu tulun Ita la rona ha’u? To’o bainhira los mak ha’u hakilar hasouru buat aat, Ita la mai soi ha’u? Tan sa, Ita husik ha’u hare hela buat aat, Ita mos hare hela de’it injustisa? Iha ha’u oin, ha’u hetan de’it mak ema hanehan fo terus, lia la tuir malu, hirus malu”. Tan ne’e, Na’i lia tun mai ha’u, dehan: “Ó hakerek buat hirak nebé ó hare daudaun. Hakerek didi’ak iha ai-kabelak, atu ema bele lê la susar. Maski buat hirak nebé ó hare daudaun ne’e, mosu de’it iha nia oras, sira sei mosu duni. Maski kleur atu mosu, ó lolos hein, basá, to’o oras sei mosu tebes. Imi hare oin sa ema aat sira sei mohu lakon, ema di’ak sira fali sei moris tan sira laran metin nafatin.

Maromak Futar Lia.

 

Salmo Responsorial                                                                                                                  Sal. 94(95), 1-2. 6-7. 8-9

Refrão : Ohin imi rona karik Na’i Futar Lia, Imi keta taka imi laran!!! Repete-se

Imi mai haksolok hodi hahí ita maksoyn.

Ita ba Nia futar oin, hodi fo agradese;

ita hananu hodi hahí ita Na’in. Refrão

 

Imi mai, ita tuku tur ba rai

hodi adora Na’i be halo ita moris.

Na’i, ita nia Maromak;

nia povo mak ita, Nia bibi mak ita. Refrão

 

Imi rona Nia Futar Lia

keta taka imi tilun hanesan uluk imi halo

iha rai fuik maran, wainhira imi bei-ala sira

koko Ha’u, maski sira hare tiha ona Ha’u liman kbiit. Refrão

 

Segunda Leitura                                                                                                                                    2 Tim. 1, 6-8. 13-14

Lia housi São Paulo nia surat ba Timóteo:

Oan doben: Ha’u husu ba ó atu fo kbiit foun ba Maromak nia grasa nebé ó simu, wainhira ha’u tau liman ba ó. Na’i Maromak la haraik laran ta’uk mai ita; maibé, Nia haraik mai ita aten barani, laran luak, neon matenek. Tan ne’e, ó keta moe fo sasin kona ba ita Na’in, mos kona mai ha’u be dadur tan Nia. Hodi Maromak kbiit, ó terus hamutuk ho ha’u tan Evangelho. Buka moris tuir lia di’ak nebé ó rona housi ha’u, nu’udar ó nia fé, ó nia caridade iha Cristo Jesus. Rai metin doutrina di’ak nebé Na’i Maromak haraik mai ita, hodi Espirito Santo nebé horik iha ita.

Maromak Futar Lia.

 

Aclamação                                                                                                                                                                    Jo. 8, 12

Refrão : Aleluia, Aleluia!! Repete-se

Na’i lia tun, dehan: “Ha’u mundu nia roman;

ema sê tuir Ha’u, hetan roman moris nian. Refrão

 

Evangelho                                                                                                                                                               Lc. 17, 5-10

Na’i Jesus Cristo nia Evangelho nu’udar São Lucas haktuir:

Iha tempo nebá, Apóstolo sira hasa’e lia ba Jesus, dehan:  “Halo boot ami nia fiar!”  Na’i lia tun ba sira: “Imi nia fiar boot karik hanesan modo musan ida, imi bele dehan ba ai-hun ne’e: ‘Fokit ó-an rasik housi ne’e, ba kuda ó-an iha tasi laran’, nia sei tuir tebes imi nia haruka. Iha imi nia leet sê mak iha atan ida serbisu ba nia, fila rai eh hein balada, wainhira atan ne’e fila housi toos mai, nia dehan ba atan: ‘Ó mai lalais tur iha mesa?’ Nia la dehan uluk: Ó ba te’in eh ó ba hatais lalais atu serbi mesa, wainhira ha’u han, hafoin, mak ó sei tur han!?’  Ema sê mak fo agradese ba nia atan, tan atan halo tuir nia hakaran? Nune’e mos imi, bainhira imi halo tiha buat hirak nebé Na’i Maromak haruka halo, imi sei dehan:’ Tebes, ita atan folin laek. Ita halo de’it buat nebé haruka halo.”

Lia Maksoyn.

One comment on “XXVII Domingo Tempo Comum (ANO C)

  1. Bele ka hau hetan leitura sira nee molok domingo?
    Karik Bele mos hau hetan leitura sira lor-loron nian?
    Hau hakrak tebes atu molok hau ba tuir missa tamba bele ajuda tebes hau hodi halo refleksaun pessoal.

Leave a Reply

Your email address will not be published. Required fields are marked *