shadow
Diocese de Dili > NOTÍCIAS > LETURA DIÁRIA > Terça – Feira, XXVII Semana do Tempo Comum (Ano C)

Terça – Feira, XXVII Semana do Tempo Comum (Ano C)

Primeira Leitura                      Jon. 3. 1. 10

Lia housi Profecia Jonas nian:

Na’i lia tun ba Jonas ho liafuan hirak ne’e: “Ó hamriik, la’o ba cidade boot Nínive nian hodi haklaken ba nia lia Ha’u atu dehan ba ó”. Jonas hamriik la’o ba Nínive tuir Na’i futar liafuan. Iha Maromak futar oin, Nínive cidade boot ida; hodi loron tolu bele la’o housi rohan to’o rohan. Jonas tama iha cidade, la’o liu tiha loron ida, nia hahu hanourin ho liafuan hirak ne’e: “Loron háatnulu tan, Nínive sei rahun”. Ema sira be tur iha cidade Nínive fiar Maromak; sira fó sai atu hadera an no ema hotu, housi boot liu to’o kiik liu, hatais hena tartarak. Wainhira liurai Nínive rona lia tatoli ne’e, hamriik housi nia trono, hasai tiha nia unuk, taka an fali ho hena tartarak hodi tur iha ahi kdesan laran. Hafoin, liurai ho nia ministro sira fó sai ordem ida nebé dehan: “Ema no balada sira hotu la bele han, la bele hemu wé. Hot-hotu sei taka an ho hena tartarak no sei harohan ba Maromak ho laran tomak kbiit hotu; ida-idak sei hakribi hahalok áat no sala boot sira nebé nia halo tiha ona. Sé mak hatene, kala Maromak muda Nia hanoin hodi hasai castigo housi ita, hatun Nia hirus atu ita la bele mate mohu!” Maromak haré tiha sira nia haka’as an atu husik tiha sira nia hahalok áat. Nia hasai castigo nebé atu haterus sira.

Maromak Futar Lia.

 

Salmo Responsorial                                                                                              Sal. 129(130). 1-2, 3-4ab, 7-8 (R. 3)

Refrão : Na’i, Ita haré karik ami salan, sé mak bele soi an?!!! Repete-se

Na’i, housi kle’an nakukun, ha’u bolu Ita,

Na’i, rona ha’u lian ba!

Ita sée tilun ba ha’u lian harohan nian. Refrão

 

Ita hanoin karik ami salan sira,

Na’i, ema sé bele soi an?

Maibé, iha Ita iha perdua,

Tan ne’e, ami hamta’uk Ita. Refrão

 

Nu’udar sentinela hein rai-hun mutin,

Nune’e mós Israel hein hela Na’i;

Tan iha Na’i hetan laran-luak,

Iha Nia bele hetan maksoyn wa’in.

Nia mak sei soi Israel housi nia hahalok áat hotu. Refrão

 

Aclamação                                                                                                                                                                  Lc. 11. 28

Refrão : Aleluia, Aleluia!! Repete-se

Rahun di’ak ba sira nebé rona

Maromak Nia futar lia hodi moris tuir. Refrão

 

Evangelho                                                                                                                                                            Lc. 10. 38-42

Na’i Jesus Cristo nia Evangelho nu’udar São Lucas haktuir:

Iha tempo nebá, tuir dalan, Jesus to’o knua ida. Feto ida naran Marta simu Nia iha nia uma. Marta iha feton ida naran Maria, nebé tur de’it iha Jesus nia ain hodi rona Nia Ko’alia. Marta fali, nebé la’o ba la’o mai hodi serbisu barak, hakbesik hodi dehan: “Na’i, Ita la haré katak ha’u nia alin husik ha’u serbisu mesa-mesak? Dehan to’ok ba nia atu tulun ha’u,” Na’i hatan ba nia: “Marta, Marta, ó la’o kole hodi hanoin resin kona ba buat barak; maibé buat ida de’it mak folin lós. Maria hili buat nebé di’ak liu hotu, nebé ema ida sei la hadau housi nia”.

Lia Maksoyn.

Leave a Reply

Your email address will not be published. Required fields are marked *