shadow
Diocese de Dili > NOTÍCIAS > LETURA DIÁRIA > Sexta – Feira, XXVII Semana do Tempo Comum (Ano C)

Sexta – Feira, XXVII Semana do Tempo Comum (Ano C)

Primeira Leitura            Joel. 1. 13-15; 2. 1-2

Lia housi Profecia Joel nian:

Na’ilulik sira, hatais imi an ho hena karon nian hodi tanis; imi sira be serbi altar, halerik ba iha kalan tomak ida; imi hotu be serbi ha’u nia Maromak, basá, iha templo imi Maromak nian, hanetik tiha ona hasa’e sacrifício no buat karan. Imi fó sai ba ema hotu hodi halo jejun boot ida atu halibur povo santo. Imi halibur katuas sira no povo hotu nação nian, iha Na’i, Ita Maromak Nia templo. Imi sei harohan ho lian maka’as ba Na’i: “Ah, sá loron ne’e!”. Basá, Na’i Nia loron besik ona! Loron ne’e sei mai, hanesan atu sobu, housi Na’i kbiit Na’in.

Imi sei huu trombeta iha Sião, hakilar hodi fó hatene iha Ha’u Nia foho Santo. Ema hotu housi nação ta’uk nakdedar tan Na’i nia loron besik to’o ona! Tebes, loron ne’e besik ona: loron nakukun nian, loron kalohan taka metin nian, loron mahan nian. Hanesan naroman rai-hun mutin nian namkari iha foho sira leten, nune’e mós sei namkari iha foho sira leten povo wa’in ida no barani. Houri uluk kedas la adauk iha povo ida hanesan ne’e, no mós iha tempo ikus, housi otas ba otas, sei la mosu tan povo ida hanesan ne’e.

Maromak Futar Lia.

 

Salmo Responsorial                                                                                                        Sal. 9A. 2-3, 6, 16, 8-9 (R. 9ª)

Refrão : Na’i sei tesi lia ba mundo ho justiça!!! Repete-se

Ho laran tomak ha’u hahí Ita, Na’i,

Hodi haklaken Ita Nia kmanek sira;

Iha Ita, ha’u haksolok no hananu,

Ha’u sei hahí Ita naran, Maromak Leten áas liu. Refrão

 

Na’i hatun fiar laek sira, hamohu ema áat sira,

Halakon sira naran ba nafatin.

Hatun povo tomak ba rai ku’ak nebé sira rasik ke’e,

Kesi sira ain iha hani nebé sira halo. Refrão

 

Maromak, Liurai, hatoda an iha Nia trono,

Iha trono nebé Nia hari atu tesi lia;

Nia sei tesi lia ba mundo ho justiça,

Sei ukun povo hotu ho lialós. Refrão

 

Aclamação                                                                                                                                                         Jo. 12. 31b, 32

Refrão : Aleluia, Aleluia!! Repete-se

Ohin liurai mundo ne’e nian sei duni sai ona. Wainhira ema foti Ha’u housi rai,

Ha’u sei dada ema hot-hotu mai Ha’u. Refrão

 

Evangelho                                                                                                                                                             Lc. 11. 15-26

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus duni sai demónio ida; maibé ema balun dehan: “Nia duni sai diabo hodi Belzebu, diabo sira nia ulun, nia naran.” Balun fali husu ba Nia sinal ida housi lalehan, atu koko Nia. Maibé, hatene tiha sira nia hanoin, Nia dehan ba sira: “Reino hotu nebé fahe malu sei sobu rahun, no uma ida sei monu iha uma seluk nia leten. Nune’e mós, Satanas fahe karik nia an ba rua, nia reino sei tahan oin sá lós? Basá imi dehan katak hodi Belzebu mak Ha’u duni sai diabo sira. Ha’u duni sai diabo sira hodi Belzebu nia naran karik, hodi sá nia naran mak imi nia oan sira duni sai sira? Tan ne’e mak sira sei tesi lia ba imi. Maibé Ha’u duni sai diabo sira hodi Maromak nia limanfuan karik, ne’e dehan katak Maromak nia reino to’o ona ba imi. Wainhira ema maka’as ida ho kroat hein nia uma boot, nia rikusoi hela metin hakmatek; maibé wainhira ema ida maka’as liu  nia mosu mai karik hodi manan nia, ema ne’e hadau nia kroat nebé fó laran metin ba nia, hodi fahe nia sasan tomak. Ida nebé la hamutuk ho Ha’u, nia hasouru Ha’u; no ida nebé la halibur ho Ha’u, nia sei namkari.

Wainhira espírito fo’er ida sai housi ema ida, nia la’o lemo rai fuik maran hofi buka hakmatek. La hetan tiha, nia dehan: ‘Ha’u sei fila fali ba uma nebé ha’u husik tiha.’ To’o tiha nebá, nia hetan fatin ne’e saar mós tiha no furak. Hafoin nia ba lori tan espírito na’in hitu nebé áat liu fali nia; sira ne’e tama, hodi hôrik iha nebá. Ikus mai, ema ne’e nia rohan sai áat liu fali uluk”.

Lia Maksoyn.

Leave a Reply

Your email address will not be published. Required fields are marked *