shadow
Diocese de Dili > NOTÍCIAS > LETURA DIÁRIA > XXVIII Domingo Tempo Comum (ANO C)

XXVIII Domingo Tempo Comum (ANO C)

Primeira Leitura                    2. Rs. 5, 14-17

Lia housi Livro Liurai sira nian:

Iha loron hirak nebá, General Naamã tun tiha ba mota Jordão hodi luku wé dala hitu, tuir Profeta Eliseu haruka. Naamã nia isin kanek lepra sai nurak fali hanesan kosok oan ida nia isin. Naamã lori nia emar sira hotu fila kedas ba hasouru Profeta. To’o tiha Profeta nia oin, Naamã dehan: “Oras ne’e mak ha’u hatene lolos katak iha mundo rai-klaran la iha Maromak ida hanesan Israel nian”. Tan ne’e, simu netik sasan ha’u atu hasa’e ba ita”.  Maibé, Eliseu dehan ba nia: “Ha’u jura ba Na’i be moris, ha’u sei la simu buat ida”. Naamã hodi biit hakarak Eliseu simu, maibé, nia la simu liu. Tan ne’e, Naamã hateten: “Tan ita la kohi simu, ne’e sa haraik netik mai atan ha’u rai witoan rai ne’e nian, naton ba altar, nebé kuda rua bele lori. Basá, atan oan ne’e, housi ohin ba oin sei la halo tan ona lulik ba Maromak seluk, maibé sei hasa’e de’it sacrificio ba Na’i, Israel nia Maromak.”

Maromak Futar Lia.

 

Salmo Responsorial                                                                                                                                       Sal. 97(98), 1. 2-3ab. 3cd-4

Refrão : Iha povo sira oin Maromak hatudu Maksoyn!!! Repete-se

Imi hananu ba Na’i knananuk foun ida,

basá, Nia halo buat mesak kmanek.

Nia futar liman los manan funu;

manan ho nia futar liman santo. Refrão

 

Na’i hatudu nia Maksoyn;

Nia hatudu justiça ba nasaun sira.

Nia la haluhan nia domin,

la haluhan lia Nia hakotu ba Israel uman. Refrão

 

Rai ikun rai ulun sasin Maksoyn

ita Maromak nian.

Rai tomak haklaken Na’i,

haklalak hahí Nia ho ksolok. Refrão

 

Segunda Leitura                                                                                                                                                                       2 Tim. 2, 8-13

Lia housi São Paulo nia surat ba Timóteo:

Oan doben:  Hanoin mak Jesus Cristo, nebé moris hias ona housi mate. Tuir ha’u nia Evangelho, Jesus moris housi David. Tan de’it Evangelho, ha’u terus, ema dadur ha’u hanesan áhu-na’in boot ida. Maibé, Maromak Futar Lia-fuan ema labele dadur. Ha’u terus buat hotu atu ema sira be Na’i hili bele hetan mos salvasaun no rahun di’ak nebé la mohu. Salvasaun ne’e ita hetan de’it iha Cristo Jesus. Lia ida ne’e mak sei fiar metin:  Ita mate karik hamutuk ho Cristo, ita sei moris mos hamutuk ho Nia. Ita laran metin nafatin karik ho Cristo, ita sei ukun mos hamutuk ho Nia. Ita dehan karik ita la hatene Nia, Nia sei dehan mos katak Nia la hatene ita. Ita fila karik kotuk ba Nia, maski nune’e, Nia sei hanoin ita nafatin, basá, Nia Ema lia-fuan oin ida de’it.

Maromak Futar Lia.

 

Aclamação                                                                                                                                                                                        Apc. 2, 10c

Refrão : Aleluia, Aleluia!! Repete-se

Na’i lia tun, dehan:  Ó fo laran nafatin to’o mate,

Ha’u sei haraik prémio ba ó. Refrão

 

Evangelho                                                                                                                                                                                       Lc. 17, 11-19

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus liu daudaun ba Jerusalém, kona housi Samaria ho Galileia sira leet. Nia atu tama daudaun ona ba knua ida, ema moras lepra na’in sanulu mai hasouru Nia. Housi dook sira hasa’e lia ba Jesus, dehan: “Jesus, Mestre, sadia atan ami sira!”  Hare tiha sira, Jesus lia tun dehan:  “Imi ba hasouru sacerdote sira”. La’o tuir sira dalan, sira hetan fali isin di’ak. Sira ida, hare tiha katak nia isin di’ak fali ona, nia fila kedas hodi hahí maka’as Maromak. Nia hakneak besik Jesus nia ain, hodi hakru’uk to’o rai atu fo agradese. Ema ne’e Samaritano ida. Jesus lia tun, dehan:”  Laos ema nain sanulu mak hetan isin di’ak?  Sira na’in sia iha nebé? Ida la fila atu hahí Maromak?  Mak ema housi rai seluk ne’e de’it? Hafoin, Jesus lia tun ba ema ne’e: Hamriik, la’o ó nian ba! Ó nia fiar mak soi ó”.

Lia Maksoyn.

Leave a Reply

Your email address will not be published. Required fields are marked *