shadow
Diocese de Dili > NOTÍCIAS > LETURA DIÁRIA > XXX Domingo Tempo Comum (ANO C)

XXX Domingo Tempo Comum (ANO C)

Primeira Leitura                    Ex. (Ecl) 35, 15b-17, 20-22ª (12-14. 16-18)

Lia housi Livro Ben-Sirá:

Na’i mak ó nia juiz Nia simu ema la fihir, Nia la tulun ema ida, hodi fo terus fali ema ki’ak sira. Nia see tilun ba ema sira be harohan iha susar laran. Nia la hakribit oan ki’ak sira nia orasaun; Nia sei la hakribit feto faluk sira nia halerik. Ema nebé hana’i Maromak nu’udar Maromak hakarak, Maromak sei rona duni nia orasaun, nia orasaun sei sa’e to’o kalohan leten. Ema nebé haraik-an, nia orasaun sei sa’e borus kalohan leten; nia sei la hakmatek, wainhira nia orasaun la to’o Maromak Nia la husik harohan to’o oras nebé Na’i Maromak boot liu hotu rona nia orasaun, hodi tesi lialos ba ema santo sira.

Maromak Futar Lia.

 

Salmo Responsorial                                                                                                         Sal. 33(34), 2-3. 17-18. 19-23

Refrão : Ema ki’ak harohan, Na’i rona nia!!! Repete-se

Ha’u hahi Na’i kalan loron,

Nia hahi iha nafatin ha’u ibun.

Maromak mak ha’u nia gloria!

Ema nebé haraik-an rona nia hodi haksolok. Refrão

 

Nia sei hamriik hasouru ema nebé la iha religião,

atu halakon housi rai ninia hanourin.

Basa, Na’i sei rona ema sira moris tuir justisa nia halerik

no sei hasai sira housi todan neon sala nian. Refrão

 

Tamba Na’i mak Maromak nebé besik liu neon susar sira,

pronto atu soi neon susar sira.

Na’i sei soi nia belun sira.

Ema nebé haksumik iha Nia sei la hetan susar. Refrão

 

Segunda Leitura                                                                                                                                   2 Tim. 4, 6-8, 16-18

Lia housi São Paulo nia surat ba Timóteo:

Oan doben: Ha’u ran hein de’it ona atu fakar, tamba Na’i Maromak. Mate iha ona odamatan. Ha’u funu maka’as teb-tebes. Ha’u la’o dalan to’o ona rohan. Ha’u moris ho fiar nafatin. Hodi ohin ba oin ha’u hein de’it ona atu simu ha’u nia kolen, kolen nebé Maromak, juiz los nian, sei haraik mai ha’u iha loron nebá; laos mai ha’u de’it, maibe, ba ema sira hotu nebé hein ho laran loron Nia atu fila hikas mai. Iha loron ha’u hatan lia dala uluk, ema ida la ko’alia netik housi ha’u: hotu-hotu husik ha’u mesak! Ha’u husu barak ba Na’i Maromak atu sira labele hetan tan todan sala ida ne’e.  Na’i Maromak iha hela ha’u nia sorin, hodi haraik kbiit mai ha’u, atu hodi ha’u nia serbisu, Nia Futar Lia-fuan to’o da’et ba fatin tomak, atu ema gentio tomak rona lia-fuan ne’e. Na’i Maromak hasai tebes ha’u housi Leão nia ibun. Nia mak sei hasai ha’u housi hahalok aat tomak, lori ha’u didi’ak ba Nia Reino lalehan. Gloria ba Nia, tinan ba tinan! Amen. 

Maromak Futar Lia.

 

Aclamação                                                                                                                                                                  Lc. 18, 14

Refrão : Aleluia, Aleluia!! Repete-se

Ema nebé foti-an, nia sei tun;

ema nebé haraik-an, nia sei sa’e. Refrão

 

Evangelho                                                                                                                                                               Lc. 18, 9-14

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun hodi dehan aiknanoik ida ne’e ba ema sira nebé hanoin katak sira ema santo, hodi hakribit maluk sira:  “Mane na’in rua sa’e ba Templo atu harohan: Ida ema fariseu, ida seluk ema publicano. Fariseu ne’e hamriik tiha harohan nune’e: ‘Ha’u nia Maromak, ha’u fo agradese ba Ita, basa, ha’u laos hanesan ema sira seluk: sira mesak ema naok-ten, ema laran fo’er, ema soe feen kaben-na’in; ha’u fo agradese mos tamba ha’u la hanesan ema publicano ida ne’e! Ha’u hadera-an semana ida dala rua, ha’u selu osan funan sira hotu!’  Publicano fali hamriik dook, la hanoin liu foti matan ba lalehan. Nia baku de’it hirus-matan, hodi dehan:  ‘Ha’u nia Maromak, sadia atan ha’u, basa, ha’u ema maksalak!’  Tebes, Ha’u dehan ba imi:  Publicano ida ne’e fila ba uma, santo; maibe fariseu ne’e lae liu. Basa, ema hotu nebé foti-an, Na’i Maromak sei hatun tiha nia! Ema hotu nebé haraik-an, Na’i Maromak sei foti nia”.

Lia Maksoyn.

Leave a Reply

Your email address will not be published. Required fields are marked *