shadow
Diocese de Dili > NOTÍCIAS > HOMILIA DO BISPO > La Hodi Ha’u, Imi Labele Halo Buat Ida

La Hodi Ha’u, Imi Labele Halo Buat Ida

Maromak nia ema mak ida ne’ebe hare sasan no acontecimento sira lor-loron nian ne’ebe haleu nia  ne’e ho matan Maromak ninian. Arquidiocese de Dili, Paróquia Letefoho dader ida ne’e haksolok, hasae agradece ba Na’i Maromak ba nia domin ida ne’ebe sukat mai ita. Basá Ordenação mak sinal  idas ne’ebe visível encontro domin nian ida. Sinal domin Maromak ninian, Cristo ninian, nune’e mos domin ida ne’ebe hatan ba Maromak ninia bolu. Ita hotu sei sasin ida ne’e. iha diálogo ne’ebe sei halo ora-oras tan ho ita nia diácono Rev. Mariano Maia. Iha diálogo ne’e manifesta opção fundamental ne’ebe candidato halo molok atu hakuak moris Sacerdócio nian. Ida ne’e hatudu tebes nia intensão ne’ebe los atu saran moris tomak ba ida ne’ebe bolu nia. Maromak bolu ho domin, ema hatan ho fuan no laran.   

Ida ne’e laos história foun ida, maibe iha kedas ona tinan 625 molok Cristo ninian, Maromak fihir tiha ona jovem ida naran Zeremias ne’ebe ohin ita rona iha Primeira Leitura; jovem ida ne’ebe diak, jovem ida ne’ebe sensível, jovem ida ne’ebe inteligência. Ita hare iha Primeira Leitura; wainhira ó sei iha inan nia knotak Ha’u hatene nanis ó, Ha’u hili nanis tiha ona ó. Hili atu sai Profeta haklaken mensagem ida ne’ebe nia contemporâneo sira mos la espera.

Ohin iha acontecimento boot ida iha ita hotu nia oin katak Maromak maske ida ne’ebe ita conhece, ida ne’ebe uluk ita hatene, housi Família boot ida ne’e Maromak fihir nia(diácono Mariano Maia) no Maromak haruka nia atu ba. Hanesan uluk haruka Zeremias ba sira ne’ebe kiik, kiak to’o hirak ne’ebe boot atu fo hanoin ba sira hotu katak; hamatak malu, lohi malu, lia bosok ne’e sala. Sei haklaken uluk ba sira ne’ebe servi iha Kreda no to’o ba sira ne’ebe fan sasan iha mercado katak bosok ne’e laos buat ida ne’ebe normal-falta de caridade.

Zeremias hetan kna’ar ida ne’e atu haklaken ho lian makas, atu tatoli liafuan murak Maromak nian ba Maromak nia povo. No iha coragem atu denuncia hahalok no vicios sira ne’ebe buras hela iha sociedade, comunidade nia le’et. Ida ne’e mak Profeta ida nia kna’ar. Maromak bolu foinsae ida housi foinsae sira nia le’et hanesan foinsae sira seluk. Hanesan Segunda Leitura fo hanoin mai ita katak Amululik boot hotu mai housi ema sira nia le’et. Nia la foti ema ida ne’ebe extraordinário, maibe Nia foti ema bai-bain ida tanba ema bai-bain mos iha ninia fraqueza, iha ninia miséria, iha nia limitações hanesan mos ema sel-seluk. Bolu ema bai-bain ne’e atu nia mos bele compriende ema seluk nia fraqueza no limitação, atu nia hatene hatudu ninia solidariedade ho ema seluk. Tanba experiência tiha Maromak nia Misericórdia, nia mos bele sai laran luak liu tan ho sira ne’ebe kiik no mukit. Tan Nia laran luak ho ita, tanba sa ita labele laran luak ho maluk sira seluk!

Tan ne’e mak ita nia Amo Papa nia liafuan dehan; Nada é mais urgente que isto proximidade, vigilância, habera-se da carne do irmão que sofre. Ida ne’e mak razão tanba sa Amululik ida tem que besik liu tan ba hirak ne’ebe dook, ba hirak ne’ebe kiik no ba hirak ne’ebe ema hewai. Ida ne’e mak papel Profeta ida nian. Profeta mak ida ne’ebe hare sasan sira ne’ebe domin nian ho matan Maromak ninian (O Profeta é aquele que Vé o mundo com os Olhos de Deus). Ida ne’ebe labele nonok de’it wainhira hare buat hirak ne’ebe la lao tuir ninia dalan la lao tuir Maromak nia hakarak. Nia iha força ida ne’ebe mai housi Maromak, força ida ne’ebe mai housi laran ne’ebe incontrolável, lori nia atu foti Nia lian hodi denuncia sala; buat hirak ne’ebe hanesan abuso, violência no buat hirak ne’ebe sobu ema nia moris no crime ne’e hotu ne’ebe halo hasoru humanidade. Hanesan uluk ohin mos profeta sira profeta sira nia missão laiha doferência ne’ebe boot. Tan ne’e mak ora-oras tan iha oração consagratório nian ita sei harohan nune’e: Aman bele halo buat hotu, ami harohan ba ita boot atu halo hela ba atu ita atan ida ne’e hetan dignidade Presbítero sira nian. Halo foun fali iha nia iha nia laran Espírito moris Santo sira nian hodi hafoun dignidade presbítero nian.

Identidade Amolulik nian ida mai housi participação ida específica iha Cristo nia Nailulik. Ida ne’ebe simu Ordenação sai ba Kreda no iha Kreda imagem ida real, imagem ida moris, imagem ida transparente Cristo Sacerdócio ninian. Tan ne’e ida ne’ebe sai Amolulik sai imagem Cristo ninian ne’ebe real, visível, moris no transparente. Liu husi nia moris nia bele comunica, bele fahe graça ne’ebe nia simu ba Maromak nia povo.

Ho consagração Amolulik simu poder kbiit força Espiritual participa iha autoridade Cristo ninian no iha nia Espírito atu guia Uma Kreda, guida Maromak nia povo. Nailulik ida ho ordenação nia simu imagem ida real, moris no transparente Cristo nian iha Kreda no iha povo sira nia oin. Ida ne’e mak tane dignidade celebração dader ida ne’e nian liu husi ita nia oração Na’i Maromak mak foti Nia atan ne’e ba grau Presbítero nian.

Ida ne’ebe atu simu Ordenação, nia sei halo nia promessa atu hatene halo nia kna’ar didiak, haklaken, hadomi Maromak nia Futar liafuan. Hasanto nia moris ho Sacramentos Eucaristia no reconciliação nian no harohan nafatin. Ida ne’e mak dalan ba santidade amolulik ida nian, ida ne’ebe mak dalan santidade povo Maromak ninian ne’ebe liu husi Amolulik orienta Maromak nia povo liu husi meios sira ne’e.

Sacramento ho Maromak nia liafuan mak we matan ne’ebe haburas nafatin graça sacerdócio nian ne’ebe atu simu. Ita bele husu ba ita nia an dalan saida precisa fo atensão atu nia bele persevera nafatin iha vocação ne’ebe nia simu. Laos fácil atu ita halo no hahu buat hotu focus nafatin iha Maromak. iha loron Ordenação ninian loron sira forte ninian ita fácil buka Maromak, maibe dala barak tendência ita ema ninian ita iha tentação boot atu sura liu ita nia força, conta liu ita nia capacidade, ita nia abilidade pessoal duque Maromak ninian. Tan ne’e ita nia Amo Papa convida ita hotu liu-liu ba ita nia diácono ne’ebe atu simu dau-daun Ordenação katak fundamental tebes aprende loke relação ho Aman Maromak basá Nia mak we matan no hun graça ninian.

Amolulik ida precisa desafia nafatin nia an atu buka husik nia toman sira ne’ebe buka hanoin an de’it no comfia an, maibe hatene buka liu atu comfia iha Na’i Maromak duque ninia força rasik (permanecer diante do Senhor deixando seu olhar percora a minha vida). Hakas atu tam iha ksolok ida Cristo nian. Ida ne’e mak segredo Apóstolo ida nian. Ksolok Amolulik ida nian iha Cristo de’it. Se ita la hetan ksolok iha vida no dalan ne’ebe ita hili ka vida ida ne’ebe ita opta, neneik eh kleur ita sei hetan problema, ita sei hetan susar no infidelidade ne’e bele mosu.

Sira ne’ebe Maromak bolu hanesan ita nia diácono iha tinan 10 resin nia laran, nia rasik buka atu descobre no ikus mai nia dehan katak; laiha dalan seluk nia atu nia bele hetan ksolok duque sai Sacerdócio. Nia fiar katak liu husi dalan ida ne’e de’it nia bele haksolok no sai Santo. Tan ida ne’e ita hare iha nia motto ne’ebe dehan; La Hodi Ha’u, Imi Labele Halo Buat Ida. Jesus mak Uvas hun no Escolante sira mak nia sanak.

Amolulik no Eucaristia iafuan rua ne’ebe labele haketak malu ka existe liafuan ida ne’ebe inseparável. Eucaristia mak acto central iha Amolulik ida-idak nia moris. Ida ne’ebe celebra Eucaristia laos de’it atu tuir rito no liafuan hirak ne’ebe hakerek, maibe tem que husik Cristo atu tama iha imi nia moris. Halo ha’u nia moris tuir Cristo ninian conforme hau nia existência tuir Cristo ninian. Ida ne’e mak dalan único atu halo ha’u besik liu tan ba maluk sira. tan ne’e, Exortação São nia ne’e los duni katak; oinsa mak ó dehan hadomi Maromak ne’ebe la hare se ó la hadomi ó nia maluk ida ne’ebe iha ó nia sorin? Papa Francisco aumenta tan dehan; iha Amolulik barak ne’ebe la hatene atu rona, tan ne’e ha’u husu ba ha’u nia an; se la hatene rona ó nia maluk ne’ebe iha ó nia sorin oinsa mak ó bele rona Maromak ne’ebe la iha ó nia sorin. La hodi Ha’u, Imi labele halo buat ida. tama iha oração ho Cristo ajuda atu itabele hetan centimento ida Cristo nian, atu nune’e de’it mak ita ne’ebe hakarak sai instrumento Maromak nian.

Wainhira halai no ses husi ita nia relação ho Na’i Maromak, la fo importância ba ita nia oração saida mak acontece ita sei tentação atu buka fatin ne’ebe mais seguro katak fatin hirak ne’e mak dalaruma cria ita hanoin atu hari ita nia mundo mesa-mesak, cria ita nia mundo kikoan, hadoolan husi ema seluk no sai ema ida ne’ebe mais individualista. No dala barak mos ita la lao tuir buat ne’ebe los, maibe tuir ita nia hakarak de’it.

Tan ne’e mak atu bele persevera ho Maromak nia liafuan ho oração; Ha’u mak Uvas hun lolos ema ne’ebe la horik iha Ha’u ema sei haketak tiha nia katak Maromak iha domin ne’ebe especial mai ita ida-idak. Tan ne’e sanak hirak ne’ebe maran mak refere ba ema nia miséria, ema nia infidelidade, fraqueza oi-oin. Tan ne’e precisa purificação.

Tan ne’e ohin sarani doben sira ita hotu ho ksolok boot halibur hamutuk iha Paróquia ida ne’e agradece ba Maromak ba graça boot Sacerdócio ninian ne’ebe haraik ba ita nia diocese iha tinan ida ne’e.

Ita harohan atu liu housi Nain Feto do Carmo mahein Paróquia ida ne’e nian, atu ita nia alin doben ida ne’ebe Na’i Maromak fihir ona bele hakonu duni ho diak oin oin, atu nia bele sai duni Amolulik ida ne’ebe laos badinas de’it, maibe amolulik ida ne’ebe hatene duni transmite ba povo Maromak nia Liafuan.

Leave a Reply

Your email address will not be published. Required fields are marked *