shadow
Diocese de Dili > NOTÍCIAS > LETURA DIÁRIA > XXXIII Domingo Tempo Comum (ANO C)

XXXIII Domingo Tempo Comum (ANO C)

Primeira Leitura        Mal. 4, 1-2a (3, 19-20a)

Lia housi Livro Profeta Malaquias:

Na’i nia loron sei to’o mai. Loron ne’e sei manas maka’as hanesan forno. Ema loko-an sira, ema aat sira tomak sei sai hanesan du’ut maran. Maromak, buat tomak Na’in, lia tun, dehan: “Loron ida be atu mai ne’e, sei habai maran sira, sira nia abut ka sira nia sanak ida mos sei la hela. Maibe, ba imi sira be hamta’uk Ha’u naran, justisa nia rohan sei mosu iha imi leet; maksoin sei mosu mai tebes housi justisa nia roman”.

Maromak Futar Lia. 

 

Salmo Responsorial                                                                                                                                               Sal. 97(98), 5-6. 7-8. 9

Refrão : Na’i,  hiit-An mai ukun ho justisa!!! Repete-se

Hodi cítara imi sei hananu ba Na’i!

Imi sei hananu ba Na’i!

Imi sei haksolok iha Na’i futar oin!

Basa, Na’i mak Liurai! Refrão

 

Tasi sei halian, buat tomak iha tasi halian;

mota kiik-boot hahi,

mundo tomak sei hahi, buat tomak iha mundo hahi;

foho sira hotu sei haksolok. Refrão

 

Iha Na’i futar oin,

Na’i be mai atu halo justisa ba mundo,

Nia sei ukun rai ho justisa,

ukun povo sira ho lialos. Refrão

 

Segunda Leitura                                                                                                                                                                         2 Tes. 3, 7-12

Lia housi São Paulo nia surat ba sarani sira iha Tesalónica:

Maun-alin sira: Imi hatene ona oin sa imi sei banati tuir ami; ami la moris nar-naran de’it iha imi leet; ami la han leet de’it ema ida nia ai-han.  Kalan loron ami servisu boot atu keta fo todan ba imi ida. Ne’e laos katak ami la iha direito, maibe, ami hakarak hanourin imi atu badinas tuir ami. Bainhira ami sei horik iha imi leet, ami hateten tiha ona katak: se mak la kohi servisu, nia la bele han. Ami rona katak imi balun la’o tun la’o sa’e, la kaer servisu ida, kaer mak servisu ida nebe la folin buat ida. Ba sira ne’e ami hameno hodi Na’i Jesus Cristo nia naran, atu sira hakmatek kaer servisu, hodi han-hemu ho sira nia kosar wén.

Maromak Futar Lia.

 

Aclamação                                                                                                                                                                                        Apc. 2, 10c

Refrão : Aleluia, Aleluia!! Repete-se

Na’i lia tun, dehan:

Ó sei di’ak nafatin to’o mate,

Ha’u sei fo moris rohan laek. Refrão

 

Evangelho                                                                                                                                                                                        Lc. 21, 5-19

Na’i Jesus Cristo nia Evangelho nu’udar São Lucas haktuir:

Iha tempo neba, Judeu balun hateten katak ema sira hafutar Templo ho fatuk mesa furak, hodi hasa’e buat furak ba Maromak. Jesus lia tun ba sira, dehan:  “Loron sei to’o. Iha loron ne’e, sasan tomak nebe imi hare daudaun sei lakon mohu, fatuk ida sei la hela iha fatuk ida nia fohon”.  Ema sira ne’e husu ba Nia:  “Mestre, bainhira los mak buat hirak ne’e sei mosu mai? Sinal nebe mak hatudu katak besik ona?”  Jesus Lia tun ba sira, dehan:  “Imi hare didi’ak ba! Keta husik ema lohi imi, basa, ema barak sei mosu mai hodi Ha’u nia naran, hateten:  ‘Mak ha’u!’ eh ida ne’e tan:  ‘Tempo besik ona!’ Imi keta tuir sira. Bainhira imi rona ema ko’alia kona ba funu, kona ba revolução, imi keta ta’uk: buat hirak ne’e hotu sei sai duni nune’e uluk; maibe, ne’e laos katak rohan mak ne’e ona”.  Jesus dehan tan ba sira: “Povo ida sei hamriik funu hasouru povo seluk; Reino ida sei hamriik funu hasouru Reino seluk; rai sei nakdoko maka’as; iha fatin barak, ema sei hamlaha, moras peste sei mosu; buat nebe halo ta’uk ema sei mosu mai; sinal boboot  sei mosu iha lalehan. Maibe, uluk liu buat hirak ne’e hotu, ema sei kaer imi, dadur imi; ema sei duni sai imi, sei lori imi ba Sinagoga, ba kadeia. Ema sei dada imi to’o liurai no emboot sira oin, tan Ha’u nia naran. Iha oras ne’e duni, imi sei biban tebes atu bele fo sasin. Ne’e duni, imi la lika hanoin resin iha imi laran atu saran-an oin sa. Ha’u sei fo lia matenek ba imi. Hasouru lia ne’e, imi nia funu-balu sira sei la tahan simu hasouru. Imi nia aman sira, maun-alin sira, parenti sira no belun sira, mak sei saran imi ba ema aat sira liman. Ema sei oho mate imi balun; ema hotu sei rai odi hasouru imi, tan Ha’u nia naran. Maibe, housi imi nia ulun-fatuk fuuk tahan ida mos sei la monu lakon. Tan imi barani nafatin, mak imi sei soi imi nia klamar”.

Lia Maskoyn.

Leave a Reply

Your email address will not be published. Required fields are marked *